السبت 18 سبتمبر 2021 01:25 مـ
الجارديان المصرية

رئيس مجلس الإدارة ورئيس التحرير عبد النبى عبد الستار

مقالات

الدكتورة مارى جرجس رمزى تكتب :( حوار مع حمار ) 6

الدكتورة مارى جرجس رمزى
الدكتورة مارى جرجس رمزى

#مقولتيليش يا أنسة (حمرمر) إيه هي يا تري مواصفات حمار أحلامك؟
- بص ياسمك إيه... أنا مش أقل من بنت خالتي ولا بنت عمي.. أنا ضافري برقبتهم كلهم!!
ميغركش العروسة الحلاوة اللي قاعدة ف الكوشة هناك دي.... دي كل حاجة فيها عيرة
اسألني أنا... شعرها تركيب حاطة إكستنشن م اللي طالع موضة اليومين دول.. ورموشها لزق و ضوافيرها لزق
طب خد الكبيرة بقى كل مؤهلاتها عيرة
فوق وتحت واهي قدامك أهي.. واخدة ابن أكبر حمار عندنا
# ماهو عشان ابن أكبر حمار....
- بتقول حاجة يا أستاذ
# احم آه.. لا.. بقول ماهو دي خيبة اللي بياخد بالشكل من بره
- ياللا هتروح منه فين مسير البوية تنزل ف الغسيل.. ماهي مسيرها هتستحمي.... والشعر يقع بعد ما مدته تخلص وياخد معاه الكام شعراية اللي ساند و متركب عليهم... بقولك اسألني أنا دي قرعة والضوافر تتخلع أو تتكسر بضوافرها معاها.. وأكيد هتقلع الحشو وهيكتشف الحقيقة الحمار ابن الحمار..
# بس برضو يا أنسة (حمرمر) أكيد يعني هو واخدها عشان حاجات أهم وبيحبها
- لا وحياتك.. هنا البهايم بتاخد بالشكل بس
- طيب بعد ما بيكتشفوا إنه كله عيرة ومايلاقوش الجمال الحقيقي اللي بيفتح ويعمر البيوت
- بيطلقوا ويروحوا يتدبسوا برضوا ف مصيبة جديدة ويطلقوا ويكملوا حياتهم كده...
# طيب ليه مبتحولوش كبهايم بنات انكم تشتغلوا على مهارات حقيقية زي إزاى تفتحوا بيت وتراعوا عيال وتسندوا البهيم بتاعكم بدل ما تحلبوه بالطلبات؟
- بص يا كابتن هو لسببين
الأول معندناش وقت
إحنا طول الوقت مشغولين إزاى نخلي شكلنا من بره ملفت وده بياخد وقت ومصاريف كتير... بيت إيه وطبيخ إيه ودعم البهيم اللي معانا اييييييه؟!!
والسبب التاني بصراحة ولاموأخذة... ده تمام البهايم الدوكورة هنا فاحنا بناخدهم ع أد عقلهم لحد ما رجلهم تيجي ف المصيدة ونطلع منهم باللي نقدر عليه... اتطلقنا بقي أو كملنا نبقى أمنا مستقبلنا
ده تمامهم هما اللي خلونا نكون كده!!
# ليه بتقولي كده يا (حمرمر) أكيد زي ما فيه البهيم الخايب العبيط فيه برضو الكويس واللي يستاهل بهيمته تكون كويسة
- كان زمان... أيام جدي وجدك يخويا... دلوقت إحنا البنات لازم نعيش بالدراع الدوكورة هما اللي حولونا للحال ده لما اتغيرت معايرهم في اختيار شريكة الحياة
فضحكنا عليهم وبقي لا فيه لا جمال ولا عيشة عدلة...
خلي بالك إحنا أذكى منهم بس سيبينهم يفتكروا العكس...
#طيب وانتي فرحانة بالحال ده؟
- طبعا لا... وحزينة وعلى طول مكتئبة حاسة إنه كله هبل ف هبل وغش ف غش
القصة كلها مصالح متبادلة بس معدش فيه صدق ولا حب للروح نفسها وعلشان كده بقينا أعلى نسبة طلاق بين كل الممالك في كل الغابات
# وإيه اللي جابرك على كده؟!
- هنا تعليمنا لحد معين بعدها لازم البهيمة تتجوز ف بنتدبس ف اي حمار معاه فلوس وخلاص ونعمل نفسنا فرحانين ومبسوطين وتم ترالاململململم واتمختري يا حلوة يا زينة يا بهيمة من جوه جنينة... وإحنا عارفين شكل العيشة هتكمل إزاى
# طيب لما انتي عارفة إن مينفعش تتجوزي غير حمار بيحبك لنفسك ويخاف عليكي ويعيش معاكي ع المُرة قبل الحلوة ما تدي فرصة توسعي دايرة معارفك وممكن ميكونش من أغنياء المملكة لكن له مستقبل وابن أصول ويحبك بجد
- ويقولوا (حمرمر) جالها شبكة أقل من بنات خيلانها وعمامها أو دخلت ف زريبة تلات مطارح بس والتانيين داخلين ف زريبة خمس وست مطارح يرمح فيها الحمير
ليه يعني؟ هو أنا اقل منهم؟!
دانا ضافري برقبتهم كلهم....
# لا مش أقل منهم بس أذكى منهم
إيه اذكي منهم دي؟ يعني ايه تقصد إني غبية؟!
# متزعليش مني يا (حمرمر) أيوة غبية... لما تكوني عارفة إنك داخلة على مشروع بيع وشرا والطرفين بيكدبوا على بعض وتكملي عشان المظاهر والمصالح أو شوية فلوس تبقى غبية!!
#سيبنالك الذكاوة كلها يا عم أينشتاين ... شكلك مش من مملكتنا ومش فاهم أي حاجة!
# لا حول ولا قوة إلا بالله... أنا برضو اللي مش فاهم حاجة....
- آه طبعا... وهو ده آخر الدوكورة ف المملكة القرف دي وتمام غباوتهم وهما اللي حولونا لكدة ليك شوق ف حاجة تاني يا لطخ!!
# لطخ!!! ... أنا فعلاً لطخ وستين لطخ اللي قعدت اتكلم معاكي ياللا فوتك بعافية ونجيلك قريب ف فرحك ع حمار اهبل تخربي بيت أبوه طلبات عشان تتجوزي ومش بعيد بعدها تموتيه وتوريه....
- ده يبقى يوم المنى ياحيلتها هو أنت فاكر بنشن ع المريشين من جمال سحنتهم
لولا شوية الفلوس اللي معاهم مكنتش نتاية واحدة م البهايم المتلمعة من برة دي بصت على واحد فيهم
وعلشان كده بنضحك عليهم لحد ما نوقعهم ف المصيدة... شعر عيرة ورموش عيرة وطن مكياج وتضاريس عيرة
# وأخلاق وأدب عيرة... فهمت يا اختي
فوتك بعافية الله يحرقكم دوكورة على نتي....
وقام الثعلب المتحول ظاهرياً إلى حمار بعمليه تجميل وراسه بتلف من اللي شافه بعنيه وسمعه بودانه ولقى مكان فاضي جنب فرشة قاعد عليها حمارين صوتهم عالي شوية فمد رجله ورمى ودن من بعيد وسمع الحوار الاتي

يتبع الخميس القادم بإذن الله
دكتورة ماري جرجس رمزي
#بلا_هوية