السبت 4 ديسمبر 2021 01:39 مـ
الجارديان المصرية

رئيس مجلس الإدارة ورئيس التحرير عبد النبى عبد الستار

مقالات

#بلا_هوية

الدكتورة مارى جرجس رمزى تكتب : (حوار مع حمار) 7

الدكتورة مارى جرجس رمزى
الدكتورة مارى جرجس رمزى

وقام الثعلب_ المتحول ظاهرياً إلى حمار بعمليه تجميل_ وراسه بتلف من اللي شافه بعنيه وسمعه بودانه ولقى مكان فاضي جنب فرشة قاعد عليها حمارين صوتهم عالي شوية فمد رجله ورمى ودن من بعيد وسمع الحوار الآتي :

× حمار ١
إحنا تعبنا م القرف اللي اتكتب علينا ده
المملكة بتضييع .... لا علم ولا أخلاق!! 0
تبقى فلوسك ف جيبك وتقدر تشتري نجمة م السما لكن وقت الجد والزنقة وعند أهم حاجة وهي صحة البني حمير تلاقي فلوسك متعملكش حاجة والغالي عليك يروح منك قدام عنيك

+ حمار ٢
ربنا يصبر قلبك يا باشا والله الموضوع عدي عليه أكتر من سنة بس المرحوم والدك كان غالي ع الكل والله
حتى ف عز الفرح سيرته حاضرة....
ياللا.. كلنا لها

× ماشي يا غالي مقولناش حاجة.. كلنا لها واللي ما يموت منين يفوت.. أنا مؤمن بكل ده وكل اللي بيحصل بيكون مجرد أسباب لكن ده ميعاد و مكتوب
بس ميرضيش ربنا أبداً المستوى اللي وصلناله ده!
يعني يرضيك التشخيص الغلط يكون سبب ف موت أبويا ... يعني لو اللي كشف عليه كان فاهم السبب الحقيقي من تعبه مش كان ممكن نلحقه ويبقى فيه أمل إنه يعيش شوية كمان؟!...
أبويا كان عنده نزيف داخلي وقعدنا يومين نعالج فيه على إنه التهاب
ف الجلد ووهو بينا ع ويطلع ف الروح الدكتور بتاع العناية قالنا انه بقالوا يومين بينزف من جوه وخلاص الله يرحمه يرضى مين ده؟؟!!

+ استغفر ربنا يا حبيبي واهدا مش هيغلا ع اللي خلقه قولي بقى أخبار وريث العهد إبنك إيه؟
السنادي ف سنة كام كده؟

× الإعدادية

+ بسم الله ما شاء الله تشوفه دكتور أد الدنيا

×ادعيلي.. ابن الحمار مطلع عيني
طالع متدلع ومش بيحب المذاكرة
مع إني موديه أشهر مدرسة ف المملكة
سمعت عنها؟
إنترناشيونال ميكسد سكول فور دونكيز

+يا ماشاء الله اللي هي المدرسة الدولية المشتركة للبهايم صح؟

× الله ينور.. هي
والواد هناك متظبط ع الآخر والمدرسين بيحبوه قوي

+ ماهو برضو الواد مش أى حد يا برنس البهايم

× آه ... بس شماطين ع الآخر بس أهو ما بين الدروس الخصوصية والمجاملات مع الحبايب بيطلع م العشرة الأوائل

+ مش بقولك يا كبير دكتور والنعمة دكتور وسيد الدكاتير

× يسمع من بوزك ربنا.. أدينا بنعمل كل اللي نقدر عليه عشان نشوفهم أحسن بهايم ف الدنيا ويرفعوا راسنا كده...
إحنا صحيح عملناهم رزم رزم بس كان ناقصنا برضو الشهايد وعلشان كده الفلوس وكل حاجة تحت رجليهم بس يجيبوا اللي اتحرمنا إحنا منه...

وفجأة.. اتنفض الثعلب_ المتحول ظاهرياً إلى حمار بعمليه تجميل_ من مكانه ووقف قدام الحمارين وقال:

# معلش يا باشحمار انت وهو... أنا كنت قاعد ف ريحكم هنا ومتأخذونيش صوتكم كان عالي قوي وغصب عني سمعت حواركم

× عادي يعني مش مستاهلة تيجي لحد هنا وتقولنا... إحنا مكناش بنقول أسرار حربية يعني!!

# عارف يا باشا بس معلش أنا عندي سؤال صغير ملخبطني لو تسمحلي أسأله

× قول فيه إيه؟

# هو مش معاليك أبوك مات بسبب دكتور علي أده ف العلم؟

× فعلاً.. منه لله بقي

# طيب ما حضرتك بتعمل نفس المصيبة مع ابنك وانت مش واخد بالك!!

× تقصد إيه؟

# أقصد انك بتشتريله شهادة بالفلوس والدلع والدروس الخصوصية والتظبيط... وياريت شهادة ع أده وأد مستوى دماغه ومذاكرته لا دانت بتخليه يطلع م الأوائل كمان!!
ده لما يدخل كلية مهمة بالزق والتظبيط ويبقى تحت إيده أرواح حمير هيكرر نفس المصيبة اللي حصلت مع أبوك

+ انت اتجننت يا بهيم انت!!
انت ازاي تتجرأ وتكلم الكبير كده!؟!!

# أنا مالي ومال كبير وصغير!!
دلوقت مش اللي بقوله ده صح واللا غلط؟!

+ والاااااا... انت عارف لو متبخرتش ف ثواني من وشنا هنعمل فيك إيه
ورحمة ابو الكبير اللي مات ع إيد دكتور متخرج من معهد البالية المائي لنخلي وشك سوا الأسفلت ونعمل معاك الجلاشة الصح

# وعلي إيه... أنا ماشي من غير قلة قيمة
ده هي باينها ايام سودة واتكتبت ع الواحد

× يتقول حاجة يا عرة البهايم؟

# لا يا كبير... بقولك تفرح بالبهيم الصغير وتشوفه واخد جايزة أوبل بإذن اللي خد روح أبوك من غير مناسبة

وف لمح البصر طار الثعلب وزاغ من جوز البهايم ودخل من مدخل صغير في الفرح و لقى حمير كتير قاعدين بيغنوا ويضحكوا وياكلوا ووصل لركنة فاضية قعد فيها وبعد شوية صغيرين شاف بهيمتين وزن الواحدة فيهم ميقلش عن نص طن كل واحدة لابسة 3 كيلو دهب ع الاقل وعاملة ف روحها البدع

بهيمة ١
بعد ازنك ياسمك إيه اسمحلنا نقعد أنا وصاحبتي ف ركنتك أحسن الفرح مفهوش مكان لرجل حمار وإحنا مفيناش نفس لا نمشي ولا نقف

اتفضلوا طبعا...
يتبع الخميس القادم بإذن الله