هند منصور تكتب: حقك عليا يا ولدي

حقك عليا يا ولدي..
أخدوا منك عيالك،
آدم وسيد ورضا ومحمد وعبده وأحمد.
ما هي مكتوبة لك..
ولا استنى يا ولدي أقولك:
يمكن يكون حادث أليم
بسبب المستهترين،
وبقالك ذكرى مريرة،
وحزن سنين فى القلب بقيالك.
حقك عليا يا ولدي،
من الألم والكسرة واللى جرى لك.
طلعوا لأكل العيش،
للشقى وجلب القوت،
ولا ليهم ولا عليهم
إلا الألم والموت.
حقك عليا يا ولدي،
ما رجع واحد فيهم
يبرد قلبك اللى انكسر،
ولا يشيل مواتيهم.
حقك عليا يا أمى..
على كسرة جبينك،
ولا قوت ولا مال يعوض أنينك.
في لحظة بلا حساب،
ضاع حصاد سنينك.
حقك عليا يا كل خاسر لضناه،
وكسرتك كبيرة،
تعيش حياتك بالآه والوجع،
والذكرى في القلب أسيرة.
آهات تجلب فيك الحنين،
وشوق ما يروح،
وحزن ساكن فى الروح،
وبقايا عمر
شايلة وجع سنينك.
حقك عليا يا شعب..
فقد الأمان
في يد من كان له الأمان والأمن،
وفي مواجهة تحديات الحياة عايش سنينك:
الجهل، والمرض، والفقد،
والقتل العمد،
والاستهانة والشر بقوا ملازمينك.
إزاي تعيش؟
إزاي تنجح وتنتج،
وعلى حياتك قلق
من اللي رايسينك؟
حقك عليا يا شعب..
على أمان غاب،
وعلى شباب العمر اللى ذهب،
وعلى مين العتاب؟
وشباب خرج لأكل العيش
فغاب.
حقك عليا يا ولدي..
وحق كل قلب انكسر،
وكل بيت استنى الغايب يرجع،
فرجع جسد والضهر انكسر .