هاميس جمال تكتب : وأد المشاعر

فى البداية للى ما ميعرفش أية هو الوأد ؟
هو عملية قتل للبنات حديثى الولادة ف العصر الجاهلى لظنهم أنها عار .
قتل الطفوله و البراءة و الإنسانية كمان !!!
لكن هنا كلامى يختلف لأن الوأد هنا للمشاعر و للنفس ، و لبراءة الروح
جربت تتعامل بكل بساطة و إنسانية و عفوية ؟
و ف المقابل أتطلب منك تموت كل المشاعر الصادقة اللى جواك دى لمجرد أنها خرجت و ظهرت لأناس لا يعتبروا من تصنيفات البشرية .
دخلوا جواك قرار بوأد مشاعرك و بدل ما كنت ( طيب .. حنين .. عفوى و تلقائى .. قلبك بيسامح مهما قابلت من أخطاء)
قررت تكون ( قاسى .. بليد المشاعر .. كثير الظن بالسوء ) ، و دخل على قلبك صفات مش موجودة أصلا
أوعى تستسلم و تكون زى ما هما عايزين و ( تقتل كل حلو جواك ) روحك ، نفسك ، شغفك بمتعة الحياة
لكن يا صديقى .....
قرر و أتعلم الحكمة و العدل ف علاقاتك مع كل البشر .
خليك كبير ف نظر نفسك .
سامح ... لكن أتعلم تاخد حقك بأدب و زى ما قال أجدادنا زمان أن ( أخد الحق حرفة ) .
حب ... لكن متجيش على نفسك و تتحمل الإهانة بسبب حبك ، و الحب اللى مايرفعكش ل سابع سما أوعى تخلية ينزلك ل سابع أرض .
عيش أحلامك و حاول تحققها .. من غير ما ترتفع أو تعلا على أكتاف الآخرين .
و ثق أن لك إله ف ظهرك ساندك و رافعك فوق كل رايات العالم .