احمد عطوه يكتب: مسرحية غير معلن عن قصة قتل اداري ل د. كمال يونس

تفتح الستار اضاءة تدريجيه علي حاله هرج وحركه عشوائيه لاحد الشوارع مؤثر صوت سيارات وحوار متداخل من الممثلين علي الخشبه
شاب متحدثا في الهاتف / وايه كمان هو كل يوم نكد
شخص / بس الموضوع مايستحملش كل ده
فتاه / انا كده مش هلحق المحاضره
شخص / هو اقرب مترو فين
شخص / يعني اطلع الكوبري
فتاه / يابنتي بقولك البت دي مش سالكه
رجل / انا بضرب نفسي بالجزمه كام يوم اسود يوم مااتجوزتك(مؤثر صوت حادث)
مع ارتفاع حدة الاضاءه شده وتنوع وتغيير الوان
يقع علي الارض رجل اربعيني يظهر من هيئته انه من الطبقه الكادحه يرتدي قميصا وبنطالا و بجواره عكازا كان يتكئ عليه ترتفع حركةالهرج والمرج وفجأه يتجمعون حول الرجل الملقى علي الارض مع نزول مؤثر سيارة الاسعاف
بلاك

اضاءه تدريجيه علي سلويت في عمق المسرح مع مؤثر يبرز حالة التوتر لدكتور يحاول افاقة المريض بصدمه صدمات كهربائيه مع ظهور حركة الصدمه تعاد الصدمه لاكثر من مره ولكن دون جدوى
اظلام تدريجي في عمق المسرح مع اضاءه تدريجيه في وسط المسرح علي مشهد داخل احد مكاتب منظمه حكوميه ثلاثة مكاتب يجلس علي اثنين منهما ممثلين ويدخل رجلا اربعينيا وبيده عكاز يرتدي بنطالا اسود وقميصا ابيض قائلا في ارهاق / صباح الخير
ش 2 بامتعاض/ صباح النور
ش3/ اهو صباح
ش1 / مالكو يااولاد الكئيبه ع الصبح
ش2/ الدنيا علي بعضها
ش3/ اللي بنصحى فيه نبات فيه ومفيش جديد
ش1/ قول يارب
(يرن الهاتف)
ش2/يرد علي الهاتف اه لسه واصل حالا (فترة صمت بسيطه وكأنه يستمع علي من الهاتف ) 12.38 (فترة صمت) يعني اقوله دلوقتي علي طول تمام ياافندم حاضر حاضر
شخص 1/فيه ايه
ش2/ المدير عايزك دلوقتي
ش1/ ربنا يستر خير يارب ويخرج

ش3/ هو فيه ايه
ش2/( يومئ اليه ان يصبر قليلا حتي يخرج) المدير عاوزه
ش3/ طيب
ش2/ يعني مسألتنيش ليه
ش3/ واسال ليه وانا مالي
ش2/ مالك ازاي يعني
ش3/ زي السكر في الشاي حاجه متخصنيش انا راجل باجي اقضي الساعتين ومليش فيه اللي يولع يولع واللي يموت يموت سيبني ف حالي ياعم (هامسا) عاوز يجرجرني عشان يعصفر ويسلمني تسليم اهالي
ش2/ ضاحكا قصدك خليني ف درجي
ش3/ ضاحكا بسخريه ايوه خليك في درجك وخليني ف درجي
ش2/ بلكنه خبث طب ودرجه
ش3/ ماانت عارف مالوش في الادراج
ش2/ مش قلتلك متعرفش حاجه
ش3/ نعم
ش2/ ملوش في الادراج بس ليه في الشيكات ده هابر حتة دين هبره وحوارها وصل للمدير ووقفه عن العمل ومحوله للتحقيق وشكلها كده لو عرفوا يثبتوها هتبقى فيها نيابه وحكومه وسين وجيم وبلا ازرق ربنا يستر وميفتحش علينا العين

بلاك
اضاءه تدريجيه علي مشهد داخل المنزل لسيده عشرينيه تبرد اظافر يدها وهي جالسه في وتغني
مالي طب وانا مالي وانا مالي
بالاحزان وانا مالي
عايشه ف احلي ليالي
ويا حبيبي الغالي
وتضحك ضحكه استنكاريه
انا ايه اللي كان رماني علي كده بس
انا اللي ركبت دماغي وماسمعتش كلام ابويا واخواتي وحوستهم عنه بالعافيه دول لو عرفوا انا عايشه ازاي مااعرفش ممكن يعملوا ايه (تستدرك) انا صافي اعيش العيشه دي قال ايه بحبه قصدي كنت بحبه بلا حب بلازفت اديني اهو بقالي 3سنين متجوزاه اسود 3 سنين في حياتي
يدخل ش1/ السلام عليكم
سيده / هاي
ش1/ هاتيلي كوباية مايه
سيده / تنظر اليه وهي تبرد اظافرها انت عميت مش شايف ايدي مش فاضيه
ش1/ متجها ناحية الكالوس الايسر ويختفي قائلا اه بتحضري النووي يعني يارب صبرني ع العيشه دي ( هامسا) لولا وصل الامانه اللي انا ماضيها والقايمه والنايمه كان زماني مطلقك انا كان عقلي فين
سيده / بتقول حاجه
ش1/ بقول وحشتيني
سيده / طيب
ش1/ يجلس سارحا مع نزول مؤثر خافت لا ريق حلو ولا عيشه حلوه ومصره انها متخلفش الا بعد 5 سنين ده انا اللي شايل البيت لو مطبختش بجيب جاهز وانا اللي بغسل الهدوم انا اللي غلطان حبتها وكنت متخيل ان هي دي اللي هتريحني كانت بتلمع زي الدهب انا اللي غلطان ماينفعش الدهب يتجوز الحديد طب وبعدين هااعمل ايه دلوقتي لا مرتاح في بيتي وموقوف عن العمل بمصيبه معملتهاش ومش عارف اثبت برائتي الشيك مكتوب باسمي واللي هو صحيح ممسكوش الشيك معايا بس اعمل ايه بس يارب دبرني يارب (ينتهي المؤثر)
ش1/ ياااااارب
سيده / مالك
ش1/ بدعي ربنا بلاش

بلاك
تفتح اضاءه تدريجيه علي نموذج مصغر من مكتب وكيل نيابه يجلس مع شخص
و. ن / حاجه غريبه
ش/ اي الغريب ياباشا
ون/ فاكر قضية الرشوه اللي قفلناها الاسبوع اللي فات
ش/اه ياباشا
ون/ المتهم اللي فيها عمل حادثه تاني يوم حفظ التحقيق
ش/ ماعادي
ون / لا مش عادي محمد بيه الوكيل لسه مكلمني من شويه وبيقول ان كاميرات المراقبه جايبه عربيه اكس 3 بلوح مطموسه خبطته
ش/ لوح مطموسه واكس 3 الراجل ده فيه حاجه وراه سر انا مش فاهم ليه عربيه من النوع ده تخبطه وقبلها كان متلفقله قضية رشوه مين اللي عاوز يخلص منه وعمل ايه لكل ده انا مش فاهم
بلاك
اضاءه بؤره علي يمين المسرح علي شخص يتحدث في الهاتف داخل مكتب المؤسسه الحكوميه
ش/ ايوه ياباشا حصل وزقيته ورستقتها زي ماقولتلي بالظبط
صمت
ياباشا انا عارف لو اسمك جه في اللعبه رقبتي هتطير
بلاك
تفتح اضاءه علي يسار المسرح علي سيده تتحدث في الهاتف
يابنتي انا زهقت لازم اخلص من ام الجوازه دي دي بقت حاجه تقرف

بلاك
اضاءه تدريجي علي مكتب وكيل النيابه
ون / الحكايه بقت رأي عام ونائيب الوزير بنفسه موصي ع القضيه دي
شخص / ليه كل ده
ون / الراجل ده طلع صعيدي وليه ابن خاله ف مجلس الشعب وهو اللي قالب الدنيا لما عرف ان قريبه عمل حادثه ومات فيها ومصر يعرف مين السبب انت عارف بقا الصعايده والتار
ش/ طب وبعدين ياباشا ده مفيش اي دليل نقدر نبني عليه 6 شهور شغالين ع القضيه ومفيش حاجه
ون / المشكله ان الدلايل كلها حسيه تقدر تستنبطها من حياته انما تمسك دليل تتهم بيه حد ابدا
انا مفيش ادامي الا اني اقيدها ضد مجهول

تفتح اضاءه تدريجي في عمق المسرح علي صورة الشخص وعليها شريط اسود

بلاك