الجمعة 29 مارس 2024 08:15 صـ
الجارديان المصرية

رئيس مجلس الإدارة ورئيس التحرير عبد النبى عبد الستار

مقالات

#بلا_هوية

الدكتورة ماري جرجس رمزي تكتب : (حوار مع حمار) ...الحلقة 13 والأخيرة

الدكتورة مارى جرجس رمزى
الدكتورة مارى جرجس رمزى

وبعد بضع ساعات كان الثعلب في بلاط صاحب الجلالة الأسد ملك الغابة

# حمدالله علي سلامتك يا مستشاري الأمين أتمني تكون راجع لينا بخبر يسر أو ع الأقل يطمنا علي مصير ومستقبل غابتنا الغالية

××الله يسلم معاليكم جلالة الملك اسمحلي أقول بكل حزن إن الأخبار متسرش علي الاطلاق

#تقصد إيه؟!
بعد كل اللي عملناه ملقتش في مملكة الحمير حد ينفع يشيل الراية ويكمل المسيرة وينقذ غابتنا الشاسعة العريقة وتاريخها من الفناء

××شوف معاليك لو علي الحياة نفسها والتزاوج والتكاثر فيه وبالهبل لكن للأسف بلا قيمة
يا سمو الملك مملكة الحمير منتهية الصلاحية تمامًا
كل معايير المنطق والعقل والأصول ملهاش وجود أصلًا
دول حرفيًا مكملين بالقصور الذاتي أرواح مريضة داخل أجساد فاسدة تفتقد لرزانة العقل والمنطق وحتي العلم السليم
كارثة كونية متكاملة الأركان محتومة الفناء حتي وهما عايشين

#وضح اكتر لو سمحت

××معاليك تتخيل إن أكبر إنجاز عندهم هو اللي الحيوانات بتعمله ليل نهار في أي سلالة عندنا من غير دوشة ولا صوت

#إيه أكبر إنجاز عندهم ده ؟

××الجواز والخلفة
من كتر الإفلاس في كل شئ حولوا التزاوج والخلفة اللي الحشرات بتقوم بيه الي عمل مجيد مبهر
هو ده انجازهم الوحيد.....

#بس كده
طيب يمكن نوع النسل كويس

××السلالة أساسًا ضايعة من يوم مااتخلقوا وكمان بقت ف النازل معاليك
غباء وهبل وسطحية حتي الشهادات بقت بالفلوس والزق والكل ضايع ف كل التخصصات وعلي كافة الأصعدة

#طيب يمكن معندهومش حاجة ولا قيمة فعلية ف الحياة ولا طموح ف بيدوروا ع الونس والخلفة

××اكبر نسبة طلاق عندهم يا مولاي وف كل الملل والأديان اللي هناك والبيوت المقفولة أغلبها بايظة شكل من برة وشوية صور عبيطة مصدرينها لبعض بس بالباطل والنسل بيطلع ضايع ومش متربي لأن الأهل أصلًا محدش رباهم

#يعني كده تقصد إن ...خلاص هنسيب الغابة تنتهي ....تنقرض .....
حتي البهايم اللي مش بيأثر فيهم الوبا اللي عمال يبيد ف كل السلالات النضيفة طلعوا ضايعين

××يا ملك الغابة السرعة اللي الغابة هتنقرض بيها لو خلينا سلالة الحمير تمسك مواقع قيادية هتكون أعلي بمراحل من قضاء الله لو اتصابنا كلنا وانتهينا ومتنا
نعيش الشوية الباقية لينا بكرامة وشرف وعزة ونحافظ علي تراثنا وأصولنا ومبادئنا والتربية والعلم اللي بيميزنا ورجاحة العقل والحكمة
يا سيدي الملك دول مصبوب عليهم غضب الهي متجدد مع كل طلعة شمس

#يعني خلاص مفيش اي حل تاني
ننتظر قدرنا المحتوم
كل يوم مئات من كل سلالة نضيفة بتموت واللي بيموت مبيجيش بداله واحنا واقفين مش عارفين نعمل حاجة
تاريخنا المجيد وعظمة اجدادنا ونسلنا العبقري ينتهي كده ف لمح البصر وكأن حضارة ملايين السنين اللي فاتت كانت حلم

××عاجلا" أم آجلا" الموت محتوم

#لكن فيه أجيال بتكمل

××تكمل مسيرة النجاح...مش تكمل علي اللي باقي من النجاح

#ليك حق يا مستشاري الأمين
نموت ملوك بكرامة أحسن ما نموت علي ايد بهايم

××صدقني يا جلالة الملك هنموت علي ايدهم أسرع من الوباء
دول ف حتة بعيدة خالص وقاطعين دماغهم وعلشان كده ملمومين علي بعض وقافلين علي نفسهم ومطلعين ميتين أهل بعض
مينفعش.... لا يختلط الزيت بالماء

#قررنا نحن ملك الغابة بقاء الحال علي ما هو عليه مع مواصلة الأبحاث العلمية بأقصى درجاتها وسرعتها عسي نجد علاج لهذا الفيروس القاتل
لكن لن نخضع أبدًا لكائنات الحياة بينها أشد خطورة من الموت
وهذا قرار نهائي مني
فحتي لو مات معشر الملوك والحكماء وأصحاب العلم ورقصت علي جثثهم البهائم ستبقي الملوك ملوك والبهائم بهائم
انتهي الاجتماع

تمت...