فتوح: لاعب الأهلي الأقرب لي، وأخطائي خارج الملعب لا تؤثر على تركيزي

أكد لاعب نادي الزمالك أحمد فتوح، أنه تجاوز العديد من الأزمات التي مر بها خلال الفترة الماضية، مشددًا على أن ما يحدث خارج الملعب لا ينعكس على مستواه داخل المستطيل الأخضر، وأنه بات أكثر نضجًا وتركيزًا في مسيرته الكروية.

وقال فتوح في تصريحاته عبر قناة “أون سبورت”: "ممكن أكون شقي شوية، لكن دلوقتي أنا تمام، والناس فاكرة إن أي مشكلة معناها إني برة الكورة ومش مركز، وده تفكير غلط، لإن الاتنين منفصلين تمامًا».

وأضاف لاعب الزمالك: “مفيش سهر دلوقتي، الكلام ده كان زمان، وكل اللي بيحصل من دماغي أنا، مالوش علاقة بصحابي، أنا اللي بقرر أعمل إيه ومعملش إيه”.

أحمد فتوح: أزماتي السابقة نقطة فاصلة في حياتي

وتحدث فتوح عن أزمة الحادث التي تعرض لها، قائلًا: “رجعت من المشكلة دي وكنت تعبان نفسيًا، وبعدها حصلت أزمة تانية لما حضرت حفلة راغب علامة، واتقال عني موضوع مش حقيقي، لكن بعد الموضوعين دول اتغيرت جدًا وكانوا نقطة فاصلة في حياتي”.

وشدد الظهير الأيسر على ثقته الكبيرة في نفسه، مؤكدًا: “عندي ثقة في نفسي، ومفيش حاجة بتأثر فيا، حصلي مشاكل كتير في حياتي، لكن بعرف أفصل بين كل حاجة”.

وعن علاقته بزملائه، قال فتوح: “أنا فرحان جدًا بحكم إيقاف حكم حبس رمضان صبحي، وطول الوقت كنت بسأل عليه وحاسس بيه، لإنه أخويا، وهو كمان كان دايمًا بيسأل علي”.

فتوح: إمام عاشور أقرب لاعب لي.. وأعشق شيكابالا

وأضاف: “إمام عاشور - لاعب النادي الأهلي - أخويا وأقرب لاعب ليا في كرة القدم، وكان معايا قبل كده، واللي حصل في حفلة راغب علامة حفلة عادية والناس مكبرة الموضوع”.

ونفى فتوح وجود أي خلافات داخل الزمالك، موضحًا: “مفيش أي مشاكل مع شيكابالا، هو أخويا واللي حصل بينا كان حاجة عابرة، وشيكا ده أنا بعشقه”.

وأكد لاعب الزمالك انتماءه الكامل للقلعة البيضاء، قائلًا: «أنا زملكاوي بس، وقاطع الطريق على الرحيل، وكل مرة بجدد وبكمل في النادي رغم كل الشائعات اللي بتطلع".

واختتم فتوح حديثه بالإشارة إلى علاقته بحسين الشحات، قائلًا: “حسين الشحات ساكن في السلام قريب مني، وإحنا صحاب من صغرنا، وطبيعي لو عزمني أو قالّي نفتح ملعب أروح، لإن دي صحوبية عمر”.