الأديب الكبير بهاء الدين بدوى يكتب : ثـــورة القــرود

قرداتي ودي شغلته
يرقّص السعادين

كان عنده قرد عجوز
إسمه أبو الميامين

شايل في إيده طبلة
وعصاية ييجي مترين

ورقبة الميمـون
كان فيها حبل متين

من طلعة الفجر يسرح
يلف في الميادين

يجري عليه العيال
ويصقفوا لميمون

ويغني على طبلته
يقول ياليل وياعين

والليلي ليلي ليل
إلعب يابو الميامين

والقرد أبو الشقلباظ
طلعان عينيه لـتنين

يقول له نومة العازب
يتمرمغ على الجنبين

يطلب عجين فلاحة
يلت له في العجين

وفي يوم كرامة القرد
نأحت عليه حبتين

إكمن صاحبه بعصايته
لسعه خرزانتين

قال ورحمة أمي
ميمونة أم ديلين

حقي تالت ومتلت
وحاأخلي ليلته طين

القصد .. رجعوا البيت
وكانوا هلكانين

قال له تعالى ياصاحبي
ناكل لنا لقمتين

رمى لقرده موزاية
وهو خد موزتين

القرد قلبه اتغاظ
كشر عن النابين

والحقد بان في عينيه
والغل يعمي العين

وقال اشمعنى هو
يطفح الموزتين

حلف طلاق من شيتا
يرد صاعه صاعين

زمجر وقال له ياويلك
من أبو الميامين

سهر يوميها الليل
فاتح عينيه لتـنين

لحد صاحبه مانام
وشخّر له تشخيرتين

القرد فك الحبل
وهوبااا شقلبتين

وبسرعة فتح الباب
وعرف طريقه منين

رجع وجايب معاه
من القرود عشرين

اللي شايل له عصاية
واللي معاه طوبتين

دخلوا على القرداتي
وكتفوه بحبلين ..

نزلوا عليه الغيـلان
بالطوب وبالعصيان

واحد يعضه في إيده
والتاني ماأعرفشي فين

وطفحوه الكوته
والكوته تيجي منين

صاحبنا قام مفزوع
يصرخ وويله ويلين

ينده ياخلق ياهووووه
حاأمووووت يابني آدمين

لاحد سامع نداه
ولا حد قال له انت فين

ودي آخرة الطماعين
واللي ياكل موزتين

وعسى الله تتعظوا ياللي
بالفساد عايشين ..