” ورك نملة مطلقة ”... قصة قصيرة الأديب طه هيكل

يكونشي معمول له عمل
جملة تتكرر كثيرا وعلى جميع المستويات والطبقات
يكونشي معمول له عمل
عاى ورك نملة مطلقة
بسبب خلافات مع حماتها
بسبب حبتين سكر وقعوا تحت جناح الفرخة وهي نايمة بترضع الكتاكيت
مع أن الفرخة بتبيض بس عادي بسبب أنه معمول له عمل هنخليها ترضع
بس ازاي نفك العمل
أقول لك ياسيدي
تحاول تصالح النملة وترجعها لعصمة جوزها
وتأجر لها ( شق) مكيف بتدخله الشمس من الأربع جهات
وتتعامد على شعر النملة البنفسجي في احتفال يقام كل ٣٠ ثانية
المهم لما النملة ترجع لجوزها تحاولوا تغروها ولو وصل الأمر تقدموا لها رشوة
ظفر الرجل الشمين من رجل فرخة مسلوقة وتقربوه من الشق السكني
وتسحبوها وتقرروها
مين اللي خدك يانملة وكتب عمل لابننا على وركك
قولي انطقي لازم نعرف مين اللي عمل عمل لابننا خلاه ماشي يكلم نفسه
ويقول كان مالي ماكنت ف حالي
لا لي في التور ولا في الطحين

النملة خافت من التهديد
قالت لهم فاكرين البت نوال اللي كان ابنكوا خاطبها وهي هبلة
وكانت بتلعب مع العيال في الشارع
وجه العريس يخطبها قدمت له هدية عروسة طين وحطتها له في جيب الجلابية
؟
قالوا لها اه فاكرينها
قالت لهم اتجوزت بقالها شهر وانقطعت صلتي بيها
وأنا أعرف منين أن ابنكوا معمول له عمل
؟
وفجأة سمعوا صوت وصريخ ف الشارع
ابنهم عمال يضرب نفسه بعود قصب معفن
ويقول كان مالي ماكنت ف حالي لابي ولا علي ولا لي في التور ولا في الطحين

وأخته ناعسة تقول يكونشي معمول له عمل
وتوتة توتة
خلصت الحدوتة