منى نور الدين تكتب : مجرد كلام

انا حاكتب كلمتين أولهم سؤال وأنا عارفة إن الجميع إجاباتهم واحدة مفيهاش تغير ودا مش لإنى ساحرة
أو باعرف الغيب لاسمح الله بس بالعقل والمنطق
الإجابة لازم ولابد تكون بالنفى يا إما لو كانت بالإيجاب يبقى صاحب الإجابة مش طبيعى

ندخل فى المهم هو ياترى فى حد بيحب الفشل ؟
يعنى المعلم مع طلابه المهندس فى موقعه الطبيب مع مريضه النقاش فى مهنته الموظف فى عمله البائع مع زبائنه ؟
الإجابة أكيد لأ وألف لأ بالعقل والمنطق

طيب يا ست إنتى عاوزة توصلى لإيه من سؤالك؟
حجاوب من غير ما تزعل نفسك لما كل الناس دى مش بتحب الفشل يبقى يا ترى مجلس إدارة نادى الزمالك ورئيسه مرتضى منصور عاوزين الفشل سعوا للفشل أصلا فشلوا ؟
بالعقل والمنطق لأ

عارفة إنك حتقول بطبل وبقبض بس معلش استحميلنى دقيقة
وأنا كمان حاستحملك وحستحمل ظنك السيئ فيا

تعالى نكمل بالعقل والمنطق كلنا عندنا أخطاء وكلنا بنغلط فى بعض القرارات سواء فى حياتنا أو فى شغلنا بس هل دا بيكون مقصود؟ أكيد لأ

وطبعا مجلس إدارة الزمالك مش مملائكة أو معصومين علشان ميغلطوش والسؤال إللى عارفة إنى حتسأله هو مجلس مرتضى
مع حفظ الألقاب مغلطش ؟ الإجابة طبعا حصل أكيد أخطأ
طيب مفيش أخطاء فى إدارة بعض الملفات ؟ الإجابة طبعا حصل أخطاء
لكن التقيم يبقى أزاى يعنى ؟ حجاوب بمثال فى حياتنا
أنا كمعلمة وقفت طول السنة أشرح لطلابى وأعيد وأزيد وأراجع وأحل معاهم كل نماذج الأسئلة إللى متوقع وجودها فى الامتحان وظهرت النتيجة وكان وسط طلاب الفصل اتنين راسبين هل يحق لمدير المدرسة أو زملائى أو أولياء الأمور يتهمونى بالفشل؟
الإجابة أكيد لأ لأن دا يبقى ظلم وإجحاف
طيب نقيس على مجلس إدارة نادى الزمالك ورئيسه مرتضى منصور إللى البعض بيتهمهم بالفشل

والبعض دول مش حتهمهم لابخيانة ولاقبض ولاحاجة ولاحتى حشكك فى زمالكاويتهم
أنا بس حسألهم سؤال هو أنتم كده مش ظالمين المجلس ده؟

مجلس بقاله سنة ونص حنقول سنة حصلوا فيها على دوريات وكؤوس جميع الألعاب الجماعية ومن ضمنها فريق كورة القدم
إللى كان موقوف القيد بتاعه
وياسيدى حقولك فشل فى النص سنة التانية
ومش حقولك بظروف خارجة عن إرادته وحجز وحبس وعزل وحكام وظلم وقرارات مغلوطة وظالمة والهيصة دى
والكلام إللى أنتم مش مقتنعين بيه كمعارضين

لأ أنا حقولكم المجلس أخطاء فى إدارة ملفات النادى فى الفترة دى وحصل الإخفاق
هل ده معناه عزل ورمى وشتم وسب وقذف المجلس ؟
ولا نقف ونوضح ونبين مواضع الإخفاق وأسبابها ونساعد فى فى حل المشاكل وتخطى الفترة دى ونكمل

هو السباك لما بيجى ويقول لحضرتك إن الحنفية بايظة حضرتك بتهد العمارة ولا بتصلح الحنفية

علشان كده لما تيجى تقيم قيم على الأمور كلها بحلوها ومرها بتحديتها وصعوبتها قبل رخائها وسهولتها
وياريت ميكنش قرارك هدم العمارة

المجلس ده باقى على المدة الانتخابية بتاعته حوالى كمان سنتين طيب منيجى نسكت ونشاهد وننتظر حلولهم للمشاكل الموجودة إللى بعضها كان بسبب سوء إداراتهم لبعض الملفات وبعضها لظروف وتحديات خارجة عن إرادتهم

علشان لما نحاسب نحاسب صح ونختار الصح
وبدل ما نهدم الكيان نصلح الحنفية وبدل ما نقول المعلمة فاشلة نحاسب الطلاب المقصرين ونعرف سبب رسوبهم

أسفة للإطالة
بس حب فيكم وفى نادى الزمالك بفكر معاكم بعقل ومنطق