الكاتب والشاعر أحمد عطوة يكتب : مسرحية ارتباك عن قصة الدجال للدكتور كمال يونس

يفتح الستار في حالة اظلام المسرح

صوت
لا تصمت ابدا
ان الصمت جهاله
واحذر ان تتكلم في الموضوع
لا موضوع هنالك
ان الفلك اليوم عطاره
كن فيهم خضر العطار

تفتح الاضاءه علي يسار المسرح لقاء تليفزيوني
المذيع / سيداتي انساتي سادتي معنا ومعكم اليوم الناقد الفني محمود الاخشيدي مرحبا بك استاذ محمود
محمود / اهلا بحضرتك والساده لمشاهدين
المذيع / مارايك في الحركه النقديه المصريه
محمود / في الواقع الحركه النقديه المصريه حركه
كادر ثبات ثم اظلام

تفتح الاضاءه علي يمين المسرح
لمجموعه من الاشخاص علي مقهي صغير بقريه صغيره
شخص /الحركه بركه والرزق يحب الخفيه طول ماانت قاعد حاطط ايدك علي خدك مفيش حل
شخص 2/ طب ماهو علي يدك هو انا مخلي علي جهدي جهد من بعد ما اللي حصل حصل وانا داير بيها ع الحكما ولا عارف اعزق الارض ولا حتى اواليها
شخص3/ طب ماتشوفلها شيخ
شخص2/ شخشخو ركبك ياولا هي اي ملبوسه
شخص3/ مش يمكن
شخص 1/ انا عارف راح فين بس
شخص 2 مين ده ياولا
شخص 1/ مولانا حموده لو كنا نعرفله طريق كان هو اللي حلها وعرف جماعتك نابها ايه ده كان راجل بركه

بلاك

تفتح الاضاءه في عمق المسرح
علي مجموعه من السيدات يجلسن امام تلفاز يتناولون اطراف الحديث
سيده1 / فاكره يابت
سيده 2/ فاكره حسره علينا قبل العيال والطبيخ والغسيل والبيت
سيده 1.مفيش حلاوه من غير نار
اهي النار قادت وولعت فينا وفي سنينا السوده
يضحكون
سيده 3 تنظر الي التلفاز / والنبي هو
سيده 1 / هو مين
سيده 3/ الشيخ حموده يابت
سيده 2/ لا يابت يمكن شبهه
سيده 1/ لا هو يابت
سيده 2/ هوه بس ده اتلمع واتنجر وبقا اخر الاجه
سيده 3 / فاكره يابت لما رحناله عشان يعملك زار يطلع البلا الازرق من علي جتتك

بلاك

صوت
قل في الواقع.
واصمت برهه
قل لاشك
واصمت برهه
ثم مقدمة محفوظه
حسب المنهج
حسب الموجه والتيار

يفتح الاضاءه علي يسار المسرح
محمود / لابد من النص ان يتسم بالموضوعيه العبثيه ولابد ان ينصهر الكاتب المسرحي مع الحدث ويسرع من ايقاع الشخصيات ويلعب علي التيمه وان لا يغفل الميتا تياتر

بلاك
تفتح الاضاءه علي مجموعه من السيدات يقف بينهم الشيخ حوده بجلبابه وسبحته يقود حلقة الزار

مينا تياتر ياميتا تياتر
زيح الغمه وفك الستر
سيدنا بريخت يابيضه بريشت
وهندبحلك فرخه بكشك
وهنطبخلك وهنقليلك
ونخلي رغيفنا بالمتر
ميتا تياتر ياميتا تياتر
ميتا تياتر الله يخليك
وافاناسك زايد معاليك
كواليسك نحشيها فريك
اصرف عفاريتك عند الفجر
ميتا تياتر ياميتا تياتر
صرخه

بلاك

تفتح الاضاءه علي الجانب الاخر اللقاء التليفزيوني
المذيع / دلوقتي احنا هنفتح مكالمات للى عنده استقسارات من الجمهور والرقم موجود ع الشاشه
ومعانا اول اتصال
مساء الخير
(حركة اللقاء تليفزيوني تستمر ولكن بدون صوت)

علي المقهي
شخص 2/ماتيجي نكلمه
شخص 1/نقوله ايه يعني
شخص 3/ اهو ييجي يشوفلك حل في جماعتك
شخص 1/ ياعم مش هو
شخص 2/ والنبي هو بحسنته اللي فوق شنبه بكسرة حاجبه وانا هتوه عنه
شخص 3/ ياعم اتصل ولو علي تمن المكالمه ادفعالك انا انت خسران حاجه
اتصل اتصل
شخص 1/ يمسك الهاتف ويبدأ في الاتصال
المذيع / الو
نتعرف بيك
شخص / انا ابو احمد
المذيع /اهلا بيك ياابو احمد سؤالك عن ايه بالظبط
شخص 1/ انا عاوز اكلم الشيخ حموده الخراط
المذيع / لا يافندم احنا معانا الاستاذ محمود الاخشيدي
شخص 1/ لا ده الشيخ حموده الخراط هو انا هتوه عنه
(يرتبك الضيف ويلاحظ ذلك المذيع)
قائلا الو الو الخط قطع
(كادر ثابت في المنطقتين)

صوت
ويل للبسطاء ذوي القلب الابيض
حين تفاجئهم انواء الطقس
الناس إثنان
أحدهما ينجو فى الطوفان
والآخر يغرق فى كأس