الفلاح الفصيح الشاعر معوض حلمي يكتب : الحكمه ميزان

الحكمه الكيف ، اللي تكيف
مالهاش تصريف
ولاتقدر تلزق في نافوخي
غير بالمعاناه
والجرح النازف بالآه
بيجيبها دواير
ويكون ف الرحلة نجاه
ولذلك أنا قررت أدوس ع الشوك
وأجرب هذا النزف
اللي بيقولوا بيهد الروح
وأروح ع السكه اللي يروحها
بيحس جروح ، وألـم وعذاب
كداب اللي يقولك عارف
من غير مايجرب
ودا عاشها فاشوش
كداب اللي يقولك قرب للورد
اللي انت ماتعرفهوش
فاوعاك تتغر بلونه وريحته
وتمد إيديك تتلط
وأجمل ملكات الورد
بتطلع من سجر السنط
والصمت ساعات بينجي
الواد الخايف من صوت الريح
والمطره اللي بترعب شبابيك الدار
هياها نفس المطره اللي بتنزل
وتبوس الأرض
فتفرح ويطلع من طينها خضار
الروح أسرار
في مدار الكون بتحوم حوالينا
حاسسها في سجر الغيط
والأمل النابت م الأحلام
فاكرين النمله الل اتحبست
مع حبة غله لمدة عام
صامت يوم ، وأكلت يوم
سألوها ليه وازاي
قالت انا عارفه إن الإنسان نساي
فقلت أوفر من عامي المحكوم
للعام الجاي
النمله الشكه ف عقل السجان
خلت في حياتها الحكمه ميزان
وانا عايش رحال بين الحكايات
وكتب مليانه عبر وآيات
وماشوفتش أجهل م الإنسان
طماع وعجول ، دايما مكروب
عايش ف صراع ونزاع وحروب
من اول نزغ ، من بدء التكوين
إبليس أقسم يغوي البني آدمين
والدرس اللي بناخده بننساه
من أول آدم والسجرة
وقابيل وهابيل
لمدابح غزه وأوكرانيا
وجروحنا المفتوحه بتنزف آه
والحكمه دي رزق
الحكمه دي رزق
وانا عايش بس عشان اتعلم
وسايب رزقي على الله
............................................
بقلمي معوض حلمي الفلاح الفصيح
منشأة بطاش تمي الأمـديد دقهلية