الجمعة 29 مارس 2024 12:08 صـ
الجارديان المصرية

رئيس مجلس الإدارة ورئيس التحرير عبد النبى عبد الستار

فنون وثقافة

الإعلامى محمد الغيطى يكتب : قطر العمر وفعت منه محطة

الإعلامى الكبير محمد الغيطى
الإعلامى الكبير محمد الغيطى

قطر العمر وقعت منه محطه
مدتها سنه
زي ماعدت قبله سنين
معظمها حزين
واحيانا فيها بعض الغنا
لكن كل الضنا
على عيني غما ولسه بادور في الساقيه
وأتعب على لقمة عيشي
لابس ورقة توت
ومداري قلبي بخيشي
وساكن في الشوك وف هيشي
بامشي أعد الخطوات
والدرب كله مطبات
ونفسي اخد نفسي
واعيش مستور
لكن حتى الستر معاند
كله سراب وعنا
ياانا
لا بايدك جيت الدنيا
ولاتعرف موعد صفارة الموت
ومهما كنت حويط
بتفوت ف دواير سودة
وبيبان مسدودة
تتكفي على وشك
اللي لازقه دايما في الحيط
ازاي تفرح بسنه ماتت في حياتك
وورقه سقطت من روزنامتك
والناس بتهنيك ياعبيط
دي ناس هابله
بتكرر كلمة زي قطيع وتدق الطبله
ويغنوا
هابي بيرث داي تو يوو
ايووه
على سذاجتهم
اللي معاك في الحفله
وتايهين في الغفلة
والبنت السافله
اللي بتسأل
تميت كام سنه ياجميل
ده سؤال لعليل
هوه العمر ياناس ببطاقه
ولا بالطاقة
انا حاسس اني طفل صغنن
بالعب حجله واولى
يضربني واد بالزلطة
اجري اعيط لامي
وستي تحط الخلطة عالخبطه
وتقولي نام ،،وتحنن
اجري لحضنها واطمن
وأحلم وانا عافق حلماتها
اني كبرت
تفطمني
اعيط
وأجري ف أحراش الدنيا
الزايطه
وأتوه
وسط زحامهم أنسى العنوان
واسال انا فين
ومين يمسك ايدي
ريوصلني لفرشتي وسريري
اصحى الاقيني كبرت اوي وشخت
ملامحي فراغ
وقلبي حريقه
والدنيا غريقه
والناس اللي معاهم طوقي
بيسدوا طريقي
اصرخ
مالقيش حد يغيتني
والايام هربانه
كما قطر سريع
اجري وراه
اقف
مايقفش
واتاريني على القضبان مصلوب
ولا فيه محطه
ولاصنافور
والسكة بتهرب من خطاويا
وانا مَش واصل
ولا غالب
ولامغلوب
حاجه تحير