فادي وديع يكتب: (المولد) عن قصة الصندوق ل د/ كمال يونس

(١١)

ضريح في اعلي منتصف المسرح يقام حوله حلقات ذِكر دائرية من خمسة أفراد يمينا وخمسة أفراد يسارا ويجلس داخل كل دائرة ثلاثة أطفال يحاولون تقليد المتصوفين والإضاءة يغلب عليها اللون الاخضر مع الدخان المتصاعد ويبدأ الاستعراض علي اغنية (مدد يا دسوقي٢) شالله يا قناوي في الليلة الكبيرة انا جاي ناوي انا درويش وماشي ماشي بنور الله واللي مع ربه عمره في يوم ما تاه.
ويهم الراقصين بالخروج فيظهر الاطفال بوضوح ويخرج من خلف الضريح رجل خمسيني تدلي لحيته يرتدي جلباب متداخل الالوان وعقد به أسنان في رقبته ومعه ابنه علي شاب عشريني معه صندوق خشبي يثبته علي عصا في وسط منتصف المسرح فتضاء اضاءة المسرح كاملة
الرجل: موسي نبي عيسي نبي محمد نبي وكل من له نبي يصلي عليه قولو هييه
الاطفال: هيييييه
علي: كله يركز معايا وميتنحش لا مين مجاش ولا فين مارحش. ادفع قرشين تشوف صورتين لحكاية قديمة زمانها جديد يزيد عشرين علي الألفين
الطفل: (للرجل) عمو عمو خد قرشين اهم وريني بقا صندوق الدنيا النهاردة بيقول ايه (لا يأخذ المال)
الرجل: بيقول كلام. ما هو الكلام مش بالعلام قرب قرب جرب جرب حذر فذر حتة قصة زي السكر فيها نظام (ينظر داخل الصندوق) فيها .... (صوت إيقاع درامز مرتفع متداخل بلاك المسرح كله ويفتح سبوت اخضر علي الرجل جالس فوق الضريح وعلي جالس تحته ويفتح سبوت ابيض في اسفل يمين المسرح علي فتي وفتاة في العشرينات ديكور غرفة)
الرجل : فيها غرام
الفتي: حبيبتي من النهاردة خلاص بقينا واحد وهنفضل طول عمرنا مع بعض.
الفتاة: حبيبي انت. اصلا انا مش مصدقة أننا خلاص اتجوزنا وهصحي علي الوش الجميل ده كل يوم.
الفتي: اه يا بكاااشة طول عمرك لسانك حلو
الفتاة: انت قلبك احلي
الفتي: انت اللي حلو يا حلو ( يضحكان)
الرجل: (ينزل بجانب علي. بحزن ) القصة... فيها خصام (تتغير الاضاءة الي اللون الاصفر)
الفتي: كنتي فين لحد وش الفجر يا هانم
الفتاة: كنت عند ماما انت عارف انها تعبانة
الفتي: لا الف سلامة بس انا كلمت ماما وقالتلي انك نزلتي من بدري
الفتاة: ما انا .. ما انااا كنت بجيب طلبات للبيت وبعدين ما انت بتتاخر عليا كل يوم يعني هو انا كنت بسألك كنت فين
الفتي: انا بتاخر علشان في الشغل لكن انتي بتتاخري علشان كنتي عند حبيب القلب
الفتاة: انت مش هتبطل اللي بتشربه ده بقا. كتر الشرب لحس عقلك خلاك انت بقيت انسان شكاك جاهل ومتخلف انت ..
الفتي: (يصفع وجهها فتسقط) اخرسي بقا.
الفتاة: لا يمكن اعيش معاك تاني ابنك اللي في بطني ده ميستحقش يكون له اب زيك (ترحل)
الفتي: الباب اللي يودي. في ستين الف داهية
(تفتح بؤرة اضاءة باللون الاحمر اسفل يسار المسرح ديكور باب عمليات وكراسي انتظار امامه يجلس الفتي)
الرجل: ( يتحرك في منتصف المسرح. بألم) القصة فيها الام.
الفتي: طمني يا دكتور
الطبيب: الطفل عاش لكن المدام ...... توفت البقاء لله. (صوت إيقاع درامز)
الفتي: ماتت ازاي طب ماتت ليه انا عايز اشوفها انا بس كنت عايز اقولها اني بطلت شرب علشان خاطرها هي وابننا انا بس كنت عاوز اقولها متزعلش مني انا اسف (يبكي)
الرجل: القصة فيها ... مسجد وتوبة وإيمان
(يسمع اذان الفجر الله اكبر الله اكبر فينحني علي ركبتيه): يارب يا عالم النوايا يا غافر الذنوب اغفر لعبدك الخاطئ ذنبه ومد ايدك واتحنن عليه. يارب بارك في ابني علي هو اللي باقيلي من ريحة امه اللي ماتت زعلانة مني بحق جاه النبي اجعلها في جنتك يارب وبغلاوة سيدنا الحسن وسيدنا الحسين اجمعنا بيها علي خير في اخرتك وطبطب علي قلوبنا في دنيتك. ده انت الحنين وملناش غيرك يارب ملناش غير يارب.
علي: يابا يابا انت رحت فين خد القرشين من الولا قبل مايروح يصرفهم عند البقال يابا
الطفل: خد ياعمو ووريني بقا صندوق الدنيا بيقول ايه النهاردة. (يأخذ منه القرشين) عمو مش هتسالني بقا عن اسمي الأول زي كل مرة
الرجل: ( ينظر الي الطفل ويغني اغنية منير) لا يهمني اسمك لايهمني عنوانك لايهمني لونك ولا بلادك مكانك يهمني الانسان ولو ملوش عنوان.
الرجل وعلي يغنيان معا: تعال شوف الحكاية تعال وشوف الحكاية ودي حدوتة شعبية.