خلف عبدالراضى يكتب : حق انتفاع .. والله هي دى الخلاصه

الدنيا دي حق انتفاع واللي فاهم غير كده يبقى غلطان ..
كنت زمان فاكر انها ملكية، يعني عندي عربيه و عندي شقه و عندي ساعة عندي فلوس .
وبعدين اكتشفت ان كل ده حق انتفاع..
زي ايه ؟؟ زي كرسي القطر أو الطيارة ، انت بتدفع ثمن التذكرة وبتقعد على الكرسي المسافة اللي انت مسافر فيها ، وبيتهيا لك انك انت صاحب الكرسي.. ولا انت صاحبه ولا حاجة انت مجرد قاعد عليه حق انتفاع من البلد اللي انت مسافر منها للبلد اللي انت رايح لها ..
وبعد كده واحد غيرك بيدفع ثمن الكرسي ويقعد حق انتفاع بعدك..
ونفس الموضوع ينطبق على شقتك ، بتبقى كاتب عقدها باسمك ، وتقعد فيها ١٠ سنين أو ١٠٠ سنة زي ما تقعد وبعد كده الشقه دي تروح للي بعدك واللي بعدك واللي بعدك واللي بعدك وانت قاعد فيها يا دوب حق انتفاع مده وجودك على الارض..
ونفس الكلام على عربيتك .. ونفس الكلام على هدومك : تقعد لابسها وبعد كده هي تديها لحد غلبان يلبسها بعدك بعد ما اخذت منها حق انتفاعك يا اما ترميها وخلاص ..
واللي يكتشف حقيقة الدنيا يلاقيها كلها حق انتفاع..
واللي مش فاهم كده اسالوه ، ح تلاقوا خناقات ميراث وخناقات فلوس وخناقات عائلات كل ده على حاجات رايحه مش راجعه ..
اللى فاهم مبسوط ولا فارق معايا تتكتب باسمه او تتكتب باسم غيره ..ولا بيتخانق مع حد ولا بيتشاكل مع حد لانه عارف انه كده كده كلنا مسافرين من الارض للسما..
يا بخت اللي فهم حقيقة الدنيا ..
ويا بخت اللي بيحسن استخدام الأمانة اللي ربنا اديها له ..
يا بخت اللي معاه فلوس وعارف يعمل بيها ايه من خير وحب وعطاء وبدل ما يبعزقها على الحاجات اللي ما لهاش لازمه اهو بيدي اللي محتاج ويفرح الناس اللي حواليه .
تانى: يا بخت اللي عرف ان الدنيا حق انتفاع : مرتاح وفرحان ومتهني..