عادل عبدالرحمن يكتب : رسالتي لهواة التصاوير ...كلام في الصميم

هو ليه كل مسئول عاوز ياخد اللقطه والشووو التصوير مع أوائل الثانوية العامة سواء مدير منطقة أزهرية أو مدير مديرية بالتعليم العام او مديري الإدارات التعليمية سواء أزهرية أوتعليم عام !!!
ويطلع يجري علي بيوت الاوائل ويتصور معاهم وكأنه من أبناء عمومته !!!
الأولي بيهم المدرس اللي شرح وعلم وتعب معلم المنزل او مدرس السنتر او الاهم من دة كله هو ولي الامر الأب اللي مطحون علشان يوفر له مصاريف التعليم بالمنازل والسناتر !!!
والسؤال هو حضرات السادة المسئولين القائمين علي التعليم ازهري وعام بتتصورا مع الطلاب الأوائل ليه ؟؟؟
هو حضرتك لك فضل عليه في نجاحه وتفوقه بعد المولي عز وجل !!!
هو حضرتك مش عارف ان طلاب ثالثة ثانوي مش بيحضروا نهائياً بالمدارس ونسبة الحضور صفر !! هل وزير التعليم الجديد يقدر يرجع الطلبة المدارس هو دة التحدي الأكبر ؟؟؟
هو حضرتك مش علي علم ان الطالب طول السنة وطوال اليوم و النهار بيتنقل بين مراكز الدروس الخصوصية والسناتر والدروس الخصوصية بالمنازل !!!
هو حضراتكم لازم تاخدوا اللقطه والشو وتتصور في أحضان الطلاب الأوائل وتتفشخروا بالصور عند المحافظين والوزير ان الأوائل من عندي كما لو كان كنت بتصرف عليهم !!!
حضراتكوا عارفين وعلي يقين أن الفضل لله ثم للأب المطحون المهلوك بتوفير ميزانية خاصة يستقطعها من لحمه ودمه علشان ابنه يتفوق ، اولياء الامور هم الجنود الحقيقة في مسيرة نجاح وتفوق أبنائهم الطلاب ، ثم يأتي الفضل للمعلم الخاص المدفوع الأجر داخل السناتر او معلم المنازل هما دول أصحاب الفضل بعد ربنا سبحانه وتعالي .
يبقي إيه لازمة تصوير المسئول وكيل الوزارة أو مدير الادارة النعليمية يجري يتصور مع الفائقين الاوائل من طلاب الثانوية الازهرية او الثانوية العامة أو حتي الاعدادية العامه او الازهرية !!
بطلوا تتاجروا بنجاح غيركم ولا تتشدقوا أمام المحافظين والوزير بأن عندي اربعه او خمسه من الاوائل بالثانوية العامة او الازهرية ، فهذا النجاح صنيع مجهود طالب وأب وأسره ومعلم وليس لكم اي فضل في هذا التفوق نهائياً !!!
فلا تنسبوا الفضل إلا لأهل الفضل ، ولا تنسوا الفضل بينكم ..مش كدة ولا إييييه !!!