الدكتور جمال البيومي يكتب : جريمة سرقة الخرطوش

الحجر لا يكذب.
النقوش لا تجامل.
والمومياوات لا تغير أقوالها في التحقيقات.

لكن... من يقرأ الحجر قد يكذب.
ومن يترجم النقش قد يزوّر.
ومن يحكي القصة قد يسرقها.

من سنين، واحنا بنسمع جملة بتتقال بهمس، وبعدين بصوت عالي:
"المصريين القدماء مش أجدادكم".
"الحضارة دي مش بتاعتكم".
"كليوباترا كانت...".

ده اسمه الأفروسنتريك.
وهو مش رأي. هو فيروس.

فيروس لا يضرب جهازك.
بل يضرب ملف اسمه "أنا مين" في ذاكرة ولادك.

الفيروس ده أذكى من إنه يقولك حضارتك وحشة.
هو ببساطة يقولك: "حضارتك العظيمة دي... مش بتاعتك".
ياخد تمثال جدك، يحط عليه فلتر، ويعلقه في متحف سرديته الخاصة.
وبعد شوية، تصدق. وتتكسف من اسمك. وتسيب ميراثك... وتمشي.

التاريخ بيقول إيه؟
بيقول إن المصري القديم رسم نفسه على الجدران. رسم جاره النوبي، وجاره الليبي، وجاره الآسيوي. ميّز بينهم في الملامح واللون واللبس. كان شايف التنوع، وعايش معاه، ومش مكسوف منه.
فمن اللي جاي دلوقتي عايز يدهن 7000 سنة تاريخ... بلون واحد بس؟

دي جريمة مكتملة الأركان.
جريمة اسمها "سرقة السردية".
أن تصحى تلاقي قصة حياتك بتتحكي بلسان غيرك.
أن بطلك القومي بقى كومبارس في فيلم مش بتاعك.
أن يتم حذف اسمك من خرطوش التاريخ... وانت لسه عايش.

زمان كانت الحرب على الآثار.
النهاردة الحرب على "الوعي".
ساحة المعركة اتنقلت من وادي الملوك... لتايم لاين ابنك على الموبايل.

وهنا... اتولد "الأنتي فيروس الثقافي".

إحنا مش بنرد الشتيمة بشتيمة.
وإحنا مش فريق ألتراس.
إحنا المناعة.

إحنا الرد اللي بالدليل، والـ DNA، وبردية المتحف، وكتاب هيرودوت.
إحنا اللي بنرمم اللي اتشوه في عقول الولاد، قبل ما نرمم اللي اتكسر في المتاحف.

رسالتنا واضحة ومش هتتغير:
أفريقيا قارة عظيمة، ومصر هي قلبها الحضاري النابض.
لكن عظمتنا مش هتيجي من إننا نسرق تاريخ حد.
عظمتنا هتيجي لما نحمي تاريخنا، ونحترم تاريخ غيرنا.

الأفروسنتريك فيروس.
والتعصب اللي بيرد عليه فيروس تاني.
وإحنا الدوا.

مهمتنا إنك تفضل فاكر اسمك، وفخور بيه.
من غير ما تضطر تسرق اسم حد تاني عشان تحس بقيمتك.

لأن الحضارة اللي بجد... مش محتاجة تكذب عشان تبقى عظيمة.

#الأنتي_فيروس_الثقافي
#تراثنا_خط_أحمر
#اسمك_حضارة.