الكاتب الساخر طلحة البري يكتب : أموات فوق الأرض

على مقهى افتراضية أجلس مع أموات بين أحياء لأحتسى القهوة مع الشيشة، وجعصة كدابة اللى هى زى إبن أبوعرام.
وثمة غموض فى مخيلتى جعلتنى أتخيل ماأتمناه، على أحد مقاهى بلدتى بمنطقة الجامع الكبير، وبصيغة اللى مايشترى يتفرج، لازم اللى لقعد ع الجامع يحاول يجالس المعتادين.
يكون على قدر المكلمة والشيشة وشرب الشاى والقهوة واستنشاق هواء الأرجيلة والاستمتاع بأنغامها الكركرة، ياإما يهوينا ومايعملش فيها إنه من طينة غير طينتهم.
وفى الأثناء لم أرى الأحياء، وافتراضا كما نوهت جالست افتراضيا فقط أموات، من بينهم أبى وأمى فقلت لأبى حالك ؟ قال الحمد لله أنعم بالجنة، فوضع يده على كتفى قائلا : أخبار انجازاتك البلاغية إيه ؟ بتأكل عيش ؟
تركت لك مشروع مهندس مقاول فتركته مفضلا انجازاتك البلاغية الافتراضية، فقلت له سَطَوْا على انجازاتى بصنعتهم فى النجارة، وليس بحرفيتهم فى الهندسة كمصممين معماريين أو مشرفين إنشائيين
عموما أبى لاتقلق فأنا الحمد لله أعمل بوظيفتى وأيضا بمهاراتى كمصمم معمارى ومشرف إنشائى والاّش يامعدن، فرد على قائلا مايرهقك كان يرهقنى فالعديد بلا مبادئ
عموما عندما كنت حيا كانوا جميعهم أقزام يختبئون وراء أقنعتهم، واخواتك عاملين إيه ؟ رددت الحمد لله كله تمام
وعلى أحد الترابيزات المجاورة يجلس هتيفه الله الله عليك، يشاهدون ماتش كورة قدم يحترمون الرِجْل ولايحترمون العقل، وعلى مقربة يتحدث أحد النزلاء المعتادين تدخين الشيشة والسجاير والأرجيلة، قائلا لرفيقه أتمنى تغيير إقامتى للسودان أو الصومال ياجدع.
فتعجبت واستسمحته قائلا ليه ياعمنا طاب مامصر أم الدنيا وأمان والخير كتير، فرد أخينا قائلا : علشان اللحمة عندهم ببلاش وأنا بموت فى اللحمة.
وإذا بالراحل الطبيب ضياء العوضى الله يرحمه، يأتى مبتسما ليجلس بجوارى فاحتضنته وسلمت عليه وقلت له إيه يادكتور ضياء الهرتلة اللى إنت مالى بيها الميديا دى ؟ كلوا كذا وماتكلوش كذا، ياأخى دا إنت كرهتنا فى العيشة واللى عايشينها
فرد د.ضياء قائلا لو مش عاجبك غير القناة شوف حد تانى يعجبك سهلة، عاوز أسأله عن اللى حصل ليه فى الإمارات هو مات موتة طبيعية ولا مين اللى قتلة، اتلاقيت تليفونى بيرن فتحت ألو مين ؟ قالت أنا بسنت سليمان.
هار إسود إيه يابسنت اللى إنت هببتيه ده ؟ تنتحرى ليه ؟ قالت اسكت ياطلحه إنت جاى تلومنى بعد خراب مالطة، ماأنا مت خلاص، قال يعنى كلامك هيرجعنى للحياة مرة تانية، ألا قولى لى بسنت هو الموبايل اللى كنت بتصورى نفسك بيه كان محطوط أدامك على السور ولا كان حد ماسكه بيصور بالقرب منك ؟
ردت بسنت إنت عاوز توصل لإيه ياطلحه ؟ خلينى اعترف ليك إن لو رجعت للحياة مرة تانيه عمرى ماهنتحر، قول لى ياطلحه هو إنتو الأحياء بتحبوا اللت والعجن ليه ؟ يوتيوبرز عليكم ياجدع.
خلاص أنا انتحرت من هنا وكلكم أصبحتم عمالقة إعلام لبانة ياجدع، وعلى مقربة كان يجلس الشاعر نزار قبانى فدعوته للحكى فقال لى لو كنت أعلم أن الحب فى أشعاري هراء ماكنت أحببت ولا حتى كتبت، انجرفت المشاعر إلى المحاكم إلى الانتحار وعاوزنى أكتب وكاظم يغنى، أوعدك لو هانى شاكر خف وقام بالسلامة هكتب له بالندامة فى الحب.
وعلى صوت كاظم الساهر بنفس ذات المقهى " عصفورتى " عودى بسنت، وبصوت جهورى أيوا جااااى أيوه يابيه تشرب إيه طلباتك إيه ؟ قلت ليه هات شيشه معسل النخله الفاخر بالنعناع.
مفيش يابيه ... أومال عندك إيه ؟ عندى معسل النخله الفاخر تفاحتين، قلت ليه ماشى مفيش مشكلة وهات قهوة مظبوط خلينى أعصر دماغى الشوية اللى أنا قاعدهم ع الجامع.
وعدى شويتين ييجى 10 دقايق ياااااااااااااا هو اسمه إيه ؟ رد واحد من الأموات وقال هو إنت طالب إيه ؟ قلت ليه على اللى أنا طلبته، فقال اسمه أَمْكَرْ، فرد واحد تانى من الأحياء وقال هو فيه حد اسمه أمكر ؟
كده ميعاد نومى جه وعدى كمان، ياااااااااااا أمكر ماتجيب ياعم الشيشة والمعسل ماركة النخلة الفاخر، رد أمكر هو إنت يابيه لمؤاخذة بتشيش ولا جاى تشتغلنى بالليل ؟ طيب القهوة ياأمكر.
أمكر القهوة يابيه بـ 25 جنيه للنزيل الطيارى، وبـ 5 جنيه بس للزبون ابن الحتة، أجيب يابيه القهوة ؟ هات ياأمكر القهوة أم 5 جنيه، أمكر جاب قهوة كده شوية مايه لونها بنى خفيف أوى سكر بره، إيه ده ياأمكر ؟ دى قهوه ؟ والله ماجاى ليك تانى هنا.
أمكر بيبلضم مع نفسه إن شاالله ماجيت ياجدع، تقولش هاتحاسب ع القهوة بالدولار ؟ وإنت مال ... ياأمكر أطلب شيشة ولا أى طلب تانى مش أنا اللى هحاسب عليه ولا إنت ؟
أمكر برده بيبلضم مش كفاية طالب قهوة بـ 5 جنيه وكمان عاوز شيشة ومعسل مخصوص النخلة بالنعناع ؟ إنت مفكر نفسك موظف علينا.
أمكر باصص للوظيفة وحاقد علىَّ من كلامه باين وطنشنى، ماله الموظف ياأمكر مش ابن ناس وليه معاش ومستور.
ياأخى لما انا لسه فى الخدمة وبتعاملنى كده، أومال لما أوصل السن القانونية واطلع ع المعاش هتعمل معايا إيه ؟ هتعاملنى إزاى ؟
أمكر هو إنت مفكر يابيه اللى إنت بتقوله ده مع الأموات هيوصل القراء ؟ بص ياأمكر إذا كانت السخرية أفيون فأنا طلبت الشيشة والقهوة على أد اللى فى جيبى، يعنى أنا امكاناتى مرتاحة.
أمكر سمه كلمة على أد اللى فى جيبى ومات على نفسه من الضحك، بتضحك على إيه ياأمكر ؟ بضحك على كلمتك على أد اللى فى جيبى، عريان الـ …. ويحب التأميز، مش لاقي ثمن القهوة أم 25 جنيه وجاى تقول لى باب الخمارة فين ؟
إنت بس ياأمكر اللى مش عاوز تاكل عيش، هو راح فين ؟ رد أمكر مين يابيه ؟ قلت ليه د.ضياء، أمكر : هو مش مات يابيه ؟ رديت عاوز أسمعك رأى د.ضياء فى الشاى والقهوة والشيشة يمكن ربنا يكرمك ياأمكر وتقفل القهوة خالص وتطلع الأرافة كل يوم جمعة.
الحساب كام ياأمكر ؟ 30 جنيه يابيه، ليه ياأمكر هو أنت جبت الشيشة ولا جبت القهوة ؟ أمكر : تمن القاعدة يابيه، هنا ممكن تقول علينا مشفى السعادة، مفيش اكتئاب مفيش دوشة عيال ولا أمهم، مفيش مفيش ... ادفع يابيه وإنت ساكت وخلينى ساكت.
#زى مبؤلك كده