مدحت الشيخ يكتب : (فضفضة)...أنا والحكومة

"العلاقة بيني وبين الحكومة علاقة رومانسية فاشلة... فيها حب من طرف واحد، والتاني دايمًا مشغول!"

أنا والحكومة شبه بعض... الاتنين عندهم نية طيبة بس ما بتكفيش.
هي بتوعد، وأنا بصدق.
هي بتتكلم، وأنا باندهش.
هي بتسأل "فين وعي الشعب؟"، وأنا باسأل "فين الشعب اللي في وعيكم؟"

الحكومة دايمًا بتقول إنها حاسّة بينا، وأنا حاسس فعلاً... بس بالتوهان
بيقولوا: "الأسعار نار عشان الإصلاح الاقتصادي"، وأنا بقول: "ما تخلّونا نولع سوا ونرتاح!"
بيقولوا: "شدوا الحزام"، ونسوا إن الحزام ده من كتر الشد بقى حبل مشنقة.

زمان كنت أظن إن الحكومة أمّنا... طلعت مرات الأب، بتدينا اللقمة وهي مخصومة من مصروفنا، ولو فكرنا نعترض، تقول: "ما هو كله لصالِحِك!"

أنا لا أكره الحكومة... أنا بس نفسي أعيش من غير ما أحس إن كل قرار بيتاخد، بيتاخدني معاه.
نفسي في يوم أصحى ألاقي الحكومة بتقول: "معلش"، بدل "شدّ حيلك".
نفسي تفتكر إن المواطن مش دايمًا قادر يتحمّل، وإن "التحمّل" مش سياسة.

بس أنا ماشي معاها، ساكت... زي الزوج اللي عارف إن مراته غلطانة، بس مش فاضي يعمل خناقة لأنه بيشتغل شغل تاني بعد الظهر... عشان يدفع فواتير الحكومة.

وأنا مالي؟ بس حبيت أفضفض.