رضا طلعت فهيم يكتب: كيف تخسر موظفينك الذهب

استقالة الموظف الشاطر مش مجرد ورقة بتتوقع وتمشي.
دي رسالة.
ولو الشركة ذكية، تقراها كويس قبل ما ترميها في الأرشيف.
في شركات بتتعامل مع الاستقالة كأنها نهاية العلاقة وخلاص. الموظف مشي؟
هات غيره.
بس الحقيقة إن كل موظف بيمشي بياخد معاه خبرة، تدريب، معرفة، علاقات، وفهم لتفاصيل الشغل اتبنى في سنين.
والأخطر إن سبب الاستقالة ساعات ما بيكونش شخصي زي ما بنحب نقول. ممكن يكون مفيش نمو. مفيش تقدير. مدير مباشر بيطحن الناس. أدوار مش واضحة. عدالة غايبة. أو بيئة خلت الموظف يحس إنه بيصغر كل يوم.
علشان كده نموذج الاستقالة ومقابلة الخروج مش إجراءات شكلية. دي فرصة إنقاذ.
اسأل الموظف: إيه اللي خلاك تمشي؟
إيه اللي كان ممكن يخليك تكمل؟
إيه اللي محدش كان سامعه؟
مين ساعدك؟ ومين عطلك؟
هل المشكلة فردية؟ ولا فيه نمط بيتكرر؟
الشركة اللي ما تسألش الأسئلة دي، هتفضل تخسر ناس وتفتكر إن السوق وحش. مع إن المشكلة ممكن تكون جوه البيت.
ممكن استقالة واحدة تكشف خلل في مدير.
وخمس استقالات من نفس الفريق تكشف كارثة في بيئة كاملة.
لكن لو كل استقالة اتقفلت بصمت، يبقى الشركة بتدفع تمن الغباء مرتين: مرة لما تخسر الموظف، ومرة لما ترفض تتعلم من خروجه.
خروج الموظف مش دايمًا خيانة.
أحيانًا هو آخر Feedback صادق قبل ما الباب يتقفل.
اسمعوا اللي ماشيين… يمكن يقولوا الحقيقة اللي الساكتين خايفين يقولوها.
الموظفين الاكفاء هم ثروه كبيره الأصحاب الأعمال
استثمار طويل الأجل...أموال متحركه بعقل تخدم المنشآت واصحابنا
لاتفقدوا استثمارتكم لمجرد سماع أصوات اعداء النجاح
فقدان الكفاءات يفقدكم مهارات تدريب وخدمات وتعليم وحياه كامله ...