عمرو الششتاوى يكتب : معركة الوعى

أنا مش عايز كامل الوزير اللي ظبط مواعيد القطارات و طبق الغرامات علي المخالفين ،،

أنا مش عايز كامل الوزير اللي باع خرده السكه الحديد ب 340 مليون جنيه بعد ما كانت بتتباع ب 13 مليون ،،

أنا مش عايز كامل الوزير اللي أشتري جرارات جديده من المجر و جدد المحطات
و المزلقانات و فتح انفاق المشاه اللي كانت مقفوله 8 سنين و محدش يعرف عنها حاجه ،،

أنا مش عايز كامل الوزير اللي قضي علي بيع التذاكر في السوق السوداء و رحم الناس
من جشع السحتجيه ،،

أنا مش عايز كامل الوزير اللي رفع من كفاءه عمال الورش و رفع رواتبهم بعد ما كانوا مدفونين بالحيا ،،

أنا مش عايز كامل الوزير اللي خلي المسئولين في وزارته ينزلوا و يباشروا الشغل علي ارض الواقع بدل قعده المكاتب ،،

أنا مش عايز كامل الوزير بتاع الطرق و الكباري ومترو الانفاق و المونوريل ،،

أنا مش عايز كامل الوزير الدينامو صاحب الإنجازات ولا عايز أي وزير مجتهد بيشقي
و يتعب علشان خاطر مصلحه البلد دي !!

أنا عايز وزير من بتوع زمان اللي كانت أزايز الويسكي موجوده في مكاتبهم و عربياتهم ،،

أنا عايز وزير من اللي أمضته بالقلم الاحمر علي ورقه بيضا تخليني أخد شقق و أراضي
و أوظف ولادي و أسحب من البنك كام مليار بدون ضمانات ،،

أنا عايز وزير من اللي بيسهروا سهرات حمرا مع أعضاء مجلس الشعب بالليل علشان محدش فيهم يعمله استجواب تاني يوم الصبح ،،

أنا عايز وزير من ابو كرش اللي قاعد علي مكتبه في التكييف و مش قادر يتحرك
و موظفينه عاملين مصالح بالملايين
و هو مش دريان ،،

أنا المواطن اللي عايز وزير بالمواصفات
دي علشان أعرف أعيش سفلقه !!

و أنا الموظف اللي عايز وزير يسيبني نايم علي مكتبي لحد العصر علشان أعرف أسترزق و أركز في البزنس بتاعي بالليل !!

و أنا الاعلامي اللي يعجبني وزير من النوع ده علشان أطلع من وراه بأي سبوبه !!

و أنا النائب اللي ينفعني وزير زي ده علشان أعرف أعمل مصلحه علي حسه و أرجع الكام مليون اللي دفعتهم علشان أدخل المجلس !!

إنما كامل الوزير واللي زيه مفيش منهم منفعه ولا مصلحه

و علشان كده كل ناقص من الهليبه ولاد الحرام شايفين إنه لازم يمشي .