الدكتورة هبة الله حجاج تكتب: الغربة ووحشتها القاسية على النفس

* السفر عند ناس كتير معناه الفرج، والرزق، وحياة أحسن، وفرصة ممكن تغير مستقبل الإنسان.
* لما حد يسافر الناس غالبا بتشوف الجزء الحلو بس مرتب أكبر، بلد جديدة، فرص أفضل، وحياة مختلفة لكن محدش تقريبًا بيحسب ضريبة الغربة.
* الغربة مش بس إنك تبعد عن بلدك، الغربة إنك تبعد عن أهلك، أصحابك، بيتك، وكل التفاصيل الصغيرة اللى كنت بتعتبرها عادية ومش واخد بالك من قيمتها.
* الغربة فيها وحدة وضغط ومسؤولية فيها أيام بتكون تعبان فيها ومحتاج حد جنبك، ومفيش حد وفيها مناسبات وأعياد وأوقات حلوة بتعدي عليك وأنت بعيد عن الناس اللي بتحبهم.
* ممكن تكون بتكسب فلوس أكتر، لكن في المقابل بتدفع من وقتك وراحتك وعمرك ومشاعرك والأصعب إن اللى حواليك غالبا مش شايفين غير النتيجة. يقولوا: انت محظوظ، أنت مسافر، أنت بتقبض كويس، لكن محدش شاف اللي أنت دفعته عشان توصل للنقطة دى.
* السفر مش وحش، بالعكس، ممكن يكون باب رزق كبير وبداية جديدة لكن لازم نفتكر إن مش كل حاجة بتتعوض بالفلوس.
* الفلوس ممكن تجيب بيت أحسن، عربية أحسن، ومستوى معيشة أفضل، لكن مش هتقدر تشترى وقت ضاع مع أهلك، ولا تعوضك عن لحظة كنت محتاج فيها أمك أو أبوك أو أصحابك ومكانوش جنبك.
* من أجل هذا قبل ما نحكم على حد مسافر ونفتكر إن حياته سهلة، نفتكر إننا شايفين الصورة من بعيد بس.
* الغربة ممكن تديك حاجات كتير، لكنها فى نفس الوقت ممكن تاخد منك حاجات أغلى من الفلوس.
* وفي الآخر، كل واحد له رحلته وظروفه لأن الغربة مش مجرد إنك تعيش بعيد عن بلدك لاء الغربة إنك تفتقد ناس وأماكن وأيام وأنت عارف إن الفلوس مهما زادت مش هترجعها.