الخميس 28 مارس 2024 11:05 صـ
الجارديان المصرية

رئيس مجلس الإدارة ورئيس التحرير عبد النبى عبد الستار

فنون وثقافة

هاشتاج تامر حسني يتصدر تويتر.. ونشطاء: نجم الجيل عامل أغنية جميلة

الفنان تامر حسني
الفنان تامر حسني

دشن نشطاء مواقع التواصل الاجتماعي تويتر هاشتاج جديد باسم #تامر_حسني والذي تصدر قائمة الهاشتاجات الأكثر تداولا عبر موقع التدوينات القصيرة ”تويتر”.

وجاء ذلك بعدما طرح الفنان تامر حسني منذ قليل أغنيته الجديدة ”صعبة” عبر موقع الفيديوهات الشهير ”يوتيوب”.

والأغنية من كلمات وألحان عزيز الشافعي وتوزيع عبد الرحمن شوقي وإخراج تامر حسني.وكتب مصطفى أشرف جزء من الأغنية الجديدة : ”حبك احتلال أنساك شيء محال عايز أعيش وأموت أسير حلاوتك”.

وأضافت أصوليا: ”الكلمات اللحن الأداء صوت تامر حسني الكليب الإضاءة الديكور بجد كليب متكامل أغنية صعبة حلوة أووي”.

وأضاف خالد أبو سالم: « تامر حسني نجم الجيل عامل أغنية جميلة أوووووي».

وتابع أحمد فراج:«الأغنيه جامدة والكليب تحفة أوي ودمه خفيف جدا وده العادي من العالمي تامر حسني».

حلا شيحة تهاجم تامر حسني

وفي سياق منفصل، نشبت أزمة بين  حلا شيحة و تامر حسني حين كتبت عبر حسابها على انستجرام قائلة: ”أنا اتفاجئت جدا ًبنزول كليب يجمع فيه مشاهد متفرقة من الفيلم وفي ايام ذي الحجة ايام مباركة و خصوصاً بعد اخر بوست نزلته و وضحت فيه انا ايه .. و اتفاجئت اكتر خصوصا بعد وعد تامر حسني ليا وتأكيده أنه حيحترم رغبتي و بعض الطلبات اللي طلبتها منه بكل احترام وود الصيف اللي فات و أكد لي أنه حيحترم رغبتي”.

وأضافت: ”احنا يمكن نجحنا بمقاييس الدنيا بس صدقوني بمقاييس ربنا احنا لم و لن ننجح انا عارفة ومتاكدة ان زملائي جواهم خير بس للاسف فتنة الشهرة و النجاح مش بتخلينا نشوف ونقيس الامور صح بتكلم من قلبي الكليب ده ميرضيش ربنا و انا عيطت لاني شفت نفسي في المشاهد دي”.

وأوضحت: ”دي كانت زلة نتيجة ظروف مريت بيها وكلنا بنغلط و لازم نغلط علشان احنا بشر بس المصيبة اننا بنغفل و بننسى .. انا مش حتكسف من حد انا تبت من المشاهد دي و هي لا تصح و انا غلطت و بصلح و اهم حاجة ان ربنا يرضى عني لان في الاخر ده اللي حينفعنا مش الشهرة و لا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليلين منا”.

وتابعت: ”الفن لو بيخلينا نبعد عن منهج ربنا و منبقاش قدوة لولادنا يبقي باطل و ميبقاش فن احنا كلنا عندنا امتحان في الدنيا دي”.

رد تامر حسني
ليرد بعدها تامر حسني قائلا: ”نهاركم جميل يا أغلى الناس..  الحقيقة عمري ما باتخيل إني أدخل في نقاش بالشكل دة مع زميل باحترمه، وكان فيه بيننا كل خير.

للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصياً ونتناقش بيني وبينك، فأنا مضطر أرد هنا برضه.. أولاً أنا عمري ما وعدتك إن الكليب مش هاينزل ده ماحصلش اصلاً يا حلا.. مش أنا خالص اللي أوعد وأخلف.. الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتها لك، كلها موجودة”.

وأضاف تامر: ”وبعدين الفيلم بقاله ٣ أسابيع في السينمات والكليب موجود جوة الفيلم.. هو بالنسبة لك الحرام إننا ننزل الكليب على اليوتيوب بس؟!! إنما الكليب يتشاف جوة السينمات عادي؟! منطق غريب فعلاً يا حلا، وبعدين هو مش انتي اللي مضيتي عقد وتقاضيتي عليه مبلغ كبير علشان الدور ده بعينه؟!! هو مش انتي اللي صورتيه ومثلتيه بنفسك وبمنتهى الرضا وللاّ حد أجبرك ؟!! وللتوضيح للجمهور الكريم أنا والمخرجة الأستاذة سارة وفيق بعتنا لك، وكنا بنتحايل عليكي تيجي تشوفي شغلك قبل إصدار الفيلم علشان لو عندك أي ملحوظة تقوليها، ماكنتيش بتردي علينا وتليفوناتك كلها كانت بتقفل في وشنا”.

وتابع تامر: ”إنتي للأسف يا حلا متعاملتيش صح مع الموقف.. كان لازم تهتمي بأمرك أكتر من كدة ولو كان ليكي أي طلب تاني كنت هاعمله بكل حب، إنما انتي فجأة اختفيتي وماكملتيش تركيب صوتك في الفيلم ولا جيتي تتصوري عشان أفيش الفيلم أصلا وماخليتيناش نعرف نعمل أفيش مجمع !!! وبقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطة مسبقة في الدعاية وانتي عارفاها كويس ووافقتي عليها وده كليب رومانسي.. يعني معقول كنتي عايزة المنتج يشيل كل مشاهدك اللي صورتيها من الكليب، ويطلعني باغني وباقول الكلام الرومانسي ده للأستاذ ماجد الكدواني مثلاً هو ده يُعقل ؟؟!!”.

واستطرد: ”أنا زعلان منك جداً يا حلا على مفردات البوست بتاعك الغير موفقة.. ومستحيل هارد بطريقتك اللي فيها تجريح واتهامات باطلة ليا احتراماً لحاجات كتير يمكن فايتاكي، بس مش هاتفوتني.. وعلى فكره انا واثق انك عارفة إني مستاهلش منك كدة وهاكتفي بالتوضيح ده وربنا يهدي الجميع ويكتب لك كل الخير.. اللهم آمين”. 

تامر حسني عزيز الشافعي نجم الجيل المطرب تامر حسني اغنية صعبة