د.فتحى الشرقاوى يكتب : كل مرة يقولولك

إستحمل علشان خاطرنا..
إستحمل لأنك إنت الكبير والعاقل واللي بتفهم، تقوم إنت قايم ورابط حبل المودة اللي اتقطع، كل ده وإنت بتكون مش مسؤل عن قطع حبل الموده ،كل الموضوع علشان انت الكبير والعاقل والمتزن،فأصبح طبيعي انك تتغاضى وتتسامى عن هفواتهم واخطائهم اللي في الأصل إنت مش مسؤل عنها لكن بتيجي على نفسك وبتعصر عليها ليمونه علشان المركب تمشي والأمور تعدي، كل ده لأنك بينت لهم وعودتهم إنك كبير وبتستحمل وبتشيل ومابتقولش اه الغريب إنهم بدأوا كمان يقطعوا الحبل وهم ناويين وقاصدين ومتأكدين يقطعوه ثم يطلبوا منك مرة ومرات توصيله وكأن قدرك جعلك طول عمرك..تشيل أخطاء وقصور غيرك بس..
السؤال...
ياترى هو حبل العشم والود بقى فيه كام ربطه لحد دلوقتي ،أنا شايف إن الحبل اصبح دايب ومفتفت وضعيف ومتهالك وغير صالح لكي يجرجر وراه حتى نمله ،لكل اللي فات ياريت تعذروني بعد كده لو وجدتوني لا بربط ولا بفك ولا بحل، بس لازم تعرفوا ساعتها..إنكم كنتم السبب..
مجرد خاطره

ا.د.فتحي الشرقاوي
أستاذ علم النفس
جامعة عين شمس