الدكتورة مارى جرجس رمزى تكتب : (حوار مع حمار) 11

وفي الميعاد المحدد اتقابل الثعلب _المتحول إلى حمار ظاهرياً بعملية تجميل _ مع حمور سمسار الأفراح بتاع كله وكان بالفعل حجزله عند الدكتور ومشيوا مع بعض لحد ما وصلوا العيادة ودخلوا لقوا العيادة فوق بعضها......

# إيه ياعم يوم القيامة ده!! إحنا كده قاعدين لبليل وأنا معنديش وقت ولا أعصاب... أنا جاي لهدف انت عارفه... هي دقايق أشوف الطبقة المتعلمة تعليم عالي دي عندكم دماغها رايحة فين وهل الواحد ممكن يلاقي فيها اللي عوزه واللا لا...

+ متقلقش.. طول ما معاك حمور متقلقش... بس شخلل!!

# مش لابس غوايش يلذيذ.... أشخلل إزاي يعني؟! واللا بإيه؟! وإيه علاقة الشخللة اصلاً باللي إحنا فيه ده!!

+ شخلل يا باشا.... سمعنا صوت فلوسك يعني... شخلل عشان تعدي!!

# ده أنا دافع ياجدع! ودافع مستعجل كمان.. أشخلل إيه تاني؟!!

+ شخلل للتمرجي علشان يستعجل المستعجل... يووووه طلع بريزتين ورق وانت ساكت

# وده إيه ده كمان؟! البرايز طول عمرها معدن!

+ تصدق بالله انت شكلك ف حته تاني خالص وبعيييبد قوي... ياعمنا هات عشرين جنيه واخلص وخلص أمي معاك...

# وطلع الثعلب ورقة بعشرين وأخدها حمور ودخل ورا التمرجي وراح موشوش ف ودنه وحطله الفلوس ف جيبه...
هما ٣دقايق بالظبط وكان حمور والتعلب ف أوضة الكشف...

× اتفضلوا... مين فيكم العيان؟

# أنا يا دكتور... هو مش بالظبط كده... هو يعني أنا عندي شوية إرهاق و جهدي مش زي الاول و.....

× اطلع على سرير الكشف

وفي خلال ٤ دقايق كانت عملية الكشف تمت بدون حرف واحد من الطبيب
ورجع بسرعة على مكتبه ومسك قلمه وكتب ورقتين وش وضهر

× الورقة دي تحاليل تتعمل ف معمل (حمارولاب) اللي ف أول الغابة
والورقة التانية تصرفها من صيدلية (الدكتورة حُمُورية) اللي تحت العيادة... واوعى تصرفها من أي مكان تاني ولازم تطلع للتمرجي يتطمن إن العلاج اتصرف صح وإياك يدولك بديل....

# طيب يا دكتور حضرتك مش كنت تشوف التحاليل الأول وبعدين تكتبلي دوا... وبعدين هو أنا عندي إيه علشان الروشة الوش وضهر دي؟! وبعدين ليه بلاش بديل ؟ هو مش البديل ده نفس المادة الفعالة؟! متاخذنيش أنا غريب وعندنا ف الغابة بتاعتنا الدكتور كان بيكتبلي المادة الفعالة المطلوبة والصيدلي ف أي صيدلية بيديني أي بديل عادي لان كله زي بعضه...

× انت جاي تهزر صح... اتفضل من هنا وتنزل تعمل اللي قلتلك عليه انت عارف انت جاي لمين انت جاي ل كلاس A دكتور.... اتفضل من غير مطرود

وخرج الثعلب مع حمور وهو متنح

# تسمح تفهمني إيه اللي حصل معانا من أقل من عشر دقايق جوه ده فهمني حالا وإلا هروح فيك ف داهية

+ وأنا ذنبي ايه بس!! اهدا ياباشا.... مش انت اللي حبيت تشوف منطقة تانية من مملكة البهايم... وأنا حذرتك!
بتنسي انت ياباشا... نساي وعصبي!
اهدا وتعال معايا نقعد ع قهوة وأنا هفهمك اللي حصل ف العشر دقايق دول... وأنا اللي عازمك يعم

وصل حمور والثعلب للقهوة وطلب حمور اتنين عصير برسيم مشبرين وقال

+ ياباشا اللعنة صايبة الكل... الدكتور اللي مملكة البهايم فكراه أشطر دكتور ده فيه كتييير قوي أشطر منه مليون مرة لكن هنا المملكة مخها مش ف راسها

# أومال فين؟

+ف عينها وودانها وجايز ف حتت تانية المهم مش فوق... مش ف راسها....
والإعلام هنا من كتر ما فلس ومعندوش حاجة يقدمها فاتح قنواته الفضائية لبرامج اتحولت إعلانات... معاك ادفع واطلع انشالله تكون هتشيع نص البهايم للاخرة او هتوديهم ف ستين داهية او بتبيع الهوا ف ازايز
البهايم حابة ده مش فاهمين إن ده اعلان زيه زي اعلان الشوكولاتة والسمن والزيت
هما راكبة ف دماغهم طالما ده طلع ف التليفزيون يبقى مشهور وشاطر وميعرفرش إنه طالع عشان دافع تمن اعلان ف برنامج وكل برغوت على اد دمه برنامج مشهور له تمن برنامج على اده له تمن وكده يعني ياباشا...

# والنتيجة؟

+ الدكاترة الشاطرة محدش سامع عنهم واللي ع الغلاف هو الباشا اللي لسه نازلين من عنده

# دانتو مملكة كارهة نفسها وبهايم بهايم على أصولها

+ عارف المعمل اللي باعتك تعمل فيه تحاليل ده بعتك فيه ليه؟

# ليه؟

+ كل راس بهيم بيحولهالهم ليه فيها 50% من اللي هيدفعهولهم ف المعمل

وتعرف اشمعنا الصيدلية اللي تحت منه دي بالذات اللي قالك تجيب منها الدوا؟

# ليه الله يخرب بيت اهاليكم؟

+ بتاعة بنت أخوه ومشارك فيها

وتعرف قالك ممنوع بديل ليه وتطلع للممرض يتأكد صرفولك علاجك صح واللا لا؟

# اتحفني...

+ عشان الدوا اللي كاتبة مطلوب يطلع منه عدد معين عشان الشركة اللي بتنتجه يطلعوه يصيف هو ومراته ف منتجع البركة اللي ف أول الغابة اربع أيام ب تلات ليالي فول بورد

طيب تعرف اهم حاجة ف الموضوع إيه؟

# إيه؟

+ إني هاخدك دلوقت لدكتور تاني وهيكشف عليك بحق الله وهيقولك انك سليم ومفكش حاجة...

# طب مانا عارف إني سليم هو انت صدقت إني عيان!

طيب ليه من الأول مودتننيش عند الدكتور اللي عنده ضمير ما ده اللي أنا بدور عليه...

+ياباشا اسمع من اخوك الصغير حمور... أوعى تقول على حد عنده ضمير إلا لما يكون معاه كل حاجة ويرفض يعمل الغلط او يخالف ضميره...
الدكتور اللي لحد دلوقت عنده ضمير مش متوفر عنده المال اللي يطلع بيه ع الفضائيات ويتشهر بمفهوم البهايم
لسه مبقاش عنده عشرات الحالات كل يوم ومعامل التحاليل والشركات تغريه علشان تستغل شهرته علشان تعرف ساعتها هيعمل إيه... هيراعي ضميره ويرفض يبيع العيان علشان يملا جيبه واللا هيبقى زي اللي كنا عنده وألعن...

ياباشا الضمير والأخلاق ومعدن الواحد بيبان لما يكون عنده كل حاجة ويتحط ف امتحان لكن يرفض يعمل الغلط والحرام

# تصدق بالله يا حمور
انت الوحيد لحد دلوقت اللي داخل دماغي ف مملكة البهايم الوقيع بتاعتكم دي
انت ايه حكايتك بالظبط؟

+ مابلاش يا باشا...
كفاية عليك كده وخد بعضك وارجع مملكتك

# معلش يا حمور وحياة العيش والملح اللي بينا ده لتحكي

يتبع الخميس القادم بإذن الله