الخميس 28 مارس 2024 09:26 مـ
الجارديان المصرية

رئيس مجلس الإدارة ورئيس التحرير عبد النبى عبد الستار

مقالات

#بلا_هوية

دكتورة ماري جرجس رمزي تكتب : (حوار مع حمار) 10

الدكتورة مارى جرجس رمزى
الدكتورة مارى جرجس رمزى

فتح الثعلب( المتحول إلى شكل حمار ظاهرياً بعملية تجميل) عينيه بعد نوم عميق بمجرد ما الشمس طلعت وقال لنفسه:
# معقول اللي أنا شفته امبارح ده واللا ده كان كابوس؟
أنا أكيد دورت على طلبي ف مكان غلط... أنا هنزل دلوقت أشوف مكان العبادة بتاع المملكة دي.. أكيد هلاقي فيهم ناس دماغهم غير اللي كانوا ف الفرح ده خالص وأكيد ربنا هيدلني على حل علشان أنقذ غابتنا من الانقراض... ماهو لازم يكون فيه حد كويس.. بس قبل ما هعمل كده ضروري أنزل اشوف مكان آكل فيه لقمة...

وفجأة سمع الثعلب رزع وخبط ع باب الزريبة وقام بسرعة يفتح لقى حمور سمسار الأفراح بتاع كله واقف قدامه

+ الباشا الكبير... أجمل صباح ع عيونك.. يارب تكون نمت نومة حلوة والمطرح عجبك
طمني

# كله تمام والله.. الله يباركلك حطيت راسي روحت ف سابع نومة ولسه مفتح عيني دلوقت قبل ما تخبط بثواني... إيه اللي ف إيدك ده؟

+ فطار يا باشا.. ودي حاجة تفوتني برضو.. أنا حمور النِوُّر وكلي مفهومة وانت غريب ومتعرفش المملكة.. وأكيد لازم هتصحي جعان وهتعوز فطار!!

# ده أنا هموت م الجوع! كأنك بتقرا أفكاري تعال ادخل وبسم الله معايا.. كنت عاوز آخد رأيك ف حاجة كده..

+ عنيا للباشا الغالي
أديني حطيت الأكل ياللا بسم الله واحكيلي واحنا بناكل عيش وملح مع بعض.. عاوز تسأل ف إيه بقى ياترى؟

# بص يا حمور يخويا مخبيش عليك أنا امبارح ف الفرح جالي إحباط الدنيا والآخرة.. الفرح اللي ياما هنا ياما هناك ده طلع بلونة منفوخة ع الفاضي.. بالبلدي فلوس مع تيوس.. كمية الغباوة والجهل والكيد والاغتياب والغل والسواد والغيرة وقلة الأصل مرعبة تِعَشِي فرح جعان إيه القرف ده؟! لما دول صفوة المجتمع ومليانين أمراض نفسية كده أومال باقي المملكة بتاعتكم دي عاملة إزاي؟! متأخذنيش يعني!!

+ خد راحتك يا باشا كل كلامك صح واللي ينكر ضلالي وابن جزمة
إحنا ف النازل بننحدر بسرعة مرعبة
طيب إيه اللي بتفكر فيه سعادتك وممكن أساعدك فيه؟

# بفكر أشوف الناس اللي بتتردد على دور العبادة عندكم.... أنا ميهمنيش حتى أعرف دينكم أو ملتكم بس كفاية أنكم بتعبدوا اللي خلقكم وأكيد اللي جوه هيكونوا الصفوة بقى ومحترمين وبيخافوا اللي خالقهم....

+ دانت غلبان قوي يا باشا...

# تقصد إيه؟!

+ الغضب لما بيحل على جيل بيحط ع الكل واللي سيادتك متعرفوش إن أخطر حاجة لما تتمريس ع الناس بقناع التدين الظاهري وانت من جواك خربان وعبد للمال ومتع ومتاع الدنيا ومصالحها....

# فسر كلامك لو سمحت أكتر... ده أنا حاطط أمل كبير جداً ف المجموعة اللي قايمة نايمة ف دور عبادتكم اكيد دول الصفوة...

+ بص يا سيدي... أنا مش هتكلم كلام عام لأن أكيد فيه كتير من اللي يعرفوا ربنا بصدق مش وحشين بس للأسف دول مش باينين إحنا نفسنا مش عارفينهم لأنهم ف حالهم قوي ممكن منسمعش عنهم اصلاً
فهموا إن العك والفساد والصراع والأطماع والمصالح والمحسوبيات طال كل حاجة حتى الغالبية من اللي بيروحوا ويرجعوا طول الوقت جوه بيوت العبادة...الحلوين بجد قفلوا ع نفسهم وعبدوا خالقهم ف السر بعيد عن الحوارات والدوشة والمريسة الكدابة والنفاق

# نفاق!! ف بيوت الخالق!!

+ أيوه ياباشا... متأخذنيش أنا بنتي ف يوم م الأيام بهدلها واحد من اللي جوه دول عشان بس دراعها كان باين ف حفلة عيد ميلاد ابنها وجوزها جنبها معاها وسط أهلها جوه بيتها وكسر نفسها ويوم فرح بنته كل صورها ف حفلة جوازها طالعة لابسة فستان كل صدرها ودراعها وضهرها مكشوف
الشيزوفرينيا على آخرها هنا
والمصيبة السودة إن لما بيندهوه يبارك فرح حد من المريشين و هيقبضه فلوس حلوة بيروح جري والعروسة تبقى عريانة ويبارك ويدعى ويبقى أسعد سعيد ف الدنيا ....
يا باشا أبعد لتروح ف داهية!
وافتكر كلامي هنا التجارة بالدين ماشية زي السكينة ف الزبدة.. لو حبيبهم وهتقبضهم أو هتخدمهم كل حاجة هتعملها حلال وتعدي وتتبارك كمان لو ملهمش مصلحة معاك تبقى مش من اللي هتكون ف صحبتهم ف الجنة اللي معرفش بالظبط هيعتبوها ازاي أو مكانها فين أصلاً... هو ربنا غضبان علينا من شوية!

# يادي المصيبة اللي ع الصبح...

+ طيب وسع صدرك شوية وخد الحكاية دي من محسوبك...
ابن أخويا بهيم حلو كده وغلبان وم النوع اللي عايش ع ذكري أيام أبوه وجده الله يرحمهم وفاكر إن لسه كل اللي جوه بيوت الخالق زي اللي كانوا ع أيام جدوده... كان عاوز يتجوز بهيمة ملهاش مثيل وراح ياخد رأي واحد م اللي جوه علشان يباركله لأنه فاكر إن اللي هيقولهوله ده رسالة م اللي خالقه...
البهيمة اللي كان بيفكر يتقدملها دي م النوع اللي بقولك عليه اللي ف حاله ف طبعا الكبير قاله بلاش دي وخد بهيمة تانية احسنلك وبايته عندنا ف دار العبادة ليل نهار ودي اللي تعيش معاك وعارفينها

# حصل إيه بعد كده؟

+ قلبته وفسخت الجوازة قبل الدخلة بيوم.. وفضيحته بقت بجلاجل وخسر فرصته مع الجوهرة الأولانية...
المصالح يا عمنا دخلت حتى ف المكان اللي المفروض ميكونش فيه غير ربنا والخير بس
وبقي ده اللي بيحرك الكبار وطظ ف الغلابة اللي يصدقوا وياخدوا ع قفاهم علشان صدقوا.....
يعني بعقلك يا باشا لو الكبير ده كلامه ونصيحه لابن اخويا الأهبل جاية من عند اللي خالقه فعلاً كان اتفضح الفضيحة دي ومسك فيه عار لآخر يوم ف عمره وأي بهيمة هتترعب تقرب من بهيم اترمي ليلة دخلته... وهيضطر ياولداه ياخد بهيمة معيوبة ويبين للمملكة كلها إنه فرحان وطاير م الفرحة كمان بيها والسبب مين... الكبير اللي جوه اللي ورطه وخلع!
كُل يا باشا... كُل...

# آكل إيه بقى.... ده أنا نفسي اتسدت وعاوز استفرغ كمان
إنتم إزاي مقرفين ووحشين كده ف كل حاجة وكل مكان؟!! مبتخافوش ربنا حتى.....

+ لو بنخاف ربنا مكناش وصلنا للضياع اللي احنا فيه ده... والغضب اللي نازل يرف علينا أشكال وألوان
احنا مناظر ع الفاضي... مسوخ آخرها صورة ووش متركب...

# طيب والعمل دلوقت؟!

+ هو أنت مصمم يا باشا تتجوز م المخروبة دي؟

# آه أيوه.. مصمم مقدميش أي فرصة تانية.. قلتلك بنات مملكتنا كلهم اتجوزوا
شوفلي أحسن الوحش ووديني أماكن تانية اتصرف!

+ ياباشا وعهد الله هتتعب نفسك ع الفاضي!

# معلش يا حمور خلينا طيب نبعد عن الأغنيا اللي اغلبهم حاليآ شبعة من بعد جوعة.... وعن بتوع ربنا بالكدب والظاهر والحركات...
خلينا مع الناس العادية المكافحة وديني عيادة دكتور اي دكتور عادي...

+ بشوقك يا باشا...
انا هطلع من هنا حمامة ع عيادة الدكتور بوهيمي هقطعلك كشف ونتقابل ع الناصية أول الغابة هناك كمان ساعة...

# ماشي يا عم حمور أشوفك بعد ساعة

يتبع الخميس القادم إن شاء الله