الدكتورة ماري جرجس رمزي تكتب : (حوار مع حمار) (12 وقبل الأخيرة)

# قولي بقى حكايتك بالكامل يا حمور.. واوعى تخبي عليا حاجة

× ياباشا وهخبي ليه! أنا أصلي مليش حد ولا ليا حاجة أخاف منها ولا عليها

# يا ساتر يارب ده إيه الوش الحزايني الجديد ده يا عم حمور!
دانا من ساعة ما دخلت مملكتكم الغم دي مشفتش فيها طاقة إيجابية غيرك...
بسم الله ماشاء الله ذكي وناصح ومسلكاتي ومفيش حاجة مبتفهمش فيها
والأهم فاهم كل واحد دماغه ماشية منين لفين ومسيطر... مسيطر الحقيقة
انت إيه أصلك وفصلك وفين عيلتك وأهلك؟

× ربنا كتبلهم عمر جديد وخدهم ياباشا ورحمهم م الأيام الغبرة دي
وأنا ولله الحمد مش متجوز وطبعاً مش مخلف...

# ياساتر يارب! ليه كده يبني دانت زي الفل ماشاء الله صحة وشباب ودماغ توزن بلد مشفتش ربعها ف مكان...

× مهو عشان كده ياباشا مينفعش اتجوز م المخروبة دي
عارف ياباشا أوحش حاجة ف الدنيا إيه

# إيه يا حمور؟

× إنك تبقى فاهم كل حاجة... فاهم بجد مش حمار ومتعافي

# طب وتعرف منين يا عم حمور اللي فاهم بجد من الحمار المعافي؟

× الحمار المتعافي اللي فاكر نفسه فاهم وهو بأف كبير تلاقيه على طول بيشكي وعامل دوشة صوته عالي عالي قوي يا باشا وكلامه كتير مبيبطلش كلام لكن ف الآخر مبيقولش حاجة خالص عليها القيمة... لأنه حمار ومتعافي

# أومال اللي فاهم بيكون عامل إزاي؟

× بيضحك ع طول أو أقله مبتسم... مفيش حاجة بتهزه... نادر قوي لو لقيته اتحمق أو اتخانق أو علا صوته
ولما بيحزن ويكتئب بيستخبي... بيختفي لحد ما يداوي نفسه بنفسه ويطلع يضحك تاني ويساعد اللي حواليه وميشتكيش .... ميشتكيش ابداً

# طيب هو كده عنده فصام واللا إيه ظروفه؟

× عنده تصالح كبير مع نفسه
فهم خلاص إن الكلام ممنوش فايدة و إن اللي حواليه ضاعوا ورافضين يفكروا حتى ولو ثواني وسياسة القطيع جرفاهم زي الطوفان لهلاكهم
هو شايف المشهد كامل وفاهم الامخاخ متركبة ازاي ف خلاص الشوية اللي عايشهم ياخد البهايم دول ع أد عقولها ويفرحهم وياخد فيهم وف نفسه ثواب وخلصت....

# مفكرتش تتجوز ليه خسارة الدماغ دي ميكونش ليها نسل يصلح الحال المايل بتاعكم ده شوية

× ياباشا الدماغ دي اللي عجباك خلاص انقرضت وغالبا أنا آخر واحد....
اتجوز مين لامواخذة
واحدة كل أفكارها سم زي الأشكال اللي شفتها ف الكام يوم اللي قعدتهم معانا هنا؟!
تتجوزيني عشان الفلوس اللي معايا وأنا فاهم إن لو ممعايش مكنتش بصتلي
هي عوزة الفلوس مش عوزاني وده يفرق كتير لأي حد عنده ذرة عقل وكرامة

# ياااه معقول فيه كده!
انت اتعلمت يا حمور؟

× أحسن تعليم أيام ماكان العلم موجود والمعلم رسول والتربية قبل التعليم دلوقت لا فيه تربية ولا فيه تعليم..
متأخذنيش أنا بتكلم شعبي وبلدي من كتر ما اترميت ف السوق

# طيب لما هو أحسن تعليم مشتغلتش بشهادتك ليه؟

× والله ياباشا أنا كنت الأول ف كلية الطب لحد السنة القبل الأخيرة كانوا مسميني العبقري
وآخر سنة طلعوني برة الترتيب عشان كانت الدفعة كلها ولاد الدكاترة ولازم يتعينوا

# وبعدين عملت إيه؟

× فتحت عيادة ع أد الحال كده وكنت بعالج وبخفف البهايم العيانة بدوا تمنه بسيط قوي وابتدا اسمي يسمع ف المملكة كلها

# متوقع طبعا أنا مش مستغرب
حصل ايه بعدها؟

×الفشلة اللي بجد فضلوا يقرفوا ف أهلي ويأجروا بهايم تتكلم ف كل حته اني موتت حد قريبهم

# ياااه الله يخرب بيتهم ويحرق قلبهم ع عيالهم ليه الشر ده وهما عارفين إنك عبقري

× الغيرة ياباشا والفشل... فعلا ربنا خارب بيوتهم وحارق قلوبهم على ناسهم مهو ربك عادل

# طيب انت عملت إيه؟

× بيني وبينك أنا راجل صاحب مزاج ودماغي عالية قوي وزي مانت شايف القاشية معدن والفلوس للركب علشان كده مكنتش بتاجر يالعيانين بتوعي ولا ابيعهم لحد
قفلت عيادتي وبقيت ملك نفسي بشتغل ف كل حاجة بحبها بمزاج ورزقي بقى مليون مرة أكتر من الأول

# المسألة مش مسألة فلوس يا حمور انت لسه قايل...
انت معاك عِلم يسد عين الشمس وابن عز مش كلب قرش بتعالج بأقل حاجة ليه تحرم المملكة من ده

× ومين قالك إني وقفت الطب.. أنا بعالج أي حد يقصدني صدقة كده لوجه الله وكفاية الدعاوى اللي باخدها بعد ما بيكون اتباع واتشري فيهم من اللي يسوا واللي ما يسواش

# ده انت حدوتة لوحدك برنس مشفتش زيه!

× ياباشا أنا متعتي أقعد كده اتفرج ع كل بهيم من دول وهو عايش ع نفسه
تاجر الممنوعات فاكر نفسه الصفوة عشان شوية فلوس حرام جابهم ونضفوه من بره
الدكتور اللي نازل سلخ ف العيانين بتوعه وهو مش عارف يلاقي علاج لابنه او ينقذه من مخدرات او انحراف
رجل الدين وهو مخزي وواقف قدام بهيمة صدرها عريان يوم فرحها وبيدعي ويصلي لأنه اتكرمشله شوية فلوس وهو لسه مهزأ بنت غلبانة إن حته من دراعها باين
البهيم اللي عامل نفسه محترم وهو بينهش ف عرض واحدة مشفش منها حاجة وحشة عشان متشدد لبهيمة تانية لفة عليه غيرانة منها وبعد سنين أشوفه موحول مع بنته ف جوازة منيلة وصلت لطلاق وبيلصم فيها بالعافية
ياباشا كله كأس و داير اللي سقا حاجة هيشرب منها لحد ما يطفحها

# ياااااه يا حمور انت متأكد انك من المملكة المعفنة دي!!

× لا يا باشا.... ده السر اللي هقولهولك
أنا من مملكة تانية خالص نسل تاني نضيف بجد بس المملكة دي قامت فيها حريقة مسكت ف الغابة كلها أبويا مات وأمي هربت بيا لحد ما جابتني هنا وبمجرد ما دخلنا المملكة ماتت من التعب والقهرة وكبرت هنا غريب وسط الأشكال المعوقة اللي سعادتك شفتها دي...

# ولا حواديت ألف ليلة وليلة!

× يعم فرفش كده وابسطها انت هتنكد عليا ليه أنا ملك زماني كده وميت فل واربعتاشر بساعد اللي حواليا وبحب الكل وأنا بعيد عن الكل لأن الكل مرضى والمرض بيعدي وأنا عاوز اعيش الشوية اللي هعيشهم مبسوط ولما اموت اطلع للي خالقني متجحمش ويكون راضي عني

# ليك حق يا فيلسوف عصرك وأوانك

× نويت ع إيه يا باشا؟

# نويت امشي أهرب بجلدي.. كفاية لحد كده
هتوحشني قوي يا حمور حتوحشني بجد وعمري ما هنساك....

× ولا أنا ياباشا واتمنى أشوفك تاني
بص
لما تعوز تشوف مستشفى مجانين مفتوحة ف أي ويك إند كده تعال واهو تغيير جو... وهوريك بهايم تانية وأماكن تانية مش هتختلف كتير عن اللي شفتها. اتفرج وغير جو. اتمتع بمتعة الإدراك وسط العَمَى الحسي للقطيع

# سلام ياصاحبي

ومشي التعب المتحول الي حمار بعملية تجميل ظاهرية لحد ما وصل أول السور السري وعدي من الفتحة ودخل الغابة بتاعته وسط أهله
وجرى بسرعة لحد ما وصل لعيادة الفيل كبير أطباء الغابة واللي كان موجود فيها كالعادة وقال

#بسرعة يا كبير الأطباء حولني لشكلي الأصلي ثعلب زي ما كنت لأني لازم بكره بالكتير أكون واقف قدام الأسد جلالة الملك
يتبع.. الحلقة الأخيرة الخميس القادم بإذن الله