الكاتب الكبير بهاء الدين بدوى يكتب : مين بنى مصر ؟!

قالوا اللّي بنى مصر
شغلته حلواني !

وانا قلت دا اللي بناهـا
شعب كان بيعاني

على كتفه شايل حمول
والصبر له معاني

لاجه في يوم اشتكى
ولا عمره قال ياني

قريت كتاب الأغـاني
لأبو الفرج أصفهاني

ومفاكهة الخلان
للكاتب ابن طولون

وكمان تاريـخ الجبرتي
ودرست مـن تاني

من عصر مينا وأحمس
ليوناني .. وروماني

وتتار .. مغول .. مماليك
وفرنجة و عثماني

طول عمره كان يتنهب
ويسامح الجاني

وطيابته دي مش عبط
دي طيابة رباني

لكن في لحظة غضب
حقه يعود تاني

وأرضه شرفه وعرضه
لاكاني ولامانـي ..

في فرحه طير شادي
وفي زعله شراني

شعب مالوش كتالوج
ودماغه عجباني

واللي بنى مصر
فلاح .. وفكهاني ..