دكتورة ماري جرجس رمزي تكتب : حوار مع حمار... ( 8 )

× بعد ازنك ياسمك إيه اسمحلنا نقعد أنا وصاحبتي ف ركنتك أحسن الفرح مفهوش مكان لرجل حمار وإحنا مفيناش نفس لا نمشي ولا نقف

# اتفضلوا طبعا...

= شايفة المزغودة اللي قاعدة هناك شفتي دورت وشها إزاى أول ما لمحتني...

× معلش ياحبيبتي مانتي برضو آخر مرة كنتي رخمة معاها وقليلة الذوق

= إيه رخمة وقليلة الذوق دي!! متخلينيش أقلب عليكي انتي.. دي واحدة عوزة تتربى هي فاكرة نفسها مين!!

× دي بنت عيلة من أكبر وأعرق عائلات البهايم المحترمة ف المملكة ومعروف عيلتها وتعليمها دي معدية يا بنتي! أنا مش عارفة انتي واخدة الموقف ده منها ليه؟! ده الدنيا كلها بتحبها

= مغفلين وهبل زيك كده بالظبط
دي نصابة وتلعب بالبيضة والحجرة ومطبلاتية للكل علشان كده بتغفلهم وتخدعهم وشايفنها كويسة
دي حية رقطاء وخبيثة!!

× لا حول ولا قوة إلا بالله... للدرجة دي!!

= آه.. واكتر كمان بس انتي اللي هبلة

× طيب بذمتك بهيمة زي دي عندها اللي مش عند حد جمال بحق ربنا وعلم محدش وصل ليه إلا ندرة م البهايم النسوان
اللي ف مملكتنا وعيلة متأصلة أباً عن جداً مش فلوس بس لا حسب ونسب ومكانة اجتماعية هتطبل للي حواليها ليه؟!!
ليه متسميهوش خير جواها شبع وحب وطبيعة كويسة؟
واحدة شبعانة من كل حاجة ومفيش جواها لا حقد ولا غيرة مفيش غير الكلمة الحلوة وجبر الخواطر وخدمة البهايم
مشفناهاش خدت حاجة لنفسها من ورا اللي بتعمله أو مقابل حاجة بتقدمها لأن ببساطة عندها كل حاجة!!

= انتي معايا واللا معاها
صحبتي واللا صحبتها بجد أنا لو قلبت عليكي هزعلك.. اتعدلي معايا
أنا مفيش بهيمة زيي ف المملكة كلها شوفي أنا ساكنة فين ولابسة كام كيلو دهب والماظ
طظ فيها وف عيلتها وعلمها برضو متجيش فيا حاجة لا هي ولا أى بهيمة ف المملكة...

× خلاص ياستي وأنا مالي انتى حرة ف دماغك بس والله أنا بقولك كلمة لله عشان لما بهيم أو بهيمة من عيالي تيجي سيرته ف غيبته بالظلم يلاقي اللي يردها..
وبعدين المصيبة إن المرة أو المرتين اللي اتعاملتي معاها فيهم كنت أنا معاكي وكانت ملاك وخدمتك ووقفت جنبك وبعد كده اتقلبتي عليها القلبة السودة دي!!!
سبحان الله... تكوني متضايقة من كمية البهايم اللي بيحبوها؟!
واللا اكمن عيلتها جامدة بجد وتعليمها عالي؟!

= تحت حوافري ياماما ولا تسوي حاجة جنبي
والناس دي كلهم اللي بيحبوها مستعينهمش خدامين عندي
وتصدقي بالله قعدتك تقرف وضايقتيني أنا قايمة اقعد مع بت عمي...

× فين بت عمك دي انتي هتستهبلي!!

= أهي هناك...

× اللي ضاربة شعرها اصفر دي!!

= اسمها صبغته يا رخمة... وعند أغلى كوافير بهايم ف المملكة خليكي ف البتاعة بتاعتك دي...

× يا بنتي استنى بلاش جنان أنا رجلي وجعاني ومش قادرة أقوم ومش بطيق بت عمك دي من اصله اللي شبه السحلية النتاية ولما صبغت شعرها بقت شبه السحلية الدكر... وانتي كمان أصلاً مش بتطيقيها

=بس يا فقر... ع الأقل مش هتقعد تغلطني وتأتتني زيك
أشوفك بكره ف النادي

# بعد اذنك يا استاذة
متاخذنيش ومتضايقيش مني بس انتم اللي جيتم قعدتم معايا وأنا طبيعي إني أسمع حواركم

× معلش والله... أنا مكسوفة م الموقف وخصوصاً إن شكلك غريب مش من مملكتنا

# فعلا غريب وكنت جاي علشان اشوف بنت حلال من مملكتك أتجوزها

× ربنا يسعدك ويوفقك وتلاقي أحسن بهيمة تشاركك حياتك

# أنا من ساعة ما وصلت مملكتكم ونزلت ع الفرح ده شايف حاجات غريبة جداً

× والنبي يخويا إحنا من ساعة ما اتولدنا شايفينها... بس هنعمل إيه مملكتنا وأهلنا ولازم نتعايش...

# طيب اسمحيلي أعرف الست أم خلق أضيق من خرم الإبرة دي اللي لسه قايمة ليه بتتكلم وحش عن الست اللي بتقولي عليها كويسة؟
هي عملت فيها حاجة وحشة؟

× والنبي ما عملت غير كل خير ومع كل الناس
بص يا اخ المشكلة في النقص
النقص بعيد عنك مبيعالجهوش ولا بيداويه حاجة ولا فلوس الدنيا كلها
الحاجة الوحيدة اللي بتبرد نار الناقص اللي مبيعرفش ربنا إنه يتكلم وحش ويطلع إشاعات ويتعامل وحش مع اللي عارف ومتاكد إن ضافره برقبته وميستحملش يظهر معاه ف مشهد واحد لأنه مش قد المقارنة....

# بس باين عليها غنية قوي وبنت ناس شكلها على الأقل من بره يعني

× بما إنك غريب هقول وأنا مطمنة إنك مش هتنقل كلام لحد تعرفه ف المملكة المنيلة دي..
غنية آه... وغنية جداً
بس لو هتتكلم عن الأصل انسي
وخد الكبيرة بقى الفلوس دي ظهرت بين يوم وليلة يعني كمان حرام
وجاية من سكة شمال

# ينهار أسود على كده!!

× وأبو كده وأمو كده
أومال انت فاكر إيه... هو فيه ابن شبع له أصل نضيف وشاف ربع ساعة رباية يتكلم بالطريقة دي والغرور والعنطزة والنفخة الكدابة دي ويقول ع نفسه إنه احسن واحد ف الدنيا؟!
ده بيكون بينفي حقيقة جواه إنه أقل واحد ف كل حاجة حتى بعيد عنك ف الفلوس الكتير اللي معاه لأنها حرام
إللا لا شفناها ورثت ولا اشتغلت
مرة واحدة من زريبة ف حارة لبيت ماشاء الله
من أين لك هذا؟

# بس مش برضو عيب عليكي وانتي صاحبتها تتكلمي ف ضهرها كده مع حد غريب؟!!

× وهى مش عيب عليها تتكلم بقلة أدب عن واحدة محدش شاف منها غير كل خير وضافر حافرها اللي يطيره المقص برقبتها هي وعيلتها كلهم
وبعدين دي حيالله معرفة.. جوزي وجوزها ليهم شغل سوا والصنف النجس ده زي ما بيتكلم ع الكويس ف ضهره هيتكلم برضو عني ف ضهري بالكدب
ده بيبقى مرض وغضب إلهي ونار قايدة بعيد عنك
ع الاقل أنا كل كلمة قلتهالك صدق مش افترا زي كلامها والمملكة كلها عارفة وكلهم ولاد كلب ف الوش مراية وف القفا سلاية وربنا موقعها ف الأوساخ من طينتها و شبهها.....

# كفاية يا أستاذة!! كفاية الله يسترك....
هو انتم مفيش عندكم بهايم طبيعية يعني مشاكلهم النفسية تكون معقولة كده والواحد يقدر يتعامل معاهم بدرجة معقولة من السوية والأصول والأخلاق!!

× يعم انا بقولك كله ف النازل والضياع
احنا بقينا ف مستشفى مفتوحة للأمراض النفسية
طب تحب تعرف قصة بت عمها الولية اللي شبه البرص الجعان اللي راحت تقعد جنبها دي عملت إيه مع بنت خالتي الغلبانة؟!

# أحب طبعاً لو ميضايقكيش....

× هيضايقني إزاى دانا اللي بقولك عشان أوريك الأشكال دي النقص واصل بيهم لفين....

# قولي يا استاذة... بس ثواني آخد برشامة الضغط علشان حاسس إني تعبان شوية

يتبع.....