عبدالسلام بدر يكتب :في دولة ما .. ” الأزمة ” ..!!

استهل المذيع اللامع برنامجه بالترحيب بمشاهديه وبضيفه الكريم .
_ بارحب بحضرتك ياباشمهندس .
* أهلا وسهلا بيك وبالسادة المشاهدين
_ في البداية احب اسأل حضرتك : شايف البلد ازاي ؟
* انا مش بس اللي شايف لكن اعتقد الاغلبية شايفة وحاسة
_ ايوه حضرتك حاسس بايه وشايف ايه؟
* حاسس اننا في مأزق خطير . وشايف اننا في أزمة حقيقة . ربنا يستر من اللي جاي وال_
( أشار المذيع الي الضيف فتوقف فجأة )
_ المذيع : معلش استأذن حضرتك معايا اتصال
* الضيف : اتفضل
_ المذيع بيكلموني في الكنترول وطالبين أبلغ حضرتك واهنيك باختيارك لوزارة .... والخبر وصل الكنترول من الرئاسة حالا واحنا ع الهوا
* الله يبارك فيك . ميرسي
_ المذيع اتفضل كمل . حضرتك كنت بتقول اننا في أزمة .
* الضيف : طبعا . احنا في أزمة وعي . وازمة الوعي من أشد وأخطر الأزمات اللي ممكن تأثر علي أي دولة كبرى قوية . لان المواطن رغم كل النعم اللي بيرتع فيها لكن مش بيحمد ربنا عليها . وعامل نفسه مش شايف النعم دي . لكن شايف بس بعض السلبيات البسيطة جدا اللي موجود منها في باقي دول العالم وبشكل مهول .
_ المذيع : يعني حضرتك عايز تقول ان الازمة الحقيقية هي عدم اعتراف المواطن بالتحسن الكبير في حياته
* الضيف : طبعا .
المذيع : وعدم الاعتراف بالرفاهية ده يعتبر أزمة
* الضيف : طبعا طبعا . لان المواطن اصبح مش لاقي حاجة يطلبها تاني وكل حاجة متوفرة له ولاولاده وكمان لاحفاده وده عمل له نوع من الكسل والملل . من هنا بتيجي معاناته الحقيقية والازمة اللي انا اقصدها..

_ المذيع : باشكر حضرتك جدا وشرفتنا ومبروك مرة تانية لحضرتك على المنصب الجديد .

عرفت بعد الحلقة ان المصور وقع ووقع الكاميرا على الارض وهو فطسان من الضحك .