حسين فهمي : سعيد بنجاح مهرجان القاهرة السينمائي

أعرب الفنان حسين فهمي، رئيس مهرجان القاهرة السينمائي الدولي، عن فرحته بنجاح الدورة الـ 44 من المهرجان، مؤكدًا أنه أثر على إثبات قدرته على التفوق على التوقعات المنتظرة للدورة.

وقال حسين فهمي، خلال تصريحات تلفزيونية، على هامش فعاليات حفل ختام مهرجان القاهرة السينمائي بدورته الـ 44: أنا سعيد جدًا بالفترة اللي فاتت وإقبال الجمهور، كانت نسبة مشاهدة عالية جدًا وأنا متابع والحقيقة الأرقام رائعة جدًا، وعندنا دور عرض في كل مكان وكلها أنشطة مختلفة.

وتابع: كان عندنا ندوات وسعيد بالنشاط ده، ورممنا فيلمين من أهم الأفلام في تاريخنا، كان عندنا زخم كبير في الأفلام، إحنا عدينا الـ 100 فيلم من أكتر من 50 دولة وعندنا لجنة تحكيم قوية جدًا وقيمة جدًا، فالحمد لله النشاط كان متميز جدًا.

وعن الأهداف التي وضعها الفنان حسين فهمي، لتحقيقها خلال الدورة الـ 44 من المهرجان، علق قائلًا: أنا كان يهمني جدًا الطلاب إنهم يكونوا متواجدين في المهرجان، وكل محبي السينما من جميع المجالات كانوا متواجدين بشدة، وكنا بندي جوائز لـ الأفلام القصيرة ودي أفلام بيعملوها الشباب نجحت نجاح كبير جدًا، في منهم خد جوائز يقدروا يكملوا أفلامهم لو كان فيه تعثر في الإنتاج يكمل الفليم، ودي كلها أهداف واتحقق منها نسبة كبيرة جدًا الحمد لله.

وأضاف: إحنا لسة هنعمل تقييم ونشوف إيه النقاط اللي قدرنا نحققها وإيه النقاط اللي كنا ضعاف فيها، وهقدم لـ اللجان بتاعتي وكل قسم هيقيم القائمة دي وهنكمل عليها ونبني.

كما تحدث الفنان حسين فهمي، عن التحديات التي واجهته في رئاسة الدورة الـ44 من مهرجان القاهرة السينمائي، قائلًا: لو مفيش تحدي الموضوع مش هيبقى ليه طعم، لازم يبقى فيه تحدي ونعدي التحدي ده، والتحديات كانت كبيرة مفيش شك، ولكن قدرنا نتجازو معظمها وإحنا بنشتغل.

وشدد الفنان حسين فهمي، على إصراره على إثبات قدرته على تحقيق التوقعات، موضحًا: الدورة 44 من المهرجان بـ رئاستي أنا بالذات كان فيها توقعات كتير أوي، وعارف إن كان فيه توقعات وكنت عايز أثبت إني قادر على الوصول لهذه التوقعات المطلوبة، وأرجوا إني أكون حققت كده، فأنا شايف إني إذا كنت وصلت لـ 80% منها فأنا سعيد بيها، ولكن أنا شايف إن الناس مبسوطة، وكمان وصلني إن ردود الأفعال من خارج مصر هايلة جدًا.

أما عن دعمه لـ أبطال الأولومبياد الخاصة، خلال مهرجان القاهرة السينمائي، فعلق قائلًا: أنا سفير دولي بـ الأولومبياد الخاصة بقالي 14 سنة، ويهمني جدًا إنهم يظهروا للمجتمع لأنهم أبطال وكلهم واخدين جوائز، ده لازم يظهر للمجتمع ولازم ندمجهم في المجتمع لأنهم جزء مهم منه ولازم يبقى ليهم مكانة، وأنا حققت ده بنسبة عالية جدًا، وكمان في المهرجان 4 كراسي متحركة للمحتاجين إنهم يتنقلوا في أروقة المهرجان.