د. محمد هناء الدين يكتب : الجحيم مش الآخرون… الجحيم هو إنك تصدقهم

الكل ردد ورا سارترالجحيم هو الآخرون وتحولت الجملة لترند كل حد اتأذى من كلمة أو نظرة أو حكم. بس خليني أسألك سؤال بسيط لو فعلا الآخرون هم الجحيم ليه سارتر نفسه ما اعتزلش الناس؟ ليه قعد طول عمره يكتب ويحاضر ويجادل وينزل الشارع يتظاهر؟ ليه مات وهو بيحاول يغير المجتمع لو كان المجتمع كله جحيم؟

السر إننا فهمنا سارتر بالنص. هو وصف المشكلة بس الحل كان قدام عنينا وماخدناش بالنا الجحيم مش الاخرون. الجحيم هو إيمانك المطلق بكلامهم هو إنك تدي نظرتهم قيمة أكبر من نظرتك لنفسك. هو إنك تخلق جحيمك بإيدك وتقول هم اللي حطوني فيه خلينا نقلب الطاولة ونقرأ القصة من زاوية تانية خالص.
في المسرحية غارسان عايش ومات وهو عليه عار جبنة في الحرب. اناس شافته جبان وقالت له كده. طيب هو كان جبان فعلا؟ مش مهم. المهم إنه اقتنع انه جبان هو اللي سلمها المفتاح هو اللي قال في قرارة نفسه انا جبان اناس مجرد مراية. لو كان غارسان مؤمن بنفسه فعلا كانت كلمة اناس تروح في الهوا.
فكر فيها واحد غريب يكتب لك تعليق أنت فاشل تتضايق؟ طبيعي بس لو تعليق واحد بس هو اللي هز ثقتك يبقى المشكلة في الأساس مش فيه. المشكلة في الأساسات المتصدعة اللي أنت باني عليها صورتك الذاتية. إحنا بنيجي نبني بيتنا على أرض مهزوزة نلاقيه وقع بأول عاصفة نقول الريح هي اللي وحشة الريح بتعدي والأرض بقى تتصالح معاها.
إحنا اللي بنعلّق سعادتنا على شماعة القبول
النسخة السهلة من القصة بتقول الناس قاسية بتحكم بقسوة فبالتالي جحيم طب ما هو ده حال الدنيا من يومها الفرق بقى بين اللي بيتعذب واللي بيتحرر هو السؤال ده أنت مستني إيه من الناس؟
لو وجودك كله قايم على إنهم يعترفوا بيك، يبقى أنت اللي حكمت على نفسك بالعذاب الأبدي مش همه
سارتر قال جملة تانية مهمة قوي محدش بيتكلم عنها كتيرالإنسان محكوم عليه بالحريةيعني مفيش مفر من إنك حر حتى وأنت بتقول همه اللي مخلييني أعمل كده أنت اللي اخترت تخليهم يخلوك إحنا بنحب نلبس دور الضحية عشان نرتاح من عناء الاختيار. أسهل بكتير إنك تقول المجتمع بيجبرني من إنك تواجه حقيقة إنك خايف تكون نفسك.
يبقى الحل مش إنك تقفل على نفسك أوضة وتكره البشر. الحل اللي سارتر مطرحوش بشكل مباشر في المسرحية، بس عاشه في حياته هو ما أسميه البلطجة النفسية بالمقلوب يعني إيه؟

يعني تشد النظرة اللي تخليك مركز كل حاجة. بدل ما تكون موضوع في عالمهم تكون أنت المركز. مش بغرور مش بتكبر لكن ببساطة لأن الحياة اللي بجد بتبدأ لما تاخد القرار الداخلي ده أنا كفاية أنا الافضل ايه يعني نظرة الناس على بوست أنا كاتبه
سارتر نفسه رفض جايزة نوبل. نوبل أعلى اعتراف أدبي في العالم. رفضها قدام الدنيا كلها. لو كان الراجل مقتنع إن الجحيم هو الآخرون بمعنى إنه ضعيف قدامهم كان قبل الجايزة من الخوف من كلام الناس لكنه كان حر. التطرف في الحرية دي مش هروب من العالم دي مواجهة للعالم من غير ما تسيبله عنده حاجة يهددك بيها.

إنت دلوقتي قاعد على الفيس او إنستجرام أو تيك توك. بتعمل فيديو بينزل تشيك المشاهدات كل دقيقة قلبك بيدق لو وصل ألف، أنت موجود. لو وقف على مية، إنت حاجة بسيطة متعرفش إيه هي. ليه؟ لأنك سلمتهم روحك على طبق. لأنك صدقت إنهم الجحيم، مع إنك أنت اللي فاتحلهم الباب ومدفعلهم تمن النت عشان يحضروا.
جرب يوم واحد بس تعمل حاجة محدش يشوفهامتصورهاش. متكتبش عليها. افرح بيها لوحدك. متستناش تعليق. جرب تحس بوجودك بدون اعتراف خارجي. هتحس برعب في الأول رعب الحرية اللي سارتر اتكلم عنه. بس بعدها بدقيقة هييجي سلام عجيب. سلام إنك لسه موجود. وإن اللي يقدر يشطب عليك هو أنت وبس
غارسان في المسرحية قال الجحيم هو الآخرون. لكن اللي محدش بيقوله إن الباب اتفتح بعدها بدقيقة. كان ممكن يمشي. يخرج من الوجود بتاعهم. يبقى لوحده في الممر المظلم الرعب من الممر هو اللي خلقه
الحكمة المرة هنامحدش بيحبك لدرجة إنه يفكر فيك كل الوقت عشان يعذبك. الناس مشغولة بنفسها. الجحيم اللي إنت عايشه ده استوديو صغير أنت مخرجه وبطله الوحيد. لما تقفل الاستوديو وتنزل تعيش هتكتشف إن الآخرون مجرد ناس لابسين أقنعة شياطين من ورق. شيل القناع من على نفسك الأول، هتلاقي وشوشهم رجعت بشر عادية. هما مش جحيم ولا جنة. هما مجرد زحمة وأنت اللي بتدي الزحمة معنى.اختار المعنى الصح. ومتخليش راي الاخرين جحيم ليك