ميلاد يونان يكتب : مينا رزق يرفع علم مصر في ”الفاو” !! ‏ وقانون الإيجار القديم ينتظر الحل ‏ ‏

يا سلام يا سلام! على رأي واحد صاحبي مش عايز أقول اسمه، مصر أخيرًا دخلت التاريخ من أوسع ‏أبوابه، لا بكأس العالم ولا بالأوسكار، لكن برئاسة المجلس التنفيذي للفاو! ‏
المستشار مينا رزق، ابن مصر، أول مصري يمسك المنصب ده من يوم ما الفاو اتولدت سنة 1945، ‏يعني من أيام ما كان الفول والطعمية بنص قرش.‏
ابننا صاحب الـ38 سنة كسب "بالإجماع"، يعني الكل اتفقوا وانتخبوه، وده في زمن حتى الولاد في ‏البيت مش بيتفقوا على نوع الشاي!‏
‏ إنجاز يثبت أن مصر قادرة تصدر الكفاءات الشابة للعالم، وأن رؤية القيادة السياسية في تمكين الشباب ‏تؤتي ثمارها على الساحة الدولية، بالفعل و مش كلام جرايد.‏
في كل الأحوال ومن كل قلبي مبروك لمصر ولمينا رزق،
ـ بس وسط فرحتنا، وبمناسبة الإنجازات العالمية والاجماع والتصويت علي المستشار مينا،!! ‏‏(اسمحوا لي بحبة نكد علشان نضبط المزاج ) فيه ناس متعكننة، فيه ملايين اسمهم المستأجرين ‏الغلابة، بيدوروا على "إجماع" بسيط من النواب ينقذهم من قانون الإيجار القديم اللي بقى زي العفريت، ‏الكل شايفه ومحدش قادر عليه
ـ بس الحكومة "قـــادرة" ـ وتقدر لو حبت انها تفرح المتضررين وتحل مشاكهم المحلية ‏
‏ ذي ما بتفرح المستريحين بإنجازاتها العالمية ..‏
فيه ناس ها تبقي ظلمة بقوة القانون ، وده بيخليني اكلم نفسي،
‏ ـ ليه حكومتنا الرشيدة بتقدر تكسبنا في روما !! .. ‏
‏ ـ وليه المستأجرين في مصر بيخسروا ، في امبابة، والوراق، ووسط البلد. ‏
‏ ـ هل هو ده العدل اللي على المزاج! ‏
‏ وفي النهاية، رغم كل التحديات والمشاكل اللي بنعيشها، لازم نفرح ونفخر بابن مصر اللي رفع اسم ‏بلدنا عالمياً " ‏
المستشار مينا رزق" أثبت إن شبابنا قدها وقدود، وإن مصر دايمًا قادرة تفتح لنفسها أبواب النجاح في ‏كل مكان. مبروك لمينا، ومبروك لمصر اللي دايمًا بتفرحنا رغم كل الظروف! ‏
ــــــــ ناشط حقوق انسان ـــــــ