هند منصور تكتب : يابلد ...عيب اختشى

يا بلد ابوك الوسائط.. وامك الرشوة
فيك الغنى رايق ..والفقير بيتصفى
فيك الحمير تركب.. على أسياد كدهها وتتوصى
المواهب فيك اندفنت ..واخدت مكانها البصمة
الإنسانية فيك انقرضت.. وظهرت عليك القسوة
فيك الضعيف متألم ..وصاحب النفوذ له سطوة
شبابك فى شوارعك تائه.. بيدور على اللقمة
والنساء خلعت رأسها .. علشان تعرف تعيش
الاطفال فى المزابل ..تبحث على نص رغيف
مكانهم فى المدارس خالى ..لا علم ولا تدريس
يابلد عيب عليكى اختشى ..ده أغلى ما فيكى رخيص
زينة شبابك جهلاء.. والعلماء ثمنهم رخيص
الغلبان فيك انداس ..ومات فيك الفقير
يا بلد حرام عليك ..خلى عندك رحمة
شيلى ابنك فى عينك .. هيبتك عليه تبان
الغريب يحفظ مقامك ..لما إبنك فيك يصان
يا بلد إبنك حماك ..من غدر الأعداء
رافعة راسك بيه ..وتهيبك الأوطان
يا بلد.. إبنك وبنتك دول عرضك .. شيوخك ونساءك.. دول اسمك وتاريخك، وصورتك بين الأوطان
يابلد صونيهم ..علشان اسمك يصان
بين أعداءك هم حصنك ..من غيرهم اسمك يهان
يابلد عيب اختشى ..ده أغلى ما فيكى رخيص
زينة شبابك جهلاء .. والعلماء تمنهم رخيص.