أيمن يونس يهاجم مجلس الزمالك : أنتم عايزين توقعوا الزمالك تانى ويكون زى الاسماعيلي

انتقد أيمن يونس نجم الكرة المصرية السابق، مجلس إدارة نادي الزمالك بسبب بيع النجوم وعلى رأسهم حسام عبد المجيد وخوان بيزيرا خلال فترة الانتقالات الصيفية.

وقال أيمن يونس في تصريحات تليفزيونية: كان لازم يكون في خطة واستراتيجية من مجلس الزمالك، لكن أنتم كده عاوزين توقعوا الزمالك تاني، ويكون زي الإسماعيلي في يوم من الأيام.

وأضاف أيمن يونس: الفقر خلى نادي الزمالك مستباح في لاعبيه، والفقر اللي خلى واحد زي بيزيرا يلوي دراع النادي، لكن انت لو نادي غني، ماكانش يقدر يقولك انا ماشي.

وتابع أيمن يونس: لو أنت نادي غني مكنتش هتبيع حسام عبد المجيد ولا ناصر ماهر ولا دونجا ولا مصطفى محمد ولا ياسر إبراهيم.. إحنا عندنا فرقة متباعه، الزمالك باع لاعيبه السنوات الماضية لو مكنش باعها كان هيبقى أفضل نادي في إفريقيا.

وأكمل نجم الزمالك السابق: حاليا لدينا وزير شباب ورياضة شاب لديه قدرة وطاقة في تغيير المجتمع الكروي، شوفنا دمج لبعض الأندية وبعض الشركات وهي فكرة حلوة بس برده لازم الحفاظ على الأندية الشعبية.

وأردف أيمن يونس: مجلس الإدارة من المفترض أن يدير نادي وليس الصرف على نادي، عقلية أنك تجيب ناس ناجحة في مجالها وتقول يلا دول هيديروا نادي الزمالك، لا ده مينفعش لأن ممكن يكون ناجح في مجال شغله لكن مينجحش في الإدارة الرياضية ده علم تاني وبيزنس تاني.

واختتم أيمن يونس تصريحاته: أنتم داوشينا بقالكم كام سنة ده عنده شركة وده عنده مصنع وييجي يتولى، ده فكر قديم بتاع هواه ناس بتدور مين ييجي يصرف عليها.. لكن نادي الزمالك يمتلك 40 أو 50 مليون مشجع لازم يكون عنده فكرة واضحة واستراتيجية واضحة لتحويل النادي إلى نادي محترف، لكن كل اللي بيحصل ده تهريج.