الجمعة 29 مارس 2024 02:02 مـ
الجارديان المصرية

رئيس مجلس الإدارة ورئيس التحرير عبد النبى عبد الستار

مقالات

رضوى الهوارى تكتب : يبقى انت صحيح فى مصر

الكاتبة رضوى الهوارى
الكاتبة رضوى الهوارى

فئه كبيرة من شعب مصر يمارس دور ابو العريف. والمعترض علي كل حاجه وفاهم في كل حاجه فاللقاح الذي كان بيتهاجم من كام شهر وكان بيتقال إن الرئيس السيسي بيجرب اللقاح في الشعب!! دلوقتي كل اللي كانوا بيهاجموه وبيرددوا الكلام ده أول ناس مستعجلين علشان ياخدوا اللقاح لدرجة انك ممكن تقابل حد منهم يسألك متعرفش واسطة تستعجلي الحصول علي (اللقاح)

واللي كانوا بيهاجموا (مبادرة إحلال السيارات) القديمة بسيارات جديدة بتعمل بالغاز وكانوا بيقولوا إنها خراب بيوت وسبوبة!! دلوقتي أول ناس راحوا يشتروا سيارات قديمة علشان تدخل ضمن المبادرة اللي هما كانوا بيهاجموها!!

واللي كانوا بيهاجموا الدولة علشان بتبني (وحدات سكنية) وبيقولوا إنها أي كلام!! دلوقتي زعلانين علشان الوحدات كلها إتباعت وعايزين الدولة تبني أكتر علشان يقدموا ويحصلوا علي وحدة سكنية!!

واللي كانوا بيهاجموا مشروعات (الصوب الزراعية) ومشروعات (الإستزراع السمكي) دلوقتي بيسألوا عن أماكن سيارات التوزيع وبيقفوا أول ناس في الطابور قدامها!!

لما تقابل ناس من النوعية دي وتلاقيهم بيهاجموا أي قرار أو مشروع جديد متردش عليهم في وقتها وتتعب نفسك وقلبك ، سيبهم وإتفرج عليهم بعد كام شهر وهما بيحولوا نفسهم بنفسهم لمادة للسخرية ووقتها إبقي فكرهم بكلامهم..لو عملت كدا هتريح دماغك من ابو العريف ..ومعترض افندي