أمل الكيلانى تكتب : أجيب لك أيه وانا جاى

هات لى مخدة احط عليها راسى انام
هات لى قلب يزعل بس يصفى قوام
هات لى حبيب فارقنى وباشوفه بس في الاحلام
هات لى ساعة راحة بال وحبة فرح .. لو بريال
وهات اقفال اقفل بيها باب الحزن
و هات م الحب مليون حضن
و هات لى معاك شوية صبر
و هات لى للخواطر جبر
و هات صورة لذكرى ف قلبى محفورة
هات لى أمان وضحكة طالعة باطمئنان
اقول لك .. علشان ما تتلخبطش
هات لى .. زمااااااان وهات العمر من الأول وهات حبايبنا من تاني وهات العزوة واللمة وهات الجيرة والصحبة وهات قلب مايسودش وعيون جميلة ماتحسدش وعيش وملح ما يتخانش.
مش بنندم علي اللي فات بس بنحن للذكريات بنحن لعمر فات بنحن لكل لحظة عشناها مع الناس العزاز غصب عنّا بندور في الوشوش يمكن نقابل ناس جميلة نطمن لها زي ناسنا زمان أيام لما كانت القعدة ضحكتها تسمّع طالعة من القلب لا بنحسب لها حساب ولا بنقيسها بالمقياس كان كل حد فينا بيمد ايديه لصاحبه بيحضنه بكلامه ويدفيه بعنيه كان كل حد فينا خايف ع التاني وماسك فيه في الحقيقة غصب عنّا بنعيش في اللي فات غصب عنّا بنتمني إنّ كل لحظة حلوة مرّت علينا ترجع زي زمان غصب عنا وحشنا الناس العزاز اللي كانوا كانوا لنا ضحكة الأيام
. هات لي زمان