د.محمد هناء الدين يكتب: امسك في طوق الأمل

في زحمة الحياة وضغوطها اللي بتخنق الأنفاس وفي لحظات اليأس اللي بتدق أبواب القلب بقوة بيبقى الأمل هو طوق النجاة الوحيد اللي يخلينا نكمل المشوار. الحياة من غيره بتبقى صحرا قاحلةوأيامنا بتبقى مجرد ساعات بتعدي من غير طعم ولا لون.

الأمل مش مجرد كلمة حلوة بنرددها وقت الضيق ده شعاع نور بيخترق ظلام اليأس وبيخلينا نشوف اللي جاي بعيون مختلفة. الأمل هو اللي بيخلينا نقوم من النوم كل يوم ونسعى ونكافح هو اللي بيدينا دافع إننا نحلم ونخطط ونبني وهو اللي بيطبطب على قلوبنا وقت ما الدنيا تقفل في وشنا.

كتير مننا بيمر بلحظات بيحس فيها إن الحياة واقفة وإن المشاكل متراكمة والهموم جبال لكن اللي بيفرق بين اللي بيكمل واللي بيقف هو الأمل. اللي عنده أمل بيشوف في كل أزمة فرصة وفي كل باب بيتقفل شباك بيتفتح وفي كل تعثر درس بيتعلم منه. الأمل مش معناه إننا نهرب من الواقع لكن معناه إننا نواجهه بقلب شجاع وروح متفائلة.

الأمل مرتبط بالإيمان بالثقة في ربنا وفي حكمته وباليقين إن بعد العسر يسر وإن الليل مهما طال لازم الفجر ييجي. الأمل هو اللي خلى أيوب يصبر على البلاء وهو اللي خلى يوسف يتحمل السجن والظلم وهو اللي كان سر قوة الأنبياء والصالحين في أصعب ابتلاءاتهم.

عشان تعيش بجد لازم تمسك في طوق الأمل بإيديك وسنانك. متفكرش في اللي فات من عمرك وترثي على حالك افتح قلبك للحياة جدد نيتك غير نظرتك وابني أمل جديد. الحياة مش هتقف على مشكلة ولا خسارة ولا فراق الحياة بتمشي وبتجري واللي عايز يعيشها لازم يجري معاها.

الأمل مش ضعف ولا وهم الأمل قوة اللي عنده أمل عنده كنز حقيقي بيملك القدرة إنه يقوم من جديد يبدأ من الصفريحول أحزانه لدروس وجروحه لخبرات وفشله لسلم نجاح.

فـ امسك في طوق الأمل وارفض اليأس وقول للحياة أنا قدها أنا قادرأنا لسه فيا الروح والطموح والإرادة وما دام فيه أمل يبقى لسه فيه حياة.