مسرحية (الصندوق) للكاتب البورسعيدي محمد خلف عن قصة (الصندوق) ل د. كمال يونس

المسرح فارغ تماما، مظلم تماما، يرتفع صوت طرقات، يتوقف الصوت، يرتفع صوت ارتطام جسم بأرض صلبة، تضاء بؤرة في وسط المسرح، يظهر في وسطها صندوق مقفول، تضاء بؤرة في عمق المسرح يظهر بداخلها شخص في وضع الجنين، يتحرك حركات عصبية كأنه مقيد بقيود غير ظاهرة، يفرد جسمه، يشد يديه ورجليه، يجلس ببطء، يمسك برأسه
الشخص: ايه الصداع دا.. خبط خبط خبط.. دماغي هتفرقع.
ينهض بتثاقل ويتحرك في المسرح وهو يدندن
جالي الصداع جاني
في الراس وبكاني
جاني من غير مواعيد
وازاي يروح تاني
اااااه.. كأن في ماتش كورة بيتلعب جوة.. طب اعد كده واحاول اهدا.. يمكن يخف شوية.
يجلس في مكان عشوائي ويمسك برأسه
صوت: مش هيهدا.
ينتفض في مكانه وهو يبحث عن مصدر الصوت.
الشخص: انت مين؟
صوت: مين.. ايه.. امتى.. ازاي.. وليه.
ينهض الشخص وهو يتلفت حوله بخوف
الشخص: انا بسال انت مين.. مش بسال عن ادوات الاستفهام.
صوت: مين.. ناس كتير.. ايه.. حاجات كتير.. امتى.. من يوم ما شفت الدنيا.. إزاي.. بطرق مختلفة.. وليه.. هو دا السؤال.
يتوقف الشخص في مكانه ويحك رأسه بارتباك.
الشخص: مش فاهم.
صوت: فاهم.. بس مش عاوز تفهم.. عارف.. بس مش عاوز تعرف.
الشخص (بغضب): هغفل نفسي يعني؟
صوت: متزعقش.
الشخص (بخوف): حاااضر.. انا اسف.
صوت: متأكد؟
الشخص: متأكد من إيه؟
صوت: انك اسف.
الشخص (بسرعة): طبعا.
صوت: مكنتش جيت لك.
الشخص (بخوف): هو في ايه؟
صوت: مقدرش اقول لك خير.
الشخص: يا لهوي.
صوت: ولا شر.
الشخص: طب ما حلو دا.
صوت: مش شرط.
الشخص: متسوحنيش.
صوت: انت الي سوحت نفسك.
الشخص: انا؟ امتى؟
صوت: منا قلتلك فوق.
يتحرك الشخص في المسرح ويطوح يده وهو يتحدث بغضب
الشخص (بغضب): يووووه.. انا زهقت.. انت هاوز ايه.. بقلك ايه.. انا مش خايف منك.. وانت ولا تعرف تعمل حاجة.
تضيء بؤرة حيث ظهر الشخص في البداية، يقف في وسطها رجل يرتدي ملابس سوداء بالكامل وغطاء رأس أسود، يرفعه عن رأسه فيظهر وجهه.
الرجل: بجد؟
الشخص: ايه دا؟ انت طلعت منين؟
الرجل: من زمان.
الشخص: بقول منين.. مش امتى.
الرجل: الزمن مكان.. طريق.. بنبدأ من محطة عليه.. وبنفضل نعدي في محطات.. لحد ما نوصل.
الشخص (بريبة): نوصل فين؟
الرجل: ما انت عارف.
الشخص: لا انت اكيد متقصدش...
الرجل: هو بعينه.
الشخص: لا يا عم بعد الشر عليا.
الرجل: شر.. خير.. كلها وجهات نظر.. مسالة نسبية بحتة.
الشخص: انت طلعتلي منين.
الرجل: من الصندوق.
الشخص: صندوق ايه؟
يشير الرجل للصندوق الموجود من بداية العرض.
الرجل: الصندوق دا.. عارفه؟
الشخص: ها؟ لا.. لا مش عارفه.
الرجل: لا ركز كده.. بص له تاني.
الشخص: لا.. مش عاوز ابص له.
الرجل: بس لازم تشوفه.
الشخص: ليه؟
الرجل: عشان جواه صورتك الحقيقية.
الشخص: لا يا عم.. لما تحب اشوف صورتي هاخد سيلفي.
الرجل: صورتك جوه الصندوق 8k
الشخص: كام جيجا رام.
الرجل: اد سنك بالظبط.
الشخص: والموديل؟
الرجل: نفس اسمك.
الشخص: دي حدوتة تخوف.
الرجل: يبقى انت عارف الي جوه الصندوق.
الشخص (مواجها): اه عارف.. ارتحت؟
الرجل: انا هنا عشان انت الي ترتاح.
الشخص: انا مرتاح.
(يدوران امام بعضهما وهما متواجهين)
الرجل: انت كذاب.
الشخص: بقلك مرتاح.
الرجل: اتحداك.
الشخص: هتخسر.
الرجل: تراهن؟
الشخص: على ايه؟
الرجل: عمرك.
الشخص (يتوقف ويتحرك للامام): لا
الرجل (يقف خلفه من اليمين): ليه؟
الشخص (يجلس على الارض): هخسر.
الرجل (يقف خلفه مباشرة): قلتلك.
الشخص (ينظر لأعلى ليرى الرجل): تفتكر.. هرتاح؟
الرجل: اكيد.
الشخص (يقف ويبتعد عن الرجل لجهة اليسار): مين يضمنلي.. مش يمكن بتشتغلني.
الرجل (يتجه لليمين): مفيش ضمانات.. الشيء الأكيد الوحيد.. انك لازم تفتح الصندوق.
الشخص (ينظر إليه): مش هفتحه.
الرجل: انت حر.
الشخص: ايوة.. انا حر.
الرجل: انت جبان.
الشخص: لا مش جبان.
الرجل: وكذاب كمان.
الشخص: بس مش جبان.
الرجل: لما تعترف انك كذاب.. تفتكر ممكن اصدقك؟
الشخص: ايه؟!
الرجل: عموما انا مش محتاج اصدقك.. لاني عارف الي جواك.
الشخص: ايه؟
الرجل: خوف كبير.
الشخص: من ايه؟
الرجل: من الي فات.. من الي جاي.. من نفسك.
الشخص: من نفسي؟ ليه؟
الرجل: ما انا قلتلك.. هو دا السؤال.
الشخص (يقترب بضع خطوات): طب انا هفتحه.. بس اوعدني ان مش هيجرالي حاجة.
الرجل: مقدرش
الشخص: هو خطر؟
الرجل: انت ادرى بالي جواه.
الشخص: هيئذيني.
الرجل: دا واقف على قوتك.
الشخص: قوتي؟
الرجل: وقدرتك على انك تواجه نفسك.
الشخص: مفتكرش اني هقدر.
الرجل: قلتلك جبان.
الشخص: من خاف سلم.
الرجل: ندم.
الشخص: على ايه.
الرجل: على الي فاته ومشافوش.
الشخص: مش فايتني كتير.
الرجل: مين قال لك؟
الشخص: انا.
الرجل: جاهل.
الشخص: الله.. ما تحترم نفسك بقى.
الرجل: دي صفات.. مش شتايم.
الشخص: صفات منيلة.
الرجل: دا جزء من الي في الصندوق.
الشخص: لا.. انا احسن من كده بكتير.
الرجل: مين قال؟
الشخص: انا الي بقول.
الرجل: مغرور.
الشخص: يوووووه.. انا زهقت منك.
الرجل: انت زهقت من نفسك.. انا هنا عشان انت الي جبتني هنا.. عشان انت محتاجني هنا.. عشان من غيري مش هتفتح الصندوق.
الشخص: يادي الصندوق.
الرجل: انت عارف الي جواه.. مش محتاج تفتحه عشان تعرفه.. محتاج تفتحه عشان تشوفه بعينك وتواجهه.
الشخص: قلتلك مش عايز.
الرجل: وانا قلتلك لو مش عاوز مكناش هنبقى بنتكلم دلوقت.. انا هنا عشان انت عايز.
الشخص: طب ما انا عارف الي فيه.. وحافظه صم.. افتحه ليه.
الرجل: عشان متجاهله بقالك سنين.. اتعودت تحط فيه من غير ما تبص وصل لفين.
الشخص: مفتكرش فيه كتير.
الرجل: لازم تفتحه عشان تشوف.
الشخص: انت بتشتغلني.. صح؟ المفروض انا اسخن دلوقت واقلك اه تعال نشوف.. بعينك.
الرجل: قلتلك من الاول.. انت حر.
الشخص: بالظبط.. يلا بقى هوينا.. مش بتقول انك هنا عشان انا عاوزك؟ اتفضل يلا مستغنيين عن خدماتك.. واقفل الباب وراك.
الرجل: مش بالسهولة دي.
الشخص: مش انا حر؟
الرجل: في الطريق.
الشخص: في كل حاجة.
الرجل: محطاتك مكتوبة.. الي انت حر فيه.. هتروح لها ازاي.
الشخص: ايه؟
الرجل: انت فاهم.. بس مش عاوز تفهم.. عارف.. بس مش عاوز تعرف.
الشخص: انا عايش ومش عايش وقادر على بعدك عادي.. اتفضل بقى.
الرجل (يجلس): شكرا.
الشخص: بقلك اتفضل امشي.
الرجل: لا.
الشخص (بغضب): عارف ايه الي مخليني مش عاوز اشتمك دلوقت؟
الرجل: ايه؟
الشخص (بخوف): خايف.
الرجل: عارف.. قلتلك انك جبان.
الشخص: وقلتلك من خاف سلم.
الرجل: وقلتلك.. ندم.
الشخص: طيب انا لو فتحت الصندوق.. هتمشي؟
الرجل: اه.
الشخص: احلف.
الرجل: من غير ما احلف.. مجرد ما تفتح الصندوق.. هختفي.
الشخص(يقترب من الصندوق ببطء): وعد؟
الرجل: وعد.
يمسك الشخص بالصندوق، يحمله بين يديه ويحاول فتحه، مؤثر صرير باب، تنفطئ الإضاءة ويبدا وميض مع دخان، تبدا موسيقى مع عودة إضاءة مناسبة لاستعراض على اغنية.
بسم الخطايا والرزايا والمحن
بسم الدعا من كل واحد وانظلم
بسم الي عاش طول عمره طايح ف البشر
خان او غدر ومعترفش بكل ما عنده من نعم