دينا تدافع عن الرقص الشرقي: بسأل نفسي اللي مش بيرقصوا بيطلعوا زعلهم في إيه؟

شاركت الراقصة والفنانة دينا متابعيها مقطع فيديو، ترد فيه على من لا يعتبر الرقص الشرقي فن.

وقالت دينا في الفيديو الذي نشرته عبر حسابها بموقع إنستجرام: “فيه ناس بتقول إن الرقص الشرقي مش فن وأي واحدة تقدر ترقص، معقول أي حاجة مكتوب عليها مصنوع في مصر تبقى وحشة؟ دي عقدة الخواجة، ورقص الباليه هو اللي حلو لأنه روسي؟”.

وأضافت: “الرقص الشرفي اللي هو علامة المصريين وحش ومش فن؟ ليه الحاجات اللي تحت إيدكوا بضيعوها واللي جاية من بره بنحبها؟ الرقص علامة كل بلد والرقص الشرقي يعني مصر.. اوعوا تنتازلوا عن فنكوا.. ده الفن الحقيقي بتاع البلد.. كان زمان بوسترات مصر مرسوم عليها الهرام وواحدة لابسة لبس الرقص لا تتنازلوا عن الرقص.. ده فن جميل وكل العالم بيحترموه وبيعملوا ليه مهرجانات”.

وتابعت دينا: “الرقص حالة وأنا جاية من فرقة رضا عارفة يعني إيه رقص وحباه وبسأل نفسي سؤال.. اللي مش بيرقصوا بيعلموا إيه وبيطلعوا إزاي الزعل اللي جواهم، الرقص فن جميل ويُحترم.. اللي هيشوفه فن عينه شبعانة واللي بيشوفه حاجة تانية عينه فاضية”.