د. محمد هناء الدين يكتب : اوعي تنضف الزريبه

اخطر كدبه ممكن تتباع للناس ان كل حاجه تمام طول ما الشكل حلو انك تلمع الواجهه وتسيب العفن مستخبي تحتها انك ترش برفان فوق ريحه بايظه وتتصرف كأن المشكله اتحلت
الحقيقه ان الزريبه مش محتاجه تنضيف سطحي الزريبه محتاجه تتقلب علي بعضها محتاجه تتفتح ويتشال منها كل اللي فيها لان اللي اتراكم مش تراب عادي ده سنين من الاهمال والتواطؤ والتعود علي الغلط
فيه ناس عايشه دور المصلح وهي في الحقيقه مجرد مبيضه وشوش بيشتغلوا علي اللقطه علي الصوره علي الانطباع لكن عمرهم ما قربوا من اصل المشكله لان اصل المشكله مرعب ومكلف ومفيش فيه مجد سريع
الزريبه لما تكبر بتبقي نظام مش حاله فرديه بتبقي قاعده ناس اتربت عليها وناس بتستفيد منها وناس شايفه ان اي تغيير خطر عليها عشان كده بيقاوموا اي حد يحاول ينضف بجد مش عايزين حل عايزين استمرار
المشكله مش في القرف اللي ظاهر المشكله في القرف اللي اتشرعن بقي ليه مبررات بقي ليه ناس بتدافع عنه وبتحاربه لو حد قرب له ساعتها التنضيف مش بس صعب ده بيبقي حرب
التنضيف الحقيقي مش مساحه وميه وصابون التنضيف الحقيقي مواجهه مع نفسك قبل اي حد انك تعترف انك ساهمت بصمتك بسكوتك بتأقلمك انك كنت جزء من المشهد حتي لو مجبر
كل ترقيع هو جريمه مؤجله كل تجميل هو كذبه مؤقته وكل هروب هو تأجيل للانفجار لان اللي بيتراكم في الضلمه بيطلع في النور بشكل ابشع
لو عايز تنضف بجد لازم تبقي مستعد تخسر لازم تبقي مستعد تهد لازم تبقي مستعد تسمع كلام يوجعك وتشوف حقايق تكسرك لكن ده تمن انك تعيش في مكان نضيف مش متجمل
اوعي تنضف الزريبه بطريقه الغش اوعي تلمعها وتسيبها زي ما هي يا اما تقلبها وتواجه يا اما تعيش فيها وتبقي جزء منها مفيش حل وسط