هند منصور تكتب : بنمثل بأننا مرتاحين !!

نشتكى نفس الشكوى ونئن بنفس الأنين والكل يشتكى من بعضه طب الظالم مين؟!
مَن وضع أحكام قاسية على الجميع ومحدش قادر عليها يا ظالمين؟
ومع ذلك الكل بيطلب تنفيذها طب من مين؟! ما انت مش قادر وانا مش قادر طب ليه مش قادرين ومكملين! نقهر فى بعض ونحكم على بعض ونتعب بعض واحنا كلنا ضعفاء ومقهورين! ارحموا بعض ده الله بيرحم المقهورين والمتالمين والتعبانين!
حطينا على أنفسنا أحمال كبيرة وعيشنا تحتها مكسورين! مقدرناش نحملها، فبدل ما نرميها تمسكنا بيها وطلبنا تنفيذها من الضعفاء والساقطين!
ما هو لو انت قدرت كان هو قدر انت بتفكر بدماغ مين؟
أصبحنا عايشين فى نفاق وزيف بنمثل اننا مرتاحين واننا صالحين لكن ملامحنا باين عليها تعب السنين!
ولما نضعف ونقع بسرعة نعمل إسقاط على الآخرين؛ من خوفنا لا ينكشف ضعفنا ويحكم علينا نبقى فى نظرهم مذنبين!
واهى دائرة بتلف بينا مش عارفين مين فيها صامدين ومين المكسورين!
يا ناس كفاية أحكام قاسية وقهر على الآخرين هم اصلا مطحونين!
سيبوا الخلق للخالق فهو عليهم حليم؛ لانه عارف سقطاتهم وكاشف خبايا حياتهم وقادر بيهم يكون رحيم