الكاتب الكبير عبدالسلام بدر يكتب : آسف .. لن أعطيك صوتي ..!!

اتجه مهندس الصيانه في أحد المصانع التابعة لواحدة من كبري الشركات ليبلغ صاحب الشركة عن توقف إحدى الماكينات تماما نتيجة عطل لسبب غير معروف . وقف " جمعة بيه " صاحب المصانع وعلا صوته غاضبا : يعني ايه مش معروف السبب امال شغلتك هنا ايه؟
ارتبك المهندس الشاب واصفر وجهه وهو يفكر في الإجابة وقبل ان يفتح فمه طرقت السكرتيره الحسناء باب مكتب " جمعة بيه" لتخبره أن أحد العمال يريده في أمر هام . وكان على وشك ان يأمرها بالخروج وطرد العامل الا أن المهندس نطق قائلا الراجل ده ياباشا رجل مخرف ويزعم ان بإمكانه إصلاح العطل لكن أنا وبخته واخبرته اننا سنطلب اللجنة الفنية في شركة الصيانة والتشغيل اللي بنتعامل معاها . توقف صاحب المصنع لحظة ثم قال : دخليه .
وعندما دخل العامل الذي جاوز الخامسة والخمسين سنة بادره " جمعة بيه " : انت ياراجل انت بتقول انك تقدر تصلح المكنه؟
رد العامل : ايوه ياسعادة البيه انا فعلا صلحتها واشتغلت . نظر صاحب المصنع للمهندس وطلب أن يصطحبه إلى عنبر الإنتاج وهناك تأكد أن الماكينة تعمل بشكل طبيعي .ابتسم وهو يربت على كتف العامل قائلا له : مُر علي الحسابات وانت خارج علشان تصرف مكافأتك . شكره العامل وعندما هم العامل بالانصراف ليكمل شغله على ماكينته استوقفه " جمعة بيه "وقال مبتسما اسمك ايه يا أسطى ؟ رد العامل : اسمي " صالح " ياسعادة البيه .
_ صاحب المصنع : طيب يا "صالح" انت عارف اني مرشح نفسي في الانتخابات متنساش بأه ومش ها أوصيك . إنت وقرايبك تروحو تنتخبوني .
وكانت صدمة " جمعة بيه " هائلة عندما رد العامل عليه :
لأ طبعا يا سعادة البيه هنروح كلنا بس مش هاننتخبك .
صمت جمع بيه لحظة ونظر إلى صالح : إنت قلت إيه.؟
رد صالح : مش هاننتخبك ياسعادة البيه
صرخ جمعة بيه : انت بتقول إيه يا صرصار إنت .!!!!
أعاد العامل ماقاله : بأقول لسيادتك مش هاننتخبك انت ياسعادة البيه ..
فنظر اليه رجل الاعمال غير مصدق وارتفع صوته : انت عارف انت بتقول ايه ياحشرة ؟
أجابه العامل " صالح " بهدوء : عارف يابيه وباقول تاني اللي سمعته سعادتك .. .
حاول رجل الأعمال أن يبدو هادئا بعض الشئ وبعد صمت لحظات سأل العامل بصوت خفيض : طيب انت ليه
مش عايز تنتخبني. قول علشان أعرف السبب ؟
أجاب العامل : يابيه أنا لما يكون لى حق عندك ومش قادر أخده منك دلوقتي . هاعرف أخده وانت نائب في المجلس ومعاك حصانة وكل الوزرا بتشوفهم وبيشوفوك . وبتشربو القهوة والشاى مع بعض ( على حساب المجلس في البهو الفرعوني ) ياترى لو لي حق عندك أشكيك لمين يابيه ..؟ . ما هى حاجة بالعقل .
وعلى رأي اللي قال : " المصنع بتاعنا . والدفاتر دفاترنا . والمجلس حامينا "
_ إسمع ياصالح.. بلاش تنتخبني بس مش عايز اللي حصل بينا ده مخلوق يعرفه.. والا....
صالح : مفهوم ياسيادة البيه .