رضا طلعت فهيم يكتب : الشيف الجربوع...

نعم كما قرات العنوان
ليس بخطا مطبعي
في عالم الطهاه... هناك امور خفيه لايعلمها الا من هم بالقطاع الطهوي..
في هذا المقال سوف اغوص في قاع هذا العالم الممتلي الدسم المشبع بالغرائب والعجائب
انه حقا سمك لبن تمر حنه
هيا معي لنتعرف ع انواع من الشيفات الذين قد تكون صادفت احدهم في حياتك
واعتقد من السهل جدا معرفتهم من خلال طرق بسيطه جدا.
في المطابخ المصريه والعربيه
انواع الشيفات في الوطن العربي
يتعدد انواع الشيفات بصفات مختلفه كالاتي
1- الشيف العصبي
وده حد طول الوقت صوته عالي ولو قولتله صباح الخير هيمسك فيك وفي الغالب النار سيحت دماغه وبيتخانق مع دبان وشه وممكن يحطك في الفرن لو اتعصب فحاول تبعد عنه

2- الشيف البارد
وده شخص مستفز جدا يشبه انثي سحليه غابات الساڤانا ممكن يجبلك شلل رباعي وجلطه و تبول لا ارادي وهوا مبتسم. وفي الغالب بيكون شخص دمه تقيل ومحدش بيحبه فحاول تبعد عنه

3- الشيف المغرور
وده بيكون شخص عندو مشاكل نفسيه وبيتعامل مع كل زمايله ان هوا مخترع فكره البطاطس المحمره وفي الغالب هتلاقي مستواه في الضياع ومش هتاخد منه شغل كويس فحاول تبعد عنه

4- الشيف الوصولي
وده بيكون معندهوش مبدء ممكن يبع اي حد عشان يطلع درجه اعلي وفي الغالب مبيطلعش بردو وكل الناس بتتجنبه فده بقا بردو حاول تبعد عنه

5- الشيف الغلبان
وده بيكون في الغالب بيستثمر مرتبه في بامبرز ابنه عبد الرحمن اللي سماه علي اسم ابوه الله يرحمه ويفرتك الطوبه اللي تحت راسه.
وحياته متوقفه علي مواعيد محل بتاع اللبن والذبادي
في الغالب بيكون معندهوش تارجت في حياته تحسه غلبان ومنكسر وبيجري علي يتاما او عايز يشتري حقنه البلهاريسيا كل اول شهر ‘ و هتلاقي بردو مستواه المهني محدود وقديم وتقليدي مبيحاولش يشغل مخه وبيكون اقل واحد في المطعم بيعمل مشاكل ده بقا حاول بردو تبعد عنه
6-الشيف العبقري
وده معاه ميداليه اولمبيه في الاختراعات الفاشله والغريب انه بيكرر نفس الاختراع كل يومين وزمايله بيقولوله انه وحش وبردو مقتنع انه دكتور مجدي يعقوب
7- الشيف المعقم
وده بقا راجل نضيف جدا ولبسه ديما مكوي وريحته حلوه بيغسل ايده قبل وبعد كل اوردر لكن بيكون شخص بيقرف من اي شيء وديما شايف زمايله عباره عن طفيليات وبكتيريا السلمونيلا
8- الشيف المكتئب
ده بقا ديما متخيل ان في مؤامره كونيه ضده وان الاتحاد السوفيتي بيدبرله مصايب عشان يوقعله الاوبريشن
والاتحاد الاوروبي عايز ياخد مرتبه وان الاونر بيكرهه اكتر من احمد موسي. وان في نيزك هينزل علي المطعم او الفندق اللي شغال فيه يفرتكه . متتعاملش معاه عشان ده محتاج جلسات علاج نفسي او جلسات كهرباء
9- الشيف نجيب ساويرس
وده من اثرياء قاره افريقيا مش فارق معاه مرتبه بيغيب 3 ايام في الاسبوع علي الاقل وبيتخصمله فلوس كتير من مرتبه وبردو مفيش فايده وبيتاخر باقي الاسبوع وتحسه بيستمتع بكده وصحته بتيجي علي الخصم

10- شيف الاستخبارات الامريكيه
ده بقا ليه القاب كتيره اوي اشهرها العصفوره
تحسه مراسل اخبار قناه الجزيره لازم يعرف كل حاجه بتحصل حتي لو حاجه شخصيه ولازم ينقلها للاداره ولزمايله وممكن للفراخ المجمده.
في كل مكان هتلاقي الحلو والوحش بس دي اشهر الشخصيات السلبيه اللي بنقابلها في الشغل