السبت 13 أغسطس 2022 11:08 مـ
الجارديان المصرية

رئيس مجلس الإدارة ورئيس التحرير عبد النبى عبد الستار

فنون وثقافة

الشاعرة أمال محمود تكتب : ( زيارة لطبيل )

الشاعرة أمال محمود
الشاعرة أمال محمود

قرّب يا طبيب شوف إيه بيا
تعبان ولا عارف إيه فيا!
اكشف ع القلب ده دقّه بطيء
والصدر كمان نَفَسه بيضيق
طب شوفلي عيوني البهتانة
من بعد ما كان نورهم ياما
يا طبيب قولي وبصوت عالي
يمكن ينتبهوا لموالي
قول للعالم إيه صار بيا؟!
إيه اللي مشقلب أحوالي؟!
*****

طب هات أسمع نبضات إيدك
بعدها أعرف إيه هيفيدك
ده الحب بيجري ف وريدك
*****
ده أنا قلبي دقاته سريعة
ينبض من حسرته بوجيعة
والنَفَس المكتوم جوّانا
محبوس تأبيدة ف زنزانة
*****
كفاياك تشكيلي وكالعادة
ده القلب اتقطّع بزيادة
وبشوف مرضك مش ف الجِتّة
ولا تنفعه أدوية وروشتة!!

طب شوفلي علاج ينفع للروح
يمكن يشفي القلب المجروح
*****
يبقى أنت المفروض ليا تبوح
حتى ولو بوحك مش مسموح
*****
أنا بوحت خلاص أهو ليك يا طبيب
وبصوت عالي وبصوت منبوح
اِكتم على سرّي وكون طيب
وداويني وف وقت قريّب
*****
مرضك ده علاجه يكون حاجتين
تبعد عن كل اللي بوشين

حتى ولو كانوا ف نني العين
تقفل على نفسك مليون باب
ولا يفضل جنبك غير لاحباب
والحاجة التانية دي مش سهلة
بتصيب القلب خلال ثانية
قلبك ده لابد يكون مقفول
لو صابه الهوى أنا مش مسؤول!
مرضك مش سهل علاجه طويل
وساعات مفعوله ملوش تأثير
وأنت يا مسكين مانتش ناقص
ما كفاية جروحك ما بناقص
والله يشفيك ويشيل عنك
ولا تعرف يوم اللي يغمك!

#من ديوان ( شيء و ضده )