الكاتبة الكبيرة هند منصور تكتب : هو فى ايه بجد ؟!

ًـ مبقاش حد بيسأل عن حد !

الإبن بينسى يسأل عن أبوه

والأخ قاسى قوى على أخوه !

والأخت ليها بيتها وبس !

والجار ليه مش طايق جاره ؟!

والصديق.. كان زمان، لوقت الضيق..دلوقت بقى بتاع وقته وبس !

وكل واحد شايل همه، وماشى لوحده ..يينزف دمه !

راحت فين المحبه ..وراحت فين الطيبة، والسؤال بدون أهداف ؟!

حصل إيه فى الدنيا بجد؟!

الحب أصبح عملة نادرة،
والطيبة أصبحت بعيدة، عن قلوب أصحابها.. وكأنها عيبه !

النفوس على بعض، بتدوس ..وانتهت الغلاوة، وادى النتيجة !

قلوب عطشانة وملامح دبلانه،
وأيادى شقيانة والكل مطحون وانهد ..

هو حصل إيه فى الدنيا بجد؟!

كل واحد بيدور على حاله، وشايل همه وماشى فى حاله
تقيل وقته ومشغول باله.. بينسى حتى يسلم على حد ..

فين اللمة الحلوة بحب .. كانت القلوب بتخاف على بعض ..
والمريض على الرأس بتشال،

والحزين تحاصره الناس .

والمهموم تشيله الناس ..

والمكسور يشفيه الإحساس،
بالحب ..من قلوب بتعرف معنى الإخلاص..

حصل إيه فى الدنيا بجد؟!

نفوس مريضة وغيرة وحقد ..
أخلاق معدومه وأفكار مسمومة..

والأصيل يداس عليه، وقليل الأصل يجروا عليه ويتمنوا رضاه لو شد ..

هو حصل إيه فى الدنيا بجد؟!

بتموت الناس قدام الكل ، والقلوب باردة، والعيون من بعيد تتطل، ويقف الرجل الأيدى مكتوف ..

فين النخوة اللى كانت زمان ..بقيت تدارى الناس فى الحيطان ..فين وقفة الرجال بجد ؟!

هو حصل إيه فى الدنيا بجد ؟!

ايوه الأخ بيسرق أخوه ويسلب حقه فى ميراث أبوه، وفى المحاكم يقف لأبوه .. وأمه تموت قهراً منه ..ويختار هو الفلوس بديل ..أهله وعائلته وناسه وكل ماله !

..هو ده بجد ؟!

عمرنا ما كانت دى أخلاقنا ولا تقاليدنا ولا عادتنا..

كان الأصل دائما سباق، والجميل على الرأس يتشال، وكل شخص له مكانه، وله مكانته.. والقلوب بتشيل أحباب، أهل وعائلة
وأصحاب، وعلى الرأس تتشال الأغراب!
حصل إيه فى الدنيا بجد؟!