احمد مجدي يكتب : (سياسه الاحتكار ) عن قصه الدكتور كمال يونس (قتل إداري ويحفظ)

(١٠)

تطبيقات ونتاج ورشة بورسعيد للكتابة المسرحية ضمن فعاليات المهرجان القومي للمسرح في دورته ال١٨ مدرب الورشة د.كمال يونس

يفتح المسرح المضاء بالكامل على اثاث مكتب في شركه خاصه يجلس على المكتب مستر ناصر عزوز رجل في الستينات من عمره ويجلس أمامه بهاء رفعت شاب في العشرينات من عمره
ناصر...اهلا اهلا بالمطرب الكبير بتاعنا
بهاء ..اهلا بحضرتك يامستر والله اول ما جالي تليفون ان حضرتك عاوزني في الشركه جيتلك وقبل ميعادي كمان
ناصر.. ده شرف لينا يانجم والله انا معجب بيك جدا وبالفن اللي بتقدمه بعد الانحدار اللي حصل في الذوق العام لقيتك ماشاء الله بألحان جميله وكلمات راقيه وسهله وصوتك اللي بيلمس القلوب محقق أرقام خياليه في مشاهدات الميديا
بهاء.. والله كله بتوفيق ربنا يامستر
ناصر.. ياراجل ده انت خلصتنا من الواد اللي بيقعد يدق في دماغنا ده والتاني اللي مجنزر حنجرته بسلسله عشان صوته مايهربش
بهاء .هههههههههه
ناصر...نخش ف موضوعنا يانجم عشان الوقت انا محتاجك تتعاون مع شركتي
بهاء ..تحت امرك يامستر انما هتعاون إزاي مع شركه حضرتك
ناصر ..بص ياابني انت شاب وليك طموحات واحلام وعندك موهبه كبيره محتاجه حد يدورهالك صح ف احنا دورنا نحطلك خطط ونكبر ونلمع فيك ونفضي دماغك للفن وبس ايه رايك
بهاء ..والله يامستر انا مرتاح كده على وضعي ده وبحب ابقى حر نفسي جدا والحمد لله مستوره معايا وكفايه حب الناس
ناصر.. يابهاء انت زي إبني واناشايف مصلحتك أكتر منك لاني خبره في المجال وياما لمعت نجوم وانت عندك عارف كده ومرحلة انك تشتغل مع نفسك دي راحت لحالها دلوقتي انت مشروع ميجا ستار مش سوبر ستار كمان
بهاء ..طب ممكن تسيبني افكر وبالمرة اصلي استخاره واستشير اهلي
ناصر ..مفيش تفكير يانجم لما تيجي عندي الشركه تسجد ركعتين شكر لان اتفتحتلك طاقه القدر العقد جاهز والعربون العربيه الشبح اللي اشتريتهالك امبارح ومفتاحها أهو قولت ايه
بهاء ..اللي انت شايفه يامستر نتوكل على الله
ناصر ..يمسك السماعه التي تتواجد على المكتب يانور ابعتي ابراهيم يصورنا
تظلم جميع زوايا المسرح وبؤره الضوء تسلط على بهاء وهو يمضي العقد مع مستر ناصر...

لوحة اتنين
يفتح المسرح على اثاث صالون بيت وكنب
يجلس على الكنبه بهاء وامامه والدته
بهاء ..الحمد لله ياماما ان ربنا وقعني في راجل جدع زي الاستاذ ناصر راجل جنتل وذوق جدا وبيخاف عليا كأني ابنه
الوالده ..ربنا يحفظه لعياله ويفرحه بس مكلف نفسه اوي يابني العربيه اللي انت ركبتني فيها دي حلوه اوي وشكلها غالي
بهاء ..مكلف نفسه ايه ياماما هو مش جايبها كهديه ده عربون لشغلي معاه
الوالده ..ربنا يوفقك يابهاء وافرح بيك وشكلها هتحلو ياولا وهنجوز اخواتك كمان
بهاء..إن شاء الله ياماما ده رزق اخواتي البنات
..صوت رنه موبايل ..
بهاء..ايوه يامستر ..الحمد لله والله ..والدتي بتدعيلك حضرتك بتقول ايه في كلام معاك هيخليني اكسر الدنيا طب ممكن تبعتهولي واتس طب حضرتك في المكتب طب حالا هكون عندك ياكبيرنا

لوحه تلاته
يجلس على المكتب ناصر عزوز وامامه بهاء
ناصر ..رزقك في رجليك يانجم كلام ولا في الأحلام
بهاء .. شوقتني يامستر حتى حضرتك مش عاوز تبعته واتس
ناصر..لا واتس ايه معندناش الكلام ده احنا بنحب الشغل بجد غيركوا انتوا يافنانين
بهاء ..ان شاء الله اكون عند حسن ظنك شوقتني بقى ياكبير فين هو الكلام
ناصر. ..سمي الله الأول وخد اقرأ من تليفوني
بهاء يمسك موبايل بهاء ويقرأ
ياجمال القرد مع ودانه
وامه بتحلقله تعورها
بنشوفه يجز على سنانه
ولا ينطق كلمه تزعلها
محلاك ياسكوت محلاك ياسكوت
وسناني مش حمل البسكوت
برشام الشهره ف محفظتي
بسهوله هغني من غير صوت
ياجمال القرد مع النمله
وامه بتظبطهم ع الرمله
عماله تصوت وبتلطم
النمله حِبلت م العَمله ....

بهاء..ههههههههههه
ناصر ..بتضحك على ايه يابهاء
بهاء ..على هزار وخفه دم حضرتك بالله عليك انا متشوق للكلام اللي هغنيه
ناصر ..ماهو ده
بهاء ..اكيد حضرتك بتحب تهزر صح
ناصر . انا راجل عملي مش بتاع هزار
بهاء . يعني ده بجد بقي ولا انابيتهيألي ولا ايه
ناصر ..ايه مش عاجبك الكلام
بهاء ..مش لوني خالص يامستر
ناصر . مش انت اللي تحدد
بهاء ..حضرتك انا المطرب
ناصر..انت اللي بتأدي االي احنا بنخططه واحنا اتفقنا على كده
بهاء ..حضرتك قولتلي انك هتمضي معايا عشان نتعاون على الرقي بالذوق العام بأماره ما هزرت مع السكرتيرة وقولتلها أهو ده اللي طلع عفاريت الهلس من دماغ الجيل بتاعكوا وطبعا انت عارف انك ف مقام والدي بس الكلام ده هلس
ناصر..مش انت اللي تقول هلس ولا لا وخلاص دي اغنيتك هتطلع هتنزل هتغنيها... وبعدين فكرك اني هغامر بشركتي لو الكلام مش هيعجب الناس؟
بهاء..حضرتك بتغامر بيا انا كده كده شركتك مش هتخسر حاجه
ناصر.. هتغنيها يابهاء ومش عاوز مناهده وخلي بالك هي متلحنه كمان شوفت بقى الأمور بنسهلهالك إزاي
بهاء ..مش هغنيها يامستر بعد اذنك
ناصر ..مش بمزاجك وأقرأ العقد كويس ان اي اخلال من الطرفين بالعقد هيدفع كام والشرط الجزائي ماتبقاش دماغك ناشفه وفكر في مستقبلك وأهلك
بهاء ..انا كده هبقى مسخه يامستر
ناصر ..انتهى الكلام قدامك ٣ أيام لو عدوا اعتبرنفسك من غير شغل لمده ٤ سنين غير القضيه اللي هرفعها عليك

لوحه ٤
اثاث مقهى بلدي وصوت لاغنيه بهاء الجديده وكل الجالسين يدخلون في نوبه من الضحك
شخص..١ الولا اللي بيغني ده كان طالع طلعه حلوه بس الله يخربيت المخدرات اللي كلت عقول الشباب
شخص ٢..لا وانت الصادق النسوان اللي كلت عقله ده ملموم اليومين دول على واحده رقاصه
شخص ٣..كلهم ولاد متضايقه كلاب فلوس
شخص ٤..بقولكوا ايه سيبكوا من حوار الواد ده دي عالم بايعه كل حاجه يابا حتى شرفها عشان يفضلوا فوق خلينا احنا في عيشتنا المنتنه دي

لوحه ٥
اثاث لغرفه منزل يجلس بهاء وحيدا على سرير غرفته يقلب في هاتفه محدثا نفسه ..
يااه الناس دي كلها بتشتمني وكرهاني كرامتي اتمسح بيها البلاط ويرمي الموبايل على السرير ويضع يديه على وجهه
صوت الأم من الخارج
يابهاء ماتعرفني فيك ايه يابني
بهاء صوته يتظاهر بالقوه انا زي الفل ياست الكل بس قاعد بدندن اغاني لشغل مع نفسي بتدرب على حاجه معينه ياماما
الأم..طيب يابني ربنا يوفقك
رنه تليفون بهاء
ايوه يامستر ناصر الحمد لله بخير.. الاغنيه كسَرت ايه يامستر بس.. دي كسرتني انا
فرح بنت مين
بس انا نفسيتي
حاضر حاضر هغني في الفرح
بكره طيب

لوحه ٦
اضاءه مبهرجه للمسرح ديكور أفراح أفراد من المعازيم جالسون يضعون كل قدم على الاخرى يجلس بجانبهم ناصر وبهاء
ناصر للرجل الذي بجانبه
تخيل يامعالي الباشا بهاء كان عاوز يختار أغانيه بنفسه فيضحكون معا
بهاء بحماس اه وده المفروض اللي يحصل بعد كده انا ربنا اداني موهبه مش عشان حد يتحكم فيها
ناصر ..ربنا خلقك من طين
بهاء ..طب ماانت من طين
ناصر ..لا انا اللي بتحكم في البني ادمين
ثم انت مين انت عشان يبقى عندك موهبه
بهاء ..حكمه ربنا
ناصر ..يعني ربنا هيميزك عليا وهو خالقني احسن منك والدليل على كده بتحكم فيك هههههههه
بهاء . مفيش حد هيتحكم فيا غير اللي خلقني
ناصر ..طب بيندهولك في المايك يلا دورك جه اطلع غني
جميع الحاضرين في الحفل بمجرد ظهور بهاء أمامهم يهتفون ويرددون القرد القرد القرد القرد
يمسك بهاء المايك وترتعش يداه ويقع مغشيا عليا
تتجه الناس ناحيه بهاء كالزومبي في برود كأنهم سوف يلتهموه
إظلام ....

لوحه ٧
سرير مستشفى يظهر عليه بهاء
ووالدته أمامه واخوته البنات على الجانب الاخر الدكتور
الوالده ..اخيرا الحمد لله يارب بعد شهر ونص تفوق يابهاء وحشتني وحشتني وتبكي
والبنات يبكون على بكاء والدتهم
بهاء.بصوت ضعيف مندهش.. شهر ونص
الدكتور ..الحمد لله الحمدلله معجزه ياحاجه والله ماشوفتها في الطب انتي ست طيبه وليكي كرامات عند ربنا
الوالده ...طب هو يقدر يروح البيت امتى يادكتور
الدكتور ..بعد اسبوع واحد بس نطمن عليه ونعمله شويه فحوصات ويقدر يغادر معاكم للبيت ان شاء الله
اخته ..يعني هو هيتحسن يادكتور
الدكتور . اكيد طبعا احنا كنا فين وبقينا فين يلا بقى ياحاجه خدي البنات وسيبي بهاء يرتاح وارتاحوا بقى لاول مره من شهر ونص ووزعي خير ع الغلابه
حاضر يابني وانا نادره ندر ان شاء الله اعمله تمشي وتردد الحمد لله الحمد لله الحمد لله

لوحه ٨ ..
يجلس بهاء على سرير غرفته يضحك مع اختيه وامه
الوالده ..هو فين مستر ناصر يابهاء
بهاء ..والله مااعرف ياماما ثم يسأل هو مجاليش خالص وانا عيان ؟
الوالده..والله يابني ماشوفته خالص
بهاء ينظر الي اخته والله مااعرف البت الهبله اللي عماله تنفخ لبان دي هتتجوز إزاي
تلكمه اخته بمزاح ويلقي عليها المخده سيبيني انام بقى ياغلسه يلا
الام ..يلا يابنات اسمعوا الكلام سيبوه يرتاح
الأخت تمزح ..ماشي بس مش هسيبك
يتركوه وحيدا ..
يمسك الفون محدثا نفسه انا لازم اكتب كل حاجه حصلت على صفحتي ويقرأ بصوت عالي امام الجماهير موضحا ماحدث له وأسماء المتورطين
اظلام
اضاءه كامله للمسرح تظهر ام بهاء مسرعه وتتجه نحو غرفته
يابهاء ايه اللي انت كاتبه ده على صفحتك وتفتح الباب وتحاول
ان توقظه يداها ترتعش تضرب فيه وتقلبه يمينا ويسارا وتصرخ بأعلى صوتها
إظلام ..
ضوء احمر
..مجموعه ١...
احنا الشياطين
المنتصرين
قال ايه بيقولوا إن الإبداع إنسان من طين
في ايدينا عجين
والقتل ده اصلا لعبتنا
والدنيا اساسا بتاعتنا
والشاطر يلقط بصماتنا من ع السكين
..مجموعه اتنين ..اضاءه بيضاء أو سماوي
واحنا المساكين
مالناش في الدنيا ومشاكلها
ولا نعرف نتغر غرورها
قوانين الغابه الوحشيه
وحقوقنا منكم هناخدها
في محاكم العدل الإلهية
وحقوقنا منكم هناخدها
في محاكم العدل الإلهيه