د. فتحى الشرقاوى يكتب : لماذا أدفع ضريبة نجاحي تعب ؟!

عندما نجد شخص ما شاطر او متميز في اي جانب من جوانب الحياة، اعتدنا كلنا على استغلال اسوأ استغلال تحت مبرر وشعار إنه شاطر وبيفهم،وكأنه مطلوب منه يدفع فاتوره تمايزه وتميزه تعب وارهاق وكسرة ضهر، هذا الشخص الناجح البائس موجود في بيوتنا وفي أماكن عملنا وفي كل مكان
لدرجة أن الواحد بعد فترة من استغلال يتمنى ينكر تميزه وشطارته عن كل الناس ويدعي جهله وعدم معرفته هروبا من استغلالهم
تعالوا مع بعض ناخد رحلة سريعة من احد هذه النماذج من داخل بيوتنا،لمجرد ان بنت من بناتنا تظهرشطارتها
في اي نشاط من انشطة اعمال البيت سواء كان تنضيف وترويق وغسيل وطبخ وووووو سرعان ماتجد كل الموجودين في البيت يرمون عليها كل ادوارهم تحت شعار انها لهلوبه وشاطرة وبتفهم اخواتها البنات ،ومرة مع أخرى نرمي عليها لحد مانمص دمها ونكسر وسطها ونخليها تكره وتندم على اليوم اللي اتولدت فيه ،وفي الوقت اللي بتكون فيه شايله الغم والهم والارف ،تجد بقية أخواتها متنعمين في الراحة، اللي قاعده تتمكيج واللي حاطه الهاند فري في ودنها واللي بتلعب في الموبايل.واللي بتلعب في مناخيرها وقفاها وكلهم سايبين البنت اختهم الشغاله الخدامه مغموسه في أعمال البيت لنضافتهم، وعندما نقول لاخواتها المقاطيع المأنتخات قوموا يابنات ساعدوا اختكم المطحونه والهلكانه يقولولك بكل ثقه
وبجاحه ما احنا مابنعرفش وهى الشاطرة واللي بتفهم و هى بتحب الحاجات دي
و بمرور الوقت كل اللي في البيت بيرمي عليها الحمل تحت شعار إنها شاطرة ولهلوبه لحد ماتيجي لحظه نجدها كرهت نفسها وكرهت كل اللي حواليها واصبحت مشروع مريضة نفسيه مليانه من جوالها صراعات
خدوا من هذه النوعية كتير قوى في الشغل..وفي كل مكان، ياريت ناخد بالنا من هذا الموضوع ،مش علشان أنا شاطر أقوم أموت نفسي علشانكم.بسبب شطارتي
مش علشان انا متميز اقوم آموت نفسي علشانكم بسبب تميزي هذا لا يحدث إلا في المجتمعات المتخلفة
اه وربنا والمتخلفه جدا بس.
#مجرد _خاطرة

# ا.د. فتحي الشرقاوي
أستاذ علم النفس
جامعة عين شمس