د. محمد هناءالدين يكتب: كل الكلام هربان

مش لاقي كلام ودي يمكن اول مرة احس ان الجملة نفسها عاجزة عن وصف اللي جوايا زمان كنت لما اتضايق اكتب ولما افرح اكتب ولما اتخانق مع الدنيا اكتب ولما الدنيا تخنقني كنت الاقي لها مخرج في سطر او حكاية او حتى كلمة ملهاش لازمة بس كانت بتريحني دلوقتي حتى الكلام بقى ماسخ اقعد قدام الصفحة الاقي الكلام واقف على الباب ومش عايز يدخل اجيب موضوع كان زمان ممكن يولع في دماغي الاقيه دلوقتي بارد موقف كان زمان يستفزني الاقيني بعديه كاني مش شايفه حكاية كانت ممكن تخليني اكتب عشر صفحات الاقي نفسي بقول طب وبعدين يمكن المشكلة مش ان الكلام خلص يمكن اللي خلص هو الحماس اللي كان بيخلي الكلام له طعم لان الكاتب مش بيكتب بالكلمات بس الكاتب بيكتب بدهشته وغضبه وخوفه وفرحه وفضوله وبالاسئلة اللي بتزن في دماغه ومش بتسيبه ولما كل ده يهدى فجاة حتى اجمل الكلمات بتتحول لرص كلام وده يمكن اخطر من انك تكون مش عارف تكتب انك تكون عارف تكتب بس مش شايف ليه تكتب فتفتح الصفحة وتقفلها تمسك القلم وتحطه تبدأ جملة وتمسحها تقول يمكن بكرة وبكرة ييجي ومافيش حاجة وتكتشف انك مش محتاج موضوع جديد انت محتاج نفسك القديمة ترجع تسال وتندهش وتتعصب وتفرح وتختلف وتقول لا محتاج الجزء اللي كان بيشوف في تفصيلة صغيرة حكاية كاملة الجزء اللي كان ممكن يسمع جملة عابرة من شخص غريب ويقعد يفكر فيها طول الليل يمكن انا مش لاقي كلام بس يمكن الكلام موجود مستخبي تحت طبقات كتير من التعب والملل والخذلان والضوضاء وممكن كل اللي محتاجه اني ابطل اجبر نفسي على الكلام واستنى شوية لحد ما يبقى عندي حاجة حقيقية اقولها لان اسوأ حاجة ممكن يعملها كاتب انه يكتب لمجرد انه لازم يكتب فيطلع الكلام موجود لكن الروح غايبة وده اللي حاسه دلوقتي بالظبط الكلام موجود بس ملوش طعم والصفحة قدامي بيضا ومش عارف هل انا اللي مش لاقي كلام ولا الكلام هو اللي مش لاقيني ويمكن عشان كده لما رجعت ابص على اول سطر كتبته لقيتني لسه عند نفس النقطة مش لاقي كلام بس المرة دي فهمت ان الجملة دي مش معناها ان مافيش حاجة جوايا يمكن العكس تماما يمكن جوايا كلام كتير لدرجة اني مش عارف اختار منه كلمة واحدة تكون صادقة يمكن كل اللي اتكتب قبل كده كان محاولة اوصل لحاجة مش عارف اسميها حاجة لو عرفتها هكتب عنها من غير ما افكر يمكن لسه مستنيها وممكن ما تيجيش بكرة وممكن تاخد وقت طويل وممكن افتح الصفحة بعد ايام والاقي نفسي برضه مش لاقي كلام بس يمكن في يوم من الايام تحصل حاجة صغيرة جدا جملة اسمعها وش اشوفه خبر يهزني ذكرى ترجع فجاة او حتى لحظة عابرة تخليني احس تاني وساعتها يمكن اقعد قدام نفس الصفحة واكتب مش عشان عندي كلام لكن عشان بقى عندي شيء يستحق ان يتقال ولحد ما اليوم ده ييجي هسيب الصفحة زي ما هي بيضا مش هعتبرها فشل ولا هعتبر الصمت هزيمة هسيبها شاهدة على الفترة اللي كنت فيها بدور على نفسي وسط كل الكلام لان يمكن اصعب حاجة على الكاتب مش انه ما يلاقيش كلام اصعب حاجة انه يلاقي نفسه مش لاقي نفسه وعشان كده لو سالتني دلوقتي عندك ايه تقوله هقول لك نفس اللي بدأت بيه مش لاقي كلام بس المرة دي انا عارف ان الكلام مش هو اللي ضاع انا بس لسه بدور على الصوت اللي يستاهل يسمعه