دكتوره أمنية محمد موسى تكتب : أرواح مستعارة خلف ستائر الوجع

​أوقات كتير بنشوف حوالينا ناس بتضحك بتهزر وبتتحرك في الدنيا وكأنها في منتهى السعادة والراحة. بس لو قربنا شوية وبصينا في عيونهم أو ركزنا في تفاصيلهم ورا الكواليس هنلاقي عواصف من الحزن والألم المستخبي ورا ابتسامات مصطنعة. دي حكاية الأقنعة النفسية اللي بقينا نلبسها كل يوم علشان نعرف نعيش ونتعايش مع الناس بالرغم من الوجع اللي عمال يأكل فينا من جوة.
​إخفاء الجروح دي مبقاش مجرد تصرف عابر ده بقى مجهود نفسي وجسدي مرعب بيستهلك طاقتنا العاطفية كل يوم. بنهرب جوة الأقنعة دي خوفا من نظرة الشفقة أو علشان نحمي صورتنا القوية قدام الناس أو حتى علشان خايفين نحمل اللي بنحبهم همومنا. بس النتيجة في الآخر بتكون غالية وصعبة جدا بنلاقي نفسنا عايشين في عزلة وغربة وسط الزحمة وجسمنا بيبدأ يشتكي من كتر الكبت في شكل صداع وتوتر وتعب مزمن.

​دولاب الأقنعة إحنا بنلبس إيه؟

​علشان نفهم إحنا بنعمل إيه في نفسنا لازم نعرف إيه هي أشهر الأقنعة اللي بنستخبى وراها

​قناع أنا تمام (قناع السعادة المزيفة) وده القناع الأكثر مبيعاً واستخداما بنلبسه لما نكون بنموت من الحزن والكسرة بس نقرر نصدر للناس طاقة إيجابية وضحكة من القلب علشان نحمي صورتنا الإيجابية ومحدش يشوف ضعفنا.

​قناع الرجل الحديدي (قناع القوة المفرطة): بنلبسه علشان نبان صلبين ومفيش حاجة بتهزنا وبنشيل فوق طاقتنا في الشغل والمسؤوليات لمجرد إننا خايفين لو قصرنا يبان إننا بني آدمين بنضعف وبنتعب.

​قناع مش فارق معايا (قناع اللامبالاة) ده قناع دفاعي بحت بنلبسه لما ننجرح من حد أو نمر بصدمة فنتظاهر إن الموضوع عادي ومأثرش فينا علشان نحمي نفسنا من أي أذى أو صدمة
الأقنعة ممكن تحميك لفترة قصيرة من عيون الناس بس بتخنق روحك وتكتم نفسك العيشة بوشك الحقيقي حتى لو كان تعبان أو مجهد أكرم وأريح بكتير من إنك تعيش بوشوش مستعارة